ب / قه‌ناعه‌ت د ڤێرێدايه ئه‌و بزانيت خودێ بۆ وێ يێ حه‌لالكرى و خودێ گه‌له‌ك و گه‌له‌ك ژ وێ و هه‌مى دنيايێ دلۆڤان و عادلتره، و ئه‌ڤ ره‌حما ئه‌و ژێ خه‌به‌ر دده‌ت و يا دنيايێ هه‌ميێ يا ئه‌جنه و مرۆڤ و جانه‌وه‌ران ـ نه‌يا وێ ب تنێ ـ هه‌مى پێكڤه پشكه‌كه ژ سه‌د پشكێت دلۆڤانيا خودێ. د ڤێ راستێدا پێغه‌مبه‌رێ خۆشتڤى (سلاڤێت خودێ لێ بين) دبێژيت: ((خودێ دلۆڤانى يا كريه سه‌د پشك، نۆت و نه‌ه پشك يێت ل ده‌ف خۆ هێلاين، و پشكه‌ك ب تنێ يا كريه د ئه‌رديدا، ب وێ پشكێ چێكرى دلۆڤانيێ ب ئێك و دوو دبه‌ن، حه‌تا جانه‌وه‌ر سمێ خۆ ژبه‌ر تێشكێ خۆ بلندكه‌ت ترسا هندێ بهنگڤيت)). و د ريوايه‌ته‌كا ديدا دبێژيت: ((ب راستى خودێ سه‌د دلۆڤانى يێت هه‌ين، دلۆڤانيه‌ك ب تنێ د ناڤبه‌را ئه‌جنه و مرۆڤ و جانه‌وه‌ر و خشۆكێت ئه‌رديدا (وه‌كى مار و دويپشك و سپيه و كێچان) يا ئينايه خوارێ، ب وێ دلێت وان دميننه پێكڤه، و دلۆڤانيێ ب ئێك و دوو دبه‌ن، و ده‌هبه پێ ره‌حمێ ب تێشكێ خۆ دبه‌ت، و نۆت و نه‌ه دلۆڤانى خودێ مه‌زن يێت هێلاين، پێ دلۆڤانيێ ب به‌نده‌يێت خۆ دبه‌ت رۆژا قيامه‌تێ)). و موسلم د ريوايه‌ته‌كێدا ژ سه‌لمانێ فارسى (خودێ ژێ رازى بيت) ڤه‌دگێريت: پێغه‌مبه‌رێ خودێ (سلاڤێت خودێ لێ بن) گۆت: ((ب راستى خودێ سه‌د دلۆڤانى يێت هه‌ين، ژ وان ب دلۆڤانيه‌كێ چێكرى دلۆڤانيێ ب ئێك و دوو دبه‌ن، و نۆت و نه‌ه دلۆڤانى بۆ رۆژا قيامه‌تێنه)). و د ريوايه‌ته‌كا ديدا دبێژيت: ((ب راستى خودێ مه‌زن رۆژا ئه‌رد و ئه‌سمان چێكرين سه‌د دلۆڤانى چێكرن، هه‌ر ئێك مابه‌ينا ئه‌رد و ئه‌سمانى دگريت، ژ وان دلۆڤانيه‌ك ب تنێ كره د ئه‌رديدا، ب وێ ده‌يك دلۆڤانيێ ب بچويكێ خۆ دبه‌ت، و ده‌هبه و باله‌فر هنده‌ك ب هنده‌كان دبه‌ن)). ڤێجا بلا شه‌يتان ته سه‌ردانه‌به‌ت و ته دوودل نه‌كه‌ت و وه‌ل ته بكه‌ت تو دلۆڤانيا خۆ بينيه رێزا دلۆڤانيا خودێ يان يا وى پتر لێ بكه‌ى، ژ ره‌حما خودێ، رزقێ مێريێ و كرمى د زكێ كه‌ڤرى و ئه‌رديدا دده‌ت و رزقێ نه‌هنگى د ناف ده‌ريايێدا دده‌ت و كه‌سآ بێ رزق ناهێليت، و ژ ره‌حما وى ئه‌و گۆشت بۆ مه يێ حه‌لالكرى، ڤێجا ڤان هزرا ژ ده‌ف خۆ ببه و رێكێ نه‌ده‌يه شه‌يتانى ته بێخيته داڤێت خۆ و ته سه‌رداببه‌ت، و خودێ چێتر دزانيت.
