بەرسڤێت شەرعى ل دۆر پرسێت جودا جودا

ب : سوجدا شوكرێ سونه‌ته‌ و ئێك ژ وان سونه‌تیت ژبیركریه‌ و سوجده‌ دهێته‌ برن بۆ وێ خێرا نوی بۆ مرۆڤی دورست دبیت، نه‌یا به‌رده‌وام چونكی نیعمه‌ت و كه‌رمێت خودێ یێت به‌رده‌وامن مرۆڤ هه‌ر ب سوجداڤه ‌نابیت به‌لێ ئه‌ڤا نوی دورستبوی سونه‌ته‌ مرۆڤ بۆ بچیته‌ سوجدێ بو نمونه‌ نه‌ساخێ مرۆڤی راببیته‌ ڤه‌ یان ب سلامه‌تی ژ نه‌شته‌رگه‌ریێ ده‌ركه‌ڤیت یان ئێك هنده‌ مرۆڤا فرێكه‌ت بۆ خازگینیێ و دویف دلێ وی بهێت، هنگی سونه‌ته‌ ب چیته‌ سوجدا شوكرێ، چونكی ئه‌بی به‌كره‌ته‌ خودێ ژێ رازی بیت دراستا پێغه‌مبه‌ریدا سلاڤێت خودێ ل سه‌ربن دبێژیت: (كان إذا جَاءَهُ أَمْرُ سُرُورٍ أو بُشِّرَ بِهِ خَرَّ سَاجِدًا شَاكِرًا لِلَّهِ) هه‌‌ر گاڤا كاره‌كێ دلخوشیێ یان مزگینیێ بۆ پێغه‌مبه‌ری سلاڤێت خودێ ل سه‌ربن هاتبا سوجدا شوكرێ دبر. ئه‌رێ مه‌رج هه‌نه‌ ئانكو دڤێت یێ ب چیت سوجدا شوكرێ یێ پاك و پاقژ و ب ده‌ستڤێژ بیت و به‌رێ خۆ بده‌ته‌ قیبله‌یێ هه‌تا سوجدا وی یا دورست بیت؟ ئه‌ڤه‌ جهێ جودابونێیه‌ دناڤبه‌را زانایاندا ل سه‌ر دوو بوچونان، بوچونا ئێكی: سوجدا شوكرێ وه‌كی سونه‌تانه‌ كا سونه‌تێ چ مه‌رجێت خۆ هه‌نه‌ سوجدا شوكرێ ژێ ئه‌و مه‌رج بۆ یێت هه‌ین، و ئه‌ڤه‌ بوچونا شافعیانه‌ و پتریا حه‌نبه‌لیان و هنده‌ك حه‌نه‌فیان و هنده‌ك مالكیان. و بوچونا دوویێ: سوجدا شوكرێ مه‌رج نین و قیاسا وێ ل سه‌ر نڤێژێ ناهێته‌كرن و دورسته‌ بێ ده‌ستنڤێژ سوجدا شوكرێ بێته‌برن و مه‌رج نینه‌ به‌رێ ته‌ ل قیبلێ بیت به‌لێ بۆ راستا قیبلێ باشتره‌ هه‌كه‌ ده‌ست بده‌ت، و هه‌كه‌ ده‌ست نه‌ده‌ت بۆ هه‌رجهه‌كێ هه‌بیت دورسته، و ئه‌ڤه‌ بوچونا گه‌له‌ك زانایانه‌ و ژێگرتنا هنده‌ك مالكیانه‌ و ژێگرتنا گه‌له‌ك زانایێت تویژینه‌رن (محقق) وه‌كی ته‌به‌ری و ئبن حه‌زم و ئبن ته‌یمییه‌ و ئبن قه‌ییم و شه‌وكانی و صه‌نعانی و ئه‌ڤ بوچونه‌ ب هێزتره‌ چونكی پێغه‌مبه‌ری سلاڤێت خودێ ل سه‌ربن سوجدا شوكرێ دبر و هه‌كه‌ ئه‌و مه‌رج بو ڤیابانه‌ دا بیژیت بو مه‌ ئاشكراكه‌ت و پشتی ڤێ فه‌ره‌ ئه‌م ڤان تێبینیان ل دور سوجدا شوكرێ ب زانین: ئێك: سوجدا شوكرێ‌ سونه‌ته‌ بۆ هه‌ر كه‌ره‌مه‌كا نوی دورست دبیت و باشه‌ ئه‌م بۆ كه‌رم و خوشیێت نوی بچینه‌ سوجدا شوكرێ و ڤێ سونه‌تێ ساخكه‌ین و نه‌هێلین ژبیركری. دوو: ده‌ستنڤێژ و مه‌رجێت نڤێژێ نه‌ مه‌رجن‌ بۆ سوجدا شوكرێ. سێ: باشتره‌ ئه‌وه‌ به‌رێ خۆ بده‌ینه‌ قیبلێ، و هه‌كه‌ ده‌ستنه‌دا بۆ هه‌ر جهه‌كێ هه‌بیت دورسته‌. چار: باشه‌ ده‌مێ خه‌به‌رێ دلخوش و مزگینیێ گه‌هشته‌ مه‌ ئێك سه‌ر بچینه‌ سوجدێ به‌لێ هه‌كه‌ ده‌ست نه‌دا و جھ نه‌بوو دورسته‌ پشتی هنگی ب ده‌مه‌كێ ب چینه‌ سوجدا شوكرێ. پێنج: سوجدا شوكرێ ئێك جاره‌ و ته‌حیات و سلاڤا ملان بو نینه‌. شه‌ش: دویف بوچونا دورست ته‌كبیر بو نینه‌ به‌لێ هه‌كه‌ ته‌كبیر ئینا چ نینه‌. حه‌فت: سوجدا شوكرێ بۆ خنێك و خوشیا تایبه‌ت و گشتی دهێته‌برن. هه‌شت: چ زكرێت تایبه‌ت تیدا نا هێنه‌ گۆتن هه‌ر زكره‌كێ هه‌بیت دورسته‌ یا باش مرۆڤ شوكرا خودێ تێدا بكه‌ت. نه‌ھ: سوجدا شوكرێ بۆ یێ دسه‌یارێدا ژی دورسته‌ هه‌كه‌ مزگینیا خێرێ بۆ هات ئه‌و ژی دێ ب ئیشاره‌تێ چیته‌ سوجدێ.