ب / ده‌ستپێكێ هه‌ژيه بێژين ئه‌ڤ حه‌ديسا ئيشاره‌ت پێ كرى يا دورسته و سه‌حيحه، و يا د بوخارى و موسلمێدا هاتي، به‌لى هه‌روه‌كى زانايێ ناڤدار خه‌تابى دبێژيت: مه‌خسه‌د ئه‌و سه‌يه يێ نه‌دورست مرۆڤ خودان بكه‌ت.. مه‌خسد پێ سه‌يێ نێچيرێ و زێره‌ڤانيێ نينه. و وێنه ئه‌و وێنه‌يآ حه‌رام و نه‌دورسته و ئه‌ز نابينم وێنه‌يێت فوتوگرافى بكه‌ڤنه بنڤه، چونكى د ريوايه‌ته‌كا بوخاريدا هاتيه: (عن عَبَّاسٍ رضي الله عنهما قال أخبرني أبو طلْحَة رضي الله عنه صَاحِبُ رسول اللَّهِ (سلاڤێت خودێ لێ بن) وكان قد شَهِدَ بَدْرًا مع رسول اللَّهِ (سلاڤێت خودێ لێ بن) أَنَّهُ قال لَا تَدْخُلُ الْمَلَائِكَة بَيْتًا فيه كَلْبٌ ولا صُورَة يُرِيدُ صورة التَّمَاثيلَ التي فيها الْأَرْوَاحُ) به‌رێ خۆ بدێ ڤه‌گێرێ حه‌ديسێ كو ئێك ژ هه‌ڤالێت پێغه‌مبه‌رێ خۆشتڤيه (سلاڤێت خودێ لێ بن) ئه‌وێت پشكدارى دگه‌ل پێغه‌مبه‌رى (سلاڤێت خودێ لێ بن) د به‌درێداكرى دبێژيت: مه‌خسه‌د ژ وێنه‌ى ئه‌وه په‌يكه‌ر و يێت حه‌رام، و حوكمێ هه‌لاويستنا وێنه‌يان هه‌كه نه‌ئه‌و بيت يێ مرۆڤێت گونه‌هكار و خرابكار وه‌كى هنده سترانبێژ و هنده هونه‌رمه‌ندان ئه‌وێت ب خرابيێ به‌رنياس و نه ب ئنيه‌تا ته‌عزيم و مه‌زنكرن و مه‌زن راگرتنێ بيت چو تێدا نينه و دورسته ب وى مه‌رجێ به‌رى نوكه مه گۆتى و ژ تخويبان ژى نه‌ده‌ركه‌ڤيت.
و فه‌ره ئه‌م بزانين كا ئه‌و كيژ ملياكه‌تن ناچنه د وان ژۆرانڤه يان خانيانڤه ئه‌وێت ئه‌ڤ ره‌نگێ سا و وێنه‌يان تێڤه ئه‌و نه ئه‌و ملياكه‌تن ئه‌وێت كار و كريارێت مرۆڤان دنڤێسن.. ئه‌و چوجا مرۆڤى ناهێلن و هه‌ر يێت دگه‌ل مه ئه‌م ل كيرآ بين و چ جهێ بين و هه‌ر كارآ بكه‌ين و بێژين دنڤێسن ((إِذْ يَتَلَقَّى الْمُتَلَقِّيَانِ عَنِ الْيَمِينِ وَعَنِ الشِّمَالِ قَعِيدٌ ))(( مَّا يَلْفِظُ مِن قَوْلٍ إِلَّا لَدَيْهِ رَقِيبٌ عَتِيدٌ )) ئانكو: و مرۆڤ چو ئاخفتنان ناكه‌ت چ باش چ خراب، و ملياكه‌ته‌كێ كاركرى و زێره‌ڤانێ دگه‌ل، نه‌نڤێسيت. يان ده‌مێ دبێژيت: ((أَمْ يَحْسَبُونَ أَنَّا لَا نَسْمَعُ سِرَّهُمْ وَنَجْوَاهُم بَلَىٰ وَرُسُلُنَا لَدَيْهِمْ يَكْتُبُونَ)) ئانكو: يان ژى ئه‌و هزر دكه‌ن مه گول نهێنى و پسته‌پستا وان نينه ئه‌وا ئه‌و دكه‌ن، به‌لێ مه گولێ هه‌يه، و ملياكه‌تێت مه ئه‌وێت ل ده‌ف وان هه‌ميێ دنڤێسن. يان ده‌مێ دبێژيت: ((هَٰذَا كِتَابُنَا يَنطِقُ عَلَيْكُم بِالْحَقِّ إِنَّا كُنَّا نَسْتَنسِخُ مَا كُنتُمْ تَعْمَلُونَ)) ئانكو: ئه‌ڤه كتێبا مه‌يه ـ كتێبا كار و كريارێت هه‌وه‌يه ـ شاده‌ييێ ب راستى ل سه‌ر هه‌وه دده‌ت، ب راستى هندى هه‌وه دكر مه دنڤێسى. يان ده‌مێ دبێژيت: ((وَكُلَّ إِنسَانٍ أَلْزَمْنَاهُ طَائِرَهُ فِي عُنُقِهِ وَنُخْرِجُ لَهُ يَوْمَ الْقِيَامَةِ كِتَابًا يَلْقَاهُ مَنشُورًا ))(( اقْرَأْ كِتَابَكَ كَفَىٰ بِنَفْسِكَ الْيَوْمَ عَلَيْكَ حَسِيبًا)) ئانكو: و هه‌ر مرۆڤه‌كى مه كارێ وى يێ ئێخستيه ستۆيێ وى، و رۆژا قيامه‌تێ ده‌فته‌را كار و كريارێت وى دێ بۆ ده‌رێخين، دێ ڤه‌كرى بينيت. ئه‌ڤه ده‌فته‌را كار و كريارێت ته‌يه ده‌فته‌را خۆ بخوينه، ڤێجا تو ب خۆ ئه‌ڤرۆ به‌سى خۆيى حسێبێ دگه‌ل خۆ بكه‌ى. يان ده‌مێ دبێژيت: ((وَوُضِعَ الْكِتَابُ فَتَرَى الْمُجْرِمِينَ مُشْفِقِينَ مِمَّا فِيهِ وَيَقُولُونَ يَا وَيْلَتَنَا مَالِ هَٰذَا الْكِتَابِ لَا يُغَادِرُ صَغِيرَةً وَلَا كَبِيرَةً إِلَّا أَحْصَاهَا وَوَجَدُوا مَا عَمِلُوا حَاضِرًا وَلَا يَظْلِمُ رَبُّكَ أَحَدًا)) ئانكو: و كتێبێت كار و كريارێت وان هاتنه دانان، ئانكو: هه‌ر ئێك ب سه‌ر كار و كريارێت خۆ هه‌لبوو، ڤێجا وێ رۆژێ دێ گونه‌هكاران بينى، وه‌ختێ ئه‌و كريارێت خۆ د كتێبێدا دبينن ژێ دترسن، و دبێژن: وه‌ى خۆلى ب سه‌رێ مه، ئه‌ڤه چ كتێبه؟ چو هوير و گر نينن هێلابن و تێ بۆرى بيت و نه‌نڤێسيبن، و هه‌ر گونه‌هه‌كا وان د دنيايێدا كرى ديتن يا نڤێسيه، و خودايێ ته سته‌مێ ل كه‌سێ ناكه‌ت.
پا ئه‌و كيژ ملياكه‌تن ئه‌وێت نه‌چنه د ڤان جهانڤه؟! ئيمامێ نه‌وه‌وى دبێژيت: ئه‌و ملياكه‌تێت تايبه‌تن ئه‌وێت دلۆڤانى و دلڤه‌هسيان و گونه‌هژێبرنێ دئيننه خوار بۆ وان يێت هه‌ژى، و خودێ چێتر دزانيت.
