ب : ئه‌ڤ كاره ب ئنیه‌تا ویڤه یا گرێداییه، هه‌كه مه‌به‌ست ژێ خۆ مه‌زنكرن بیت یان كێمكرنا وان یێت ئاماده، یان كێمكرنا وان یێت هه‌ڤبسور ل گه‌ل، هنگی گونه‌هه و نه دورسته و نابیت مرۆڤ مه‌دحێت خۆ بكه‌ت خودایێ مه‌زن دبێژیت: (فَلاَ تُزَكُّواْ أَنفُسَكُمْ هُوَ أَعْلَمُ بِمَنِ اتَّقَى) و دیسا دبێژیت: (بل الله يزكي من يشاء ولا يظلمون فتيلا) و ئه‌گه‌ر مه‌به‌ست پێ دا باوه‌ریا ئامه‌ده‌بوویان پێ بهێت و ئاخفتنا وی وه‌رگرن و پتر بێته قه‌بویلكرن و گرنگیێ ب ده‌نه ئاخفتنێ یان دا ب ڤێ گۆتنێ بێته نیاسین، دورسته و چو تێدا نینه خودایێ مه‌زن دبێژیت: (وَأَمَّا بِنِعْمَةِ رَبِّكَ فَحَدِّثْ) و یوسف سلاڤ ل سه‌ر بن دراستا خۆدا گۆت: (اجْعَلْنِى عَلَى خَزَائِنِ الاْرْضِ إِنّى حَفِيظٌ عَلِيمٌ) و ئه‌ڤه نه‌بو مه‌دحێ بوو به‌لكی بو دیاره‌كرنا راستیێ بوو، و یێ پێكهاتن ل گه‌ل موسای سلاڤێت خودێ ل سه‌ربن كری هه‌شت سالان بۆ بچیته به‌ر په‌زی به‌رامبه‌ر ئه‌و كچه‌كا خۆ لێ ماره‌بكه‌ت دا موسایی پشتراستبكه‌ت گۆتێ : (ستجدني إن شاء الله من الصالحين) و د بوخاریێدا هاتیه ده‌مێ عوثمان خودێ ژێ رازیبیت هاتیه دورپێچكرن گۆته وان ئه‌ز هه‌وه ب خودێ دده‌مه سوندێ و ئه‌ز به‌س هه‌ڤالێت پێغه‌مبه‌ری تنێ سلاڤێت خودێ ل سه‌ربن دده‌مه سوندێ ما هوین نزانن پێغه‌مبه‌ری سلاڤێت خودێ ل سه‌ربن گۆت: یێ بیرا رومه بكولیت به‌حه‌شت بۆ وییه و من كولا، ما هوین نزانن پێغه‌مبه‌ری سلاڤێت خودێ ل سه‌ربن گۆت: یێ كارێ له‌شكه‌رێ عوسره بكه‌ت به‌حه‌شت بۆ وییه و من كاركرن، گۆتنێ تۆ راست دبێژی، به‌لێ ئه‌ڤه نه ژ بابه‌تێ مه‌دحه‌كرنێیه و دیسا ئبن مه‌سعود خودێ ژێ رازی بیت، دبێژیت: ئه‌ز ب خودێ كه‌مه من حه‌فتێ و تشته‌ك سوره‌ت ژ ده‌ڤێ پێغه‌مبه‌ری سلاڤێت خودێ ل سه‌ربن یێت وه‌رگرتین، و ئه‌ز ب خودێ كه‌م هه‌ڤالێت پێغه‌مبه‌ری سلاڤێت خودێ ل سه‌ربن دزانن ئه‌ز ژ وان هه‌میان دقورئانێدا زاناترم، و ئه‌ز نه ژ وان هه‌میان چێترم، و هه‌كه من زانیبا ئێك هه‌یه ژ من زاناتر دا قه‌ستا وی كه‌م، ڤێجا مه‌دحه‌كرن هه‌كه راستی بن و نه دره‌وبن دمینه ل سه‌ر ئنیه‌تا خودانێ خۆ دڤان جهاندا له‌وا پێغه‌مبه‌ر سلاڤێت خودێ ل سه‌ربن دبێژیت: (انما الاعمال بالنیات وانما لكل أمرئ ما نوی) هه‌می كار وكریار ب ئینه‌تانه و هه‌ر ئێكێ دێ ئه‌و بو وی بیت یا كریه ئنیه‌ت و ئنیه‌ت بۆ ئینای و خودێ چێتر دزانیت.
