ب / هه‌ر ناڤێ چو رامانێت كرێت نه‌هه‌لگريت و خودانێ ناڤى شه‌رمێ ژێ نه‌كه‌ت ده‌مێ مه‌زن دبيت يێ دورسته، و سونه‌تا پێغه‌مبه‌رى (سلاڤێت خودێ لێ بن) د ناڤاندا ئه‌ڤه‌يه: ناڤ يێ كرێت نه‌بيت، هه‌كه يێ كرێتبا دگوهۆرى، وه‌كى ناڤێ كچه‌كێ عاسيه بوو كره جه‌ميله، و هه‌كه رامانا ناڤى گونه‌هبا ژى ديسا دگوهۆرى، ناڤێ عه‌بدلعوززا، كره عه‌بدلره‌حمان، و هه‌كه ناڤ بێهيڤياتى تێدابا، دگوهۆرى، حه‌رب كره، سلم، و سه‌عب كره سه‌هل و هۆسا، و ناڤێ مه‌دحه و ته‌زكيه تێدابا دگوهۆرى، وه‌كى ناڤێ به‌رره، كره جوه‌يريه و زه‌ينه‌ب، و هه‌كه ناڤ نه‌يێ كرێتبا و گونه‌هـ تێدا نه‌با و بێهيڤياتى و ته‌زكيه تێدا نه‌با ناڤ وه‌كى خۆ دهێلا و نه‌دگوهۆرِى وه‌كى ناڤآ ماريايآ هه‌رچه‌نده نه‌ناڤه‌كێ عه‌ره‌بى بوو به‌لێ دگه‌ل هندێ ژى وه‌كى خۆ هێلا و نه‌گوهارت، و ناڤێ ئيمان و ئيسلام و ناڤێت ڤان رامانان هه‌لدگرن د مه‌كروهن و نه‌حه‌رامن دڤێت ئه‌م باش د ناڤبه‌را حه‌رام و مه‌كروهدا جوداكه‌ين، و زانايێ ناڤدار ئبن قه‌ييم ب درێژى د زادولمه‌عادێدا ل سه‌ر ڤێ چه‌ندێ ئاخفتيه و ئه‌ڤ ناڤێت هۆسا مه‌كروهن، كوردى بن عه‌ره‌بى بن يان ب هه‌ر زمانه‌كێ دى بن ئه‌و ناڤێت بێ ئومێدى تێدا وه‌كى سه‌عب و دلبرين و دلژان و دلخوين، شوينا وان فه‌ره ئه‌م بكه‌ينه دلشاد، دلخۆش، دلدار و هۆسا، ديسا ئه‌و ناڤێت ته‌زكيه تێدا مه‌كروهن نه‌حه‌رامن وه‌كى ديندار، موئمن، ئيمان و هۆسا، چونكى دبيت دآ بێژى ديندار ئێك ل ده‌ف ته دێ بێژيت دندكا دينى نينه ديندارآ چ! ئێكسه‌ر دێ به‌زيته رامانا ناڤى، نه ناڤى، يان دێ بێژى ئيمان يان موئمن دێ بێژيت كا ئيمان دندكا ئيمانآ نينه، و هۆسا.
ديسا حه‌رامه ناڤێ عه‌بدينيا غه‌يرى خودآ پێڤه‌بيت وه‌كى عه‌بدلنه‌بى و عه‌بدلمه‌ناف و عه‌بدلحه‌سه‌ن، ديسا حه‌رامه مرۆڤ ناڤێ شاهينشاهـ ل خۆ بكه‌ت ئانكو شاهێ شاهان چونكى شاهێ شاهان خودێيه، و ل ده‌ف ئيمام مالكى مه‌كروهه مرۆڤ ناڤێت ملياكه‌تان ل خۆ بكه‌ت وه‌كى جبريل و ميكائيل، به‌لێ ئه‌ڤه به‌س ده‌ف مالكى هۆسايه، و ل ده‌ف زانايێت دى دورسته، يا گرنگ و فه‌ر د ناڤيدا ئه‌و شه‌نگستێت مه گۆتين هه‌رگاڤا ئه‌و هه‌بن ناڤ يێ دورست و حه‌لال و شه‌رعيه كوردى بيت عه‌ره‌بى.
يا ماي ئه‌ز بێژم: مخابن هنده‌كێت خۆ ب وه‌لات په‌روه‌ريێ دئيننه ده‌رێ ل ده‌ف وان وه‌لات په‌روه‌رى ب ناڤيه به‌رهنگاريا هنده ناڤا دكه‌ن خه‌لكى ژ حه‌ژێكرن ئه‌و ناڤ يێ دانايه سه‌ر عه‌يالێ خۆ، وه‌كى ناڤێت سه‌حابان و پێغه‌مبه‌ران دا بۆ ببنه به‌لگه و شاهد كو ئه‌و حه‌ژ وان دكه‌ن به‌لكى رۆژا قيامه‌تێ خودێ حه‌شرا وان دگه‌ل وان بكه‌ت ژبه‌ر گۆتنا پێغه‌مبه‌رآ خۆشتڤى (سلاڤێت خودێ لێ بن): مرۆڤ رۆژا قيامه‌تێ يێ دگه‌ل وى يێ حه‌ژێ دكه‌ت و خۆزى ئنيه‌تێت وان د پاك و پاقژبانه، نوزام ئه‌و ديرۆكێ ناخوينن و نوزانن ئه‌و ناڤێت ئه‌م ئه‌ڤرۆ سه‌رێ خۆ پێ بلندكه‌ين د هه‌مى واراندا د وارێ بزاڤا رزگاريخوازيا كورديدا يان د وارێ تۆر و ئه‌ده‌باندا يان د وارێ عه‌گيدى و خۆشمێريێدا يان د وارێ زانين و زانستێدا ناڤێت وان هه‌مى عه‌ره‌بى بوون (شێخ عوبه‌يدوللا و شێخ سه‌عيد و قازى موحه‌ممه‌د و شێخ عه‌بدولسه‌لام و مه‌لا موسته‌فا و ئه‌حمه‌دێ جزيرى و ئه‌حمه‌دێ خانى و مه‌لا حسێنێ باته‌يى و... هتد)، ڤێجا بلا ئه‌ڤ مرۆڤه به‌لگێ تويێ ژ سه‌ر خۆ راكه‌ن وان ناڤه‌شێريت، و بلا بزانن ناڤ مافه‌كێ كه‌سايه‌تيه دڤێت كه‌س مايێ خۆ تێ نه‌كه‌ت، و كه‌س ڤێ تێنه‌گه‌هيت