ب : ئه‌ڤه جهێ ئیختلافێیه د ناڤبه‌را زانایاندا، ئبن عه‌ره‌بی خودێ ژێ رازی بیت دبێژیت: بیرا وی نه ئینه و دوعا بۆ نه‌كه؛ چونكی دوو كه‌س ل ده‌ڤ پێغه‌مبه‌ری سلاڤێت خودێ ل سه‌ربن بێهنژین ئێك ژ وان گۆت: الحمد لله ویێ دی نه گۆت: پێغه‌مبه‌ری سلاڤێت خودێ ل سه‌ربن یێ حه‌مدا خودێ كری، گۆتێ: یرحمك الله، و نه‌گۆته یێ دی یێ حه‌مدا خودێ نه‌كری، و بیرا وی ژی نه ئینا، و نه گوتێ بێژه: الحمد لله، و ئبن عه‌ره‌بی خودێ ژێ رازی بیت دبێژیت: هه‌كه یا باشتر ئه‌وبا بیرا وی ب حه‌مدا خودێ ئینابا؛ دا پێغه‌مبه‌ر سلاڤێت خودێ ل سه‌ربن بیرا وی ئینیت، و بیرئینانا وی نه دهێلا، و زانایێ ناڤدار ئیمامێ نه‌وه‌وی خودێ ژێ رازی بیت دبێژیت: یاشتر ئه‌وه بیرا وی بینی؛ چونكی دین شیره‌ته، و ئه‌ڤه ژ بابه‌تی ئه‌مركرنییه ب باشیێ و هاریكرنه ل سه‌ر باشیێ، و ب راستی ئه‌ز ڤێ بوچونێ دورستتر ددانم نه‌خاسمه خودایێ مه‌زن دبێژیته مه (وذكر فإن الذكرى تنفع المؤمنين) و دبیت پێغه‌مبه‌ری سلاڤێت خودێ ل سه‌ربن بیرئینانا وی نه‌ینا؛ دا بو مه دیاركه‌ت، یێ حه‌مدا خودێ نه‌كه‌ت، ماف نینه بێژنێ یرحمك الله، و پشتی ڤێ هه‌میێ دبیت نه‌زانیت، ژ به‌رهندێ حه‌مدا خودێ نه‌كریه، هنگی دڤێت ئه‌م فێركه‌ین و نیشابده‌ین، وئه‌ڤه واجبه ئه‌م نه‌زانی فێركه‌ین، و بیرئینانا مه بو وی یان دێ بیته فێربوون یان بیرئینان و هه‌ردوو كارێت باشن و خودێ چێتر دزانیت.
