ب / جمهورێ زانايان دورست ناكەن ميراتگرى د ناڤبەرا دوين جداياندا هەبيت و نەيێ موسلمان دبيتە ميراتگرێ گاورى و نە يێ گاور دبيتە ميراتگرێ موسلمانى. بەلگەيێ ئەو پشتبەستنێ بۆ دكەن ڤەگێرا بوخارى و موسلميە پێغەمبەر (سلاڤێت خودێ لێ بن) دبێژيت: (لا يرث المسلم الكافر، ولا الكافر المسلم) نە موسلمان ميراتگريا گاورى دكەت و نە گاور ميراتگريا موسلمانى دكەت، بەلێ ئەڤە نەجهێ ئێك بۆچۆنێيە، گەلەك زانا دگەل هندێنە موسلمان دبيتە ميراتگرێ گاورى و نە بەروڤاژى و ئەڤ بۆچۆنە يا ژ ڤان هاتيە ڤەگوهاستن (معاذ بن جبل، ومعاوية بن أبي سفيان، ومحمد بن الحنفية، ومحمد بن علي بن الحسين، وسعيد بن المسيب، ومسروق بن الأجدع، وعبد الله بن مغفل، ويحيى بن يعمر، وإسحاق بن راهوية) هەروەكى ئبن قەيم (خودێ ژێ رازی بیت) ژ وان ڤەگوهاستى، و ئبن تەيميە و ئبن قەيم هەردوو ڤێ بۆچۆنێ دورستتر ددانن. و حەديسا بۆرى ب ڤى رەنگى راڤە دكەن، دبێژن: مەخسەد پێ گاورێ شەركەر نە هەرگاورەكێ هەبيت، و بەلگەيێت دى يێت پشتبەستنێ بۆ دكەن قياسە ل سەر دورستيا موسلمان كچا گاور مەهركەت يان ئەهل كيتاب و بۆ وان نەدورستە ئەو يا موسلمان مارەبكەن و ديسا دورستە يێ گاور مالێ خۆ هەميێ بۆ موسلمانى بكەتە وەسيەت هەكە وەسيەت دورستە بۆچى ميراتگرى نەدورستە، ديسا ئەوێت مونافق وەكى ئبن سەلول و يێت وەكى وى يێت ئاشكرا پشتى مرين پێغەمبەرى (سلاڤێت خودێ لێ بن) نەگۆتە ميراتگرێت وان نابيت هوين ببنە ميراتگرێت وان. و پسيار ژ مەعازێ كورآ جەبەلى (خودێ ژێ رازی بیت) هاتەكرن چاوا موسلمانى دكەتە ميراتگرێ گاورى گۆت پێغەمبەر (سلاڤێت خودێ لێ بن) دبێژيت: (الإسلام يزيد ولا ينقص) ئانكو موسلمانبوون ل مرۆڤى زێدە دكەت و ل مرۆڤى كێم ناكەت. و زانايێ ناڤدار قەرزاوى ڤێ بۆچۆنێ دورستتر دبينيت و دبێژيت: و دبيت ڤێ حەديسێ ژى بەلگە بۆ ڤێ چەندێ بينين (الإسلام يعلو ولا يُعلى عليه) ئيسلام بلند دبيت و ل سەر بلند نابيت، و خودێ چێتر دزانيت.
