ب / ب راستى وەقف ئێك ژ وان بابەتانە دبيتە جهێ شانازيێ د ئيسلامێدا و دەرگەهەكێ هەرە مەزنە بۆ هاريكاريێ و يێ بەردەوام، و وەقف يا كەڤنە، ژ پێغەمبەرى (سلاڤێت خودێ لێ بن) دەست پێ دكەت و دويفرا سەحابان وەقفەكا مەزن ياكرى و دويفرا هندى هەستێ دينێ يێ ب هێز وەقف يا ب هێز و گەش بوو، و پشتى هەستێ دينى لاواز بووى وەقفكرن ژى دگەل لاواز بوو، چونكى تشتێ مرۆڤى پالدەت و وەلێ بكەت دلێ وى بگريت مالێ خۆ بكەتە وەقف ديندارى و ئيمان و باوەريە، هەكە ئەڤە لاوازبوون تشتەكێ ئاساييە وەقف ژى لاواز ببيت يان نەمينيت. و وەقف ئەوە ئەم بنياتى بۆ خودێ ئاسێ بكەين و بەرهەمێ وى بكەينە خێر، وەكى: ئێك خانيێ خۆ بكەتە وەقف بۆ هەژاران، ئەڤ خانيە هاتە ئاسێكرن و نابيت بێتە فرۆتن و بەرهەمێ ژ خانى دهێت هەتا هەتا دێ بۆ هەژاران هێتە مەزخاندن. و وەقف ژ وان رێكانە يێت كار و كريارێت خێرآ بۆ خودانێ خۆ پشتى مرنا وى بەردەوام دكەت، پێغەمبەرێ خۆشتڤى (سلاڤێت خودێ لێ بن) هەروەكى موسلم (خودێ ژێ رازی بیت) ژ ئبن عومەرى (خودێ ژێ رازی بیت) ڤەدگێريت، دبێژيت: (إذا مَاتَ الإنسَانُ انقطعَ عمَلُهُ إلاَّ مِنْ ثلاث: صَدقَة جارية، أوْ عِلم يُنْتَفَعُ بِهِ، أَوْ وَلَدٍ صَالحٍ يدعُو له). هەكە مرۆڤ مر كار و كريارێت وى دهێنە برين سێ تێ نەبن: سەدەقەكا بەردەوام (ئانكو وەقف) يان زانينەكا مفادار يان كورەكآ باش هەبيت دوعا بۆ بكەت.
ڤێجا فەرە ل سەر زەنگينا بەرى بمرن و چو دگەل خۆ نەبن چەند بهۆستەكێت جانگى نەبن و ئەو ژى دبيت ژ مالێ وى نەبن مالێ پيرەژنەكێ بن بۆ خێرا خۆ ئەو جانگ دانابيتە مزگەفتێ لەزێ بكەن كارەكێ وەسا بكەن خێرا وان پشتى مرنا وان نەهێتە برين و وەقفەكێ دامەزرينن بەرى بمرن، كى دبێژيت دويندەها وى دێ خێر و خێراتا دويفرا فرێكەن! بەلكى كى دبێژيت دێ دويندەها وى باشيێ و خێرێ ب مالێ وى كەن و خرابيێ پێ ناكەن، ڤێجا يێ ب ژير و تێگەهشتى و عاقل ئەوە يێ هزرا دويماهى و پاشەرۆژ و چارەنڤيسێ خۆ بكەت و ب دەستێت خۆ بۆ خۆ خێران بكەت بەرى بۆ ژيانا دى بێتە ڤەگوهاستن و بەرى پەشێمان ببيت و بێژيت: ((وَأَنفِقُوا مِن مَّا رَزَقْنَاكُم مِّن قَبْلِ أَن يَأْتِيَ أَحَدَكُمُ الْمَوْتُ فَيَقُولَ رَبِّ لَوْلَا أَخَّرْتَنِي إِلَىٰ أَجَلٍ قَرِيبٍ فَأَصَّدَّقَ وَأَكُن مِّنَ الصَّالِحِينَ))(( وَلَن يُؤَخِّرَ اللَّهُ نَفْسًا إِذَا جَاءَ أَجَلُهَا وَاللَّهُ خَبِيرٌ بِمَا تَعْمَلُونَ)) گەلى خودان باوەران بلا مال و زارۆكێت هەوە، هەوە مژويل نەكەن و بيرئينان و پەرستنا خودێ ژ بيرا هەوە نەبەن، و هەركەسێ ڤێ بكەت ئەو يێ خوسارەتە. و ژ رزقێ مە دايە هەوە بمەزێخن و بدەن، بەرى مرنا ئێك ژ هەوە بێت و بێژيت: خودێ وۆ بلا تە مرنا من پيچەكێ پاش ئێخستبايە، دا من خێر كربانە و ئەز ژ قەنجيكاران بامە. و چوجا خودێ مرنا كەسێ گيرۆ ناكەت و پاش نائێخيت، ئەگەر وەختێ مرنا وى هات، و چ يا هوين بكەن خودێ پێ ئاگەهە، و خودێ چێتر دزانيت.
