ب / دڤێت مرۆڤێ موسلمان هەمى كاروبارێت خۆ ژ دينێ خۆ وەرگريت ژ قورئان و سونەتێ، و نابيت ئەو ژ دەف خۆ تشتى بكەت و ژ ئيسلامێ بدانيت، و ئيسلام يا ژێ بەرى بيت، هەكە وەكر يێ گونەهكارە و دڤێت موسلمان خەمێ ژ كارێ خۆ بخۆت و خەمێ بدەتە پاقژيێ و خۆ ب سەروبەر بكەت نەخاسمە هەكە خودێ كەرم دگەل كربيت، و پێغەمبەرى (سلاڤێت خودێ لێ بن) ـ دەمێ ژ خەزايێ دزڤرينەڤە ـ دگۆتە هەڤالێت خۆ: خۆ ب سەروبەركەن و كارێ خۆ دورستكەن و تۆزكەيى نەزڤرنەڤە: (إِنَّكُمْ قَادمُونَ عَلى إِخْوانِكُمْ. فَأَصْلِحُوا رحَالَكمْ، وأَصْلحوا لبَاسَكُمْ حتى تَكُونُوا كَأَنَّكُمْ شَامَە في النَّاسِ، فَإِنَّ اللَّه لاَ يُحبُّ الفُحْشَ وَلاَ التَّفَحُش) ب راستى هوين دێ چنە دەف برايێت خۆ.. دەوارێت خۆ لێكدەن و جلكێت خۆ چێكەن و ب سەروبەركەن، و ببنە خال د ناف خەلكيدا ب راستى خودێ نە حەژ پويچيێ دكەت و نە كرنا پويچيێ.
و ئيسلام فەرمانا پاك و پاقژي و جوانى و جوانكاريێ ل مە دكەت، و ئەمرێ مە يێ هاتيەكرن ئەم رێزگرتنا پرچا خۆ بكەين و خەما هەژى ژێ بخۆين و قژەڤژ و قرێژى و بێ سەروبەر نەبەردەينە سەر ملێت خۆ، و هەروەكى د حەديسا دورستدا هاتى ئيسلام دبێژيتە مە: كاروبار و ئەحكام و فەرمانێت خودێ هەمي د جوانن و خودێ حەژ جوانيێ دكەت. ڤێجا پاقژكرن و جوانكرنا پرچێ ژ رێنما و ئاراستێت ئيسلامێيە، و هەركەسێ پرچەك هەبيت ل دويف رێنمايێت ئيسلامێ دڤێت دەست ژێ بەرنەدەت و خەمساريێ تێدا نەكەت و دەست ژێ بەرنەدەت. پێغەمبەر (سلاڤێت خودێ لێ بن) هەروەكى ئەبو داوود و حاكم ژ ئەبى هورەيرە (خودێ ژێ رازی بیت) ڤەدگوهێزن، دبێژيت: ((هەركەسێ پرچ هەبيت بلا قەدرێ وێ بگريت)). و د ريوايەتەكێدا گۆتێ: قەدرگرتنا وێ چاوايە؟ گۆت: ((هەرۆ شەكەت و دوهندەت)). و پێغەمبەرێ خودێ (سلاڤێت خودێ لێ بن) هندى هند گرنگى و خەمخۆرى ددا پرچى.. جارەكێ زەلامەكێ سەر و رهێت وى د قژەڤژ و نەشەكرى هاتە د مزگەفتێڤە، پێغەمبەرى (سلاڤێت خودێ لێ بن) ئيشارەت دايآ ئانكو دەركەڤە و ب ڤان سەر و رهێت قژەڤژڤە نەهێى دەف مە، تێگەهشت مەخسەدا پێغەمبەرى (سلاڤێت خودێ لێ بن) چيە، دەركەفت چۆ سەر و رهێت خۆ چێكرن و شەكرن و جوانكرن و زڤرى.. ئينا پێغەمبەرى (سلاڤێت خودێ لێ بن) دەستويريا وى دا و گۆت: ما ئەڤە چێتر نينە ئێك ژ هەوە بهێت سەر قژەڤژ دێ بێژى شەيتانە، هەروەكى پێغەمبەر (سلاڤێت خودێ لێ بن) ئيشارەتآ ددەتە ئايەتا قورئانآ ئەوا دارا زەقوومێ وەكى سەرێ شەيتانا وێنە دكەت ((طَلْعُهَا