ب / پێدڤيه حه‌ديسێت پێغه‌مبه‌رى (سلاڤێت خودێ لێ بن) نه‌هێنه ژێك قه‌تاندن، و جودا جودا نه‌هێنه شرۆڤه‌كرن، و هه‌كه ئه‌ڤه هاته‌كرن، يا خه‌له‌ته و نه‌يا دورسته، يا دورست حه‌ديسێت ئێك بابه‌ت، پێكڤه بێنه كۆمكرن و پێكڤه بێنه گرێدان، و نه‌هێنه ژێك جوداكرن. راسته هه‌ر تشتێ مرۆڤ ب ئنيه‌تا خۆمه‌زنكرنێ بكه‌ت، يێ حه‌رامه و نه دورسته، رێڤه‌چۆن كاره‌كێ ئاساييه و خودێ ئه‌مرێ مه يێ كرى ئه‌م د ئه‌رديدا بێين و بچين، دبێژيت: ((هُوَ الَّذِي جَعَلَ لَكُمُ الْأَرْضَ ذَلُولًا فَامْشُوا فِي مَنَاكِبِهَا وَكُلُوا مِن رِّزْقِهِ وَإِلَيْهِ النُّشُورُ)) ئه‌وه يێ ئه‌رد بۆ هه‌وه به‌رده‌ست و ساناهيكرى، د ناڤدا بگه‌رِن و ژ رزقێ وى دايه هه‌وه بخۆن، و زڤرِينا هه‌وه يا دويماهيێ هه‌ر ب بال ويڤه‌يه. به‌لێ به‌رامبه‌ر ڤێ دبێژيت: ((وَلَا تَمْشِ فِي الْأَرْضِ مَرَحًا إِنَّكَ لَن تَخْرِقَ الْأَرْضَ وَلَن تَبْلُغَ الْجِبَالَ طُولًا)) شاهى و مه‌زناتى ل سه‌ر ئه‌ردى ب رێڤه نه‌چه، ب راستى تو ب چۆنا خۆ نه‌شێى ئه‌ردى كون بكه‌ى و بكه‌لێشى، و تو ب درێژيێ ژى ناگه‌هيه چيايان. ديسا يآ ب مه‌زناتى باخڤيت پێغه‌مبه‌رێ خۆشتڤى (سلاڤێت خودێ لێ بن) د راستا ويدا دبێژيت: (وَإِنَّ أَبْغَضكُمْ إِلى، وَأَبْعَدَكُمْ مِنِّي يوْمَ الْقيامَه، الثرْثارُونَ، وَالمُتَشَدِّقُونَ وَالمُتَفَيْهِقُونَ) ب راستى رۆژا قيامه‌تێ يێ ژ هه‌وه نه‌خۆشڤيتر بۆ من و جه دويرتر بۆ من: پرِبێژن و ئاخفتن مه‌زنن و ده‌ڤ په‌حنن (يێت ده‌ڤ تژى دئاخڤن ژ خۆمه‌زنكرن)، گۆتن: يا پێغه‌مبه‌رێ خودێ مه زانى پرِبێژ و ئاخفتن مه‌زن كينه موته‌فه‌يقه كينه؟ گۆت: خۆمه‌زنكه‌رن.
ڤێجا نابيت ب چو ره‌نگا مرۆڤ خۆ مه‌زن بكه‌ت، نه ب جلكى نه ب رێڤه‌چۆنێ نه ب ئاخفتنێ، و هه‌ركه‌سێ ته‌مه‌ت دندكا تۆزێ مه‌زناتى د دليدا بيت ئه‌و ناچيته به‌حه‌شتێ، هه‌روه‌كى پێغه‌مبه‌ر (سلاڤێت خودێ لێ بن) د موسلمێدا دبێژيت: (لا يدْخُل الجَنَّة مَنْ كَانَ في قَلْبِهِ مثقَالُ ذرَّه مَنْ كِبرٍ فقال رَجُلٌ: إِنَّ الرَّجُلَ يُحِبُّ أَنْ يكُونَ ثوْبُه حسناً، ونعلهُ حسنا قال: إِنَّ اللَّه جَمِيلٌ يُحِبُّ الجَمالَ الكِبْرُ بَطرُ الحَقِّ وغَمْط النَّاسِ) هه‌ركه‌سێ ته‌مه‌ت گرانيا پرتا ژ هه‌ميان بچويكتر، ژ مه‌زناتيێ د دلێ ويدا هه‌بيت، ناچيته به‌حه‌شتێ، زه‌لامه‌كى گۆت: ب راستى مرۆڤى دڤێت جلكێ وى يێ جوان بيت و پێلاڤا وى يا جوان بيت، گۆت: ((ب راستى خودێ يێ جوانه و كار و بارێت وى هه‌مى د جوانن و حه‌ژ خۆجوانكرنێ دكه‌ت، مه‌زناتى نه‌وه‌رگرتن و زڤراندنا راستيێيه و كێمكرنا خه‌لكيه)). به‌رێ خۆ بدێ يێ ته‌مه‌ت پرتا ژ هه‌ميان كێمتر مه‌زناتى د دليدا بيت كا چ دويماهيك ل پێشيا ويه، پا تو چ دبێژى يێ مه‌زناتى د دليدا و د رێڤه‌چۆن و جلك و ئاخفتنا خۆدا ئاشكه‌را دكه‌ت دێ وى چ دويماهيك هه‌بيت.
ژ حه‌ديسێت پێغه‌مبه‌رى (سلاڤێت خودێ لێ بن) يێت سه‌ر جلكان هاتين، ديار دبيت هه‌ركه‌سێ جلكه‌كى بۆ مه‌زناتى بكه‌ته به‌ر خۆ، يان ب ئنيه‌تا مه‌زناتيێ درێژكه‌ت ئه‌و دكه‌ڤيته بن ڤێ گه‌فێڤه، چونكى پێغه‌مبه‌رێ خۆشتڤى (سلاڤێت خودێ لێ بن) هه‌روه‌كى د بوخارى و موسلمێدا هاتى، دبێژيت: (لا ينْظرُ اللَّه يوْم القِيامة إِلى مَنْ جَرَّ إِزارَه بَطراً) رۆژا قيامه‌تێ خودێ ب چاڤێ دلۆڤانيێ به‌رێ خۆ ناده‌ته وى يێ كراسێ خۆ ژ خۆ مه‌زنكرن و به‌ترانى دويف خۆرا دكێشيت.
ديسا پێغه‌مبه‌ر (سلاڤێت خودێ لێ بن) هه‌روه‌كى د بوخاريێدا هاتى، دبێژيت: (مَنْ جَرَّ ثوْبَهُ خُيلاءَ لَمْ ينْظر اللَّه إِليهِ يوْم القِيامَه » فقال أَبو بكر: يارسول اللَّه إِن إِزارى يسْتَرْخى إِلا أَنْ أَتَعَاهَدَهُ، فقال له رسول اللَّه صَلّى اللهُ عَلَيْهِ وسَلَّم: « إِنَّكَ لَسْتَ مِمَّنْ يفْعَلُهُ خُێلاءَ) هه‌ركه‌سێ جلكێ خۆ ژ خۆمه‌زنكرن دويف خۆرا بكێشيت، رۆژا قيامه‌تێ خودێ ب چاڤێ دلۆڤانيێ به‌رێ خۆ ناده‌ته وى. ئه‌بو به‌كرى گۆت: يا پێغه‌مبه‌رێ خودێ.. ب راستى كراسێ من هه‌كه ئه‌ز نه‌گرم و نه‌شدينم شۆر دبيت، پێغه‌مبه‌رێ خودێ (سلاڤێت خودێ لێ بن) گۆتێ: تو نه ژ وانى يێت ژ خۆمه‌زنكرن وه‌دكه‌ن. و ژ دويماهيا حه‌ديسێ ديار دبيت هه‌كه نه ژ خۆمه‌زنكرن بيت چو تێدا نينه، و خودێ چێتر دزانيت.
