ب : راسته گه‌له‌ك جاران مه گولێ دبیت گه‌له‌ك كه‌س په‌سنا خۆ ب دینداریێ دكه‌ن، و دبێژن ئه‌م گه‌له‌كێت دیندارین، و كه‌س وه‌كی مه یێ دیندار نینه، و هه‌كه كچه به‌رێ خۆ بدێ بنه‌مایێت وێ یێت ژیانێ نه، ژ ئیسلامێ یێت جودانه، و جلك و سه‌رو به‌رێ وێ نه یێ دورسته و خۆ ژ تێكلی و تێكه‌لوكا نه‌دورست نا ده‌ته پاش، و سه‌رو به‌رێ وێ نه ئه‌وه یێ خودێ و پێغه‌مبه‌رێ وێ سلاڤێت خودێ ل سه‌ربن، پێ خوش و رازی، و هه‌كه كوره هه‌ر وه‌كی وێ، و هه‌كه فه‌رامنبه‌ر و بازرگان و كاسبكاره، به‌رێ خۆ بدێ هه‌ر یێ وه‌سایه شه‌رعیت و دین و ئیسلامن وی رێڤه نابه‌ن و ئاراسته ناكه‌ن، و چ بهایی د سه‌ره‌ده‌ریا خۆدا نا ده‌ته حه‌لال و حه‌رام و ده‌رست و نه دورستی و سنج و ره‌وشت و بها به‌رزان، و نه یێ بنه‌جھـ و خۆ راگرتیه، هه‌ر بایه‌كێ بهێت وه‌سا دچیت، دێ بێژی یێ ل سه‌ر بێده‌رێ كا چاوا با بهێت وه‌سا دزڤریت، ئه‌ڤرۆ ئه‌ڤ ره‌نگه‌یه، و سوبه‌هێ دوو ره‌نگ و سێ ره‌نگێت دییه، و بهای نا ده‌ته شه‌نگست و بنه‌مایان، و سه‌ركێشێ وی مفا و قازانج و به‌رژوه‌ندن، د حه‌لال و دورست بن یان د حه‌رام و نه دورستبن ئه‌ڤه ل ده‌ف وی نه هندا گرنگه، پیڤه‌ر و ترازی و عه‌لبا وی نه دین و دیندارییه، و ل گه‌ل هندێ ژی دبێژیت: ئه‌ز گه‌له‌كێ دیندارم، و كه‌س ژ من دیندارتر نینه، هزردكه‌ت دینداری به‌س نڤێژ و رۆژینه و هه‌ر هند، وه‌كی دی چ بكه‌ت چ نینه! و چاوا سه‌ره‌دریێ بكه‌ت چ گرنگیا خۆ نینه، و چ كار بكه‌ته به‌ر خۆ دێ وێ كه‌ت، ب دلێ خۆیه، و چ سنج ره‌وشت بگریت دێ وێ كه‌ت، ئها ئه‌ڤ نامیلكه به‌رسڤه ئه‌م بزانین دینداری و دیندارێ دورست كییه؟ و كی د گۆتنا خۆدا یێ راسته ده‌مێ دبێژیت ئه‌ز یێ دیندارم؟ هیڤیا من ئه‌وه خودێ مه دینداربكه‌ت، به‌لێ یێت راست و دورست، و هه‌تا ئه‌م دگۆتنا خۆدا یێت راست و دورست بین دڤێت ئه‌ڤ كار و بنه‌مایه ل ده‌ف مه هه‌بن، یێ ل ده‌ف هه‌بن بلا مزگینی بۆ وی بیت و دلخوش بیت، ئه‌و دینداره و ئه‌ڤ دینداریه دێ وی د دنایێدا سه‌رفه‌رازكه‌ت و د ئاخره‌تێدا دێ وی روی سپی و سه‌رفه‌رازكه‌ت، ئه‌و ژی ئه‌ڤه‌نه:
بنه‌مایێ ئێكێ: باوه‌ریه‌كا راست و دورست و ساخله‌م هه‌بیت.
بنه‌مایێ دوویێ: تێگه‌هشتنه‌كا راست و دورست و ساخله‌م بۆ ئیسلامێ هه‌بیت و دینی ته‌ڤگر وه‌رگریت و پارچه پارچه‌نه‌كه‌ت.
بنه‌مایێ سێیێ: ژ ئێشێت دەروونی و جڤاکی یێت ئاشکرا و یێت نه ئاشکرا یێ ساخله‌م بیت.
بنه‌مایێ چارێ: سنج و ره‌وشتێ وی ژ ئیسلامێ نه ده‌ركه‌ڤیت.
بنه‌مایێ پێنجێ: كه‌ساتیا خۆ یا ئیسلامییا تایبه‌ت هه‌بیت و پارێزیێ لێ بكه‌ت.
بنه‌مایێ شه‌شێ: حه‌ژ موسلمانان بكه‌ت و هاریكاری و پشته‌ڤانیا وان بكه‌ت.
بنه‌مایێ حه‌فتێ: خه‌ما به‌لاڤكرنا دینێ خۆ بخۆت و پشتگری و پشته‌ڤانیا دینی بكه‌ت و ب سه‌ر بێخیت.
یێ ئه‌ڤ حه‌فت بنه‌مایه ب دورستی ل ده‌ڤ هه‌بن بلا دلخوش بیت و ل سه‌رهندێ بمینیت و خۆ راگریت ئه‌و دینداره‌كێ دورسته، ب ئانه‌هیا خودێ و ئه‌ڤ په‌رێت بهێن دێ رونكرنه‌كێ بۆ ڤان حه‌فتت خالێت دبنه بنه‌تارێ دینداریێ، هیڤیا من ژ خودێ ئه‌وه خودێ هاریكارێ مه بیت و مه دینداركه‌ت و ژ مه‌قه‌بیلكه‌ت و ڤان خالان ل ده‌ف مه په‌یداكه‌ت و مه ل سه‌ر راكه‌ت.