كَأَنَّهُ رُءُوسُ الشَّيَاطِينِ)) ﭼدارا زەقوومێ ئەوا خودێ كريە بەلا و نەخۆشى بۆ گاوران، ئەو دارا ژ بنێ دۆژەهێ دەردكەڤيت. فێقيێ وێ، هندێ كرێتە دێ بێژى سەرێت شەيتانانە. ديسا هاتيە ڤەگوهاستن ئەبو قەتادەيێ ئەنسارى (خودێ ژێ رازی بیت) گۆتە پێغەمبەرى (سلاڤێت خودێ لێ بن): يا پێغەمبەرێ خودێ.. من پرچەكێ هەى دگەهيتە سەر ملێت من، ئەز شەكەم؟ پێغەمبەرى (سلاڤێت خودێ لێ بن) گۆتێ: ((بەلێ شەكە و قەدرێ وى ژى بگرە)) ئانكو پاقژيا وى راگرە. جابر (خودێ ژێ رازی بیت) دبێژيت: پشتى هنگى ئەبو قەتادە رۆژێ دوو جار شەدكر و دون دكر. و سەروبەركرن و جوانكرن نە ژ مەزناتيێيە. پێغەمبەرآ خۆشتڤى (سلاڤێت خودێ لێ بن) د ڤەگێرا موسلميدا ژ ئبن مەسعودى (خودێ ژێ رازی بیت) دبێژيت: (لا يدْخُلُ الجَنَّة منْ كَانَ في قَلْبِهِ مِثقَالُ ذرَّة مِنْ كِبْرٍ، » فَقَالَ رَجُلٌ: إنَّ الرَّجُلَ يُحِبُّ أنْ يكُونَ ثوْبُهُ حَسناً، ونَعْلُهُ حَسَنَە، فقال: « إنَّ اللَّه جَمِيلٌ يُحِبُّ الجَمَال، الكِبْرُ بَطرُ الحَقِّ، وغَمْط النَّاسِ) هەركەسێ تەمەت گرانيا پرتا ژ هەميان بچويكتر ژ مەزناتيێ د دلێ ويدا هەبيت ناچيتە بەحەشتێ، زەلامەكى گۆت: ب راستى مرۆڤى دڤێت جلكێ وى يێ جوان بيت و پێلاڤا وى يا جوان بيت، گۆت: ب راستى خودێ يێ جوانە و كاروبارێت وى هەمى د جوانن و حەژ جوانيێ دكەت، مەزناتى نەوەرگرتن و زڤراندنا راستيێيە و كێمكرنا خەلكيە.
و ب راستى يێ خودێ كەرم دگەل كر دڤێت ئەڤە ل سەر وى يا ئاشكرابيت. د ڤەگێرا ترمزيدا هاتيە.. پێغەمبەر (سلاڤێت خودێ لێ بن) دبێژيت: (إِن اللَّه يُحِبُّ أَنْ يُرى أَثرُ نِعْمَتِهِ عَلى عبْده) ب راستى خودێ حەز دكەت نيشانا نيعمەتا خۆ ل سەر بەندەيێ خۆ ببينيت. و د ڤەگێرا نەسائى و ئەبو داووددا هاتيە ئەبو ئەحوەس ژ بابآ خۆ ڤەدگێريت دبێژيت: (أَتَيْتُ النبي (سلاڤێت خودێ لێ بن) في ثوْبٍ دُونٍ فقال أَلَكَ مَالٌ قال نعم قال من أَيِّ الْمَالِ قال قد آتَانِي الله من الْإِبِلِ وَالْغَنَمِ وَالْخَيْلِ وَالرَّقِيقِ قال فإژا أتاك الله مَالًا فَلْيُرَ أَثرُ نِعْمَە اللَّهِ عَلَيْكَ وَكَرَامَتِهِ) دبێژيت: ئەز ب كراسەكێ نەيێ وەسا هاتمە دەف پێغەمبەرى (سلاڤێت خودێ لێ بن)، ئينا گۆت: ((ئەرێ تە مال هەيە))؟! گۆتێ: بەلێ، گۆت: ((ژ كيژ مالى))؟ گۆتێ: خودێ ژ حێشترا و پەزى و هەسپان و بەندەيان يێ دايە من، گۆت: ((هەكە خودێ مال دابيتە تە، بلا نيشانا نيعمەتا و كەرەما خۆ ل سەر تە ببينيت))، و خودێ چێتر دزانيت.
