ب / وێنه‌يێت ده‌ستى ژ وێنه‌يێت فوتوگرافى د جودانه، و هه‌رئێكێ حوكمێ خۆ يێ هه‌ى، وێنه‌يێت فوتوگرافى دويف بۆچۆنا گه‌له‌ك زانايێت سه‌رده‌م و خودان سه‌نگ، دورستن، ژ وان: زانايێ ناڤدار قه‌رزاوى و بن عسێمين و صالح لحێدان و عه‌بدلره‌حمان عه‌بدلخالق و مفتيێ مسرێ و گه‌له‌كێت دى. و حه‌ديسا پێغه‌مبه‌رێ خۆشتڤى (سلاڤێت خودێ لێ بن) (إِنَّ أَشَدَّ الناس عَذابًا عِنْدَ اللَّهِ يوم الْقِيامَة الْمُصَوِّرُونَ) ژ وێنێت فوتوگرافى ناگريت، چونكى ئه‌و وێنه‌يا چێناكه‌ن، و مسه‌وور ئه‌وه يێ وێنه‌ى چێدكه‌ت، و د وێنێ فوتوگرافيدا وێنه يێ هه‌ى و يێ حه‌قيقيه و دهێته عه‌كسكرن و پارازتن نه‌كو دهێته چێكرن هه‌تا بكه‌ڤيته بن حوكمێ حه‌ديسا بۆرى و ژێ بگريت، به‌لێ ئه‌ڤه هندێ ناگه‌هينيت وێنه‌يێت فوتوگرافى يێت مرۆڤان ل سه‌ر ره‌وشه‌كا نه‌يا گونجاي دگه‌ل سنج و ئه‌خلاقان بێنه‌گرتن يان وێنه‌يێت ژنان رويس يان نيڤ رويس بێنه‌گرتن يان مرۆڤ وێنه‌يێت زارڤه‌كه‌ر و سترانبێژ و هونه‌رمه‌ندان ئه‌وێت دوير ژ سنج و ئه‌خلاقان بگريت، ب راستى ئه‌ڤه نه‌يا دورسته كورت و ئاشكرا هه‌تا وێنه‌يێ فوتوگرافى يێ دورست بيت، دڤێت ل سه‌ر ره‌وشه‌كا دورست بيت، ئه‌ڤ وێنێ ده‌ستى هه‌كه يێ سروشتى بيت يێ دار و به‌ران و گل و گياى و دار و باران و رويبار و چيايان بيت، دورسته و چو تێدا نينه.. به‌لێ هه‌كه يێ خودان روحان بيت، ئانكو يێ مرۆڤ و جانه‌وه‌ران بيت ل ده‌ف باراپتر ژ زانايان نه‌دورسته و حه‌رامه، له‌وا ئه‌ز ڤى گه‌نجى و ئه‌وێت به‌هره‌مه‌ند و شاره‌زا د چێكرنا وێنه‌ياندا شيره‌تدكه‌م بلا وێنه‌يێت خودان روحان چێنه‌كه‌ن، و هه‌كه هه‌ر چێكرن ژى بلا يێ كێم بيت نه‌يێ تمام بيت، ب ره‌نگه‌كێ وه‌سا مرۆڤ بێژيت كه‌س هۆسا ب ڤێ كێماسيێڤه ناژيت و بلا د تمام نه‌بن، به‌لێ چێكرنا وێنه‌يێت سروشتى دورسته و چو تێدا نينه، و خودێ چێتر دزانيت.
