ب / ئيسلام بەردەوام بەرێ مە ددەتە هاريكرنێ و جانێ هاريكاريێ ل دەف دچينيت و ژ مە دخوازيت بەردەوام هاريكاريا هەڤدوو بكەين و خێرەكا مەزن ل سەر ڤێ هاريكرنێ دانايە يێ هەوجەيا برايێ خۆ بقەتينيت خودێ دێ هەوجەييا وى قەتينيت، و يێ موسلمانەكى ژ تەنگاڤيەكا دنيايێ رزگاركەت خودێ دێ وى ژ تەنگاڤيەكا ئاخرەتێ رزگاركەت و يێ دەركەڤيت بۆ جهئينا هەوجەيەكا برايێ خۆ يێ موسلمان بۆ وى باشترە ئەو هەيڤەكێ خۆ ڤالاكەت بۆ عيبادەتى د مزگەفتا پێغەمبەريڤە (سلاڤێت خودێ لێ بن). و كەفالەتكرن ئێك ژ وان رێكێت هاريكاريێيە د ئيسلامێدا. و پێغەمبەر ب خۆ (سلاڤێت خودێ لێ بن) بوو كەفيل هەروەكى ئبن ماجە ژ ئبن عەباس (خودێ ژێ رازی بیت) ڤەدگێريت، دبێژيت: ئێكى ستۆيێ ئێكى گرت دەينەك سەر بوو ئينا دەف پێغەمبەرى (سلاڤێت خودێ لێ بن) ئينا پێغەمبەرى (سلاڤێت خودێ لێ بن) گۆتێ: دێ چەندێ خۆ لێ گرى؟ گۆت: هەيڤەكێ، ئينا پێغەمبەرى (سلاڤێت خودێ لێ بن) گۆت: هەكە د ڤى دەميدا نەئينا ئەز كەفيلێ وى مە. و پشتى هەيڤەكێ پێغەمبەرى (سلاڤێت خودێ لێ بن) پێش ويڤە دەينێ وى دا، و سەحابى يێت بووينە كەفيلێت ئێكدوو. سەلەمآ كورآ ئەكوەعى (خودێ ژێ رازی بیت) دبێژيت: پێغەمبەرى (سلاڤێت خودێ لێ بن) نڤێژ ل سەر ئێكى نەكر دەين ل سەر بوو. ئەبو قەتادەى (خودێ ژێ رازی بیت) گۆت: يا پێغەمبەرێ خودآ.. نڤێژێ ل سەر بكە و دەينێ وى ل سەر من، ئينا پێغەمبەرى (سلاڤێت خودێ لێ بن) نڤێژ ل سەر كر. و كەفالەت دبيت د دەينيدا بيت يان كەفالەتا وى ب خۆ د كارەكيدا بكەت ئامادە بكەت بەرامبەر دادگەهێ هەرگاڤا خواستە هندێ. و هەكە ئێكى گۆت: ئەز كەفيل، دڤێت بزانيت ئەو بوو بەرپرس، و خودانێ مافى دێ ژ وى خوازيت ئەو وى مافى بگەهينيت و نابيت بێژيت من چو ژێ نينە مادەم بوويە كەفيل، و بۆ خودانێ مالى هەيە ئەو مالێ خۆ ژ دەيندارى ژى بخوازيت و ژ كەفيلي ژى بخوازيت چ ئێكسەر چ ژى ب رێكا دادگەهێ، و خودێ چێتر دزانيت.
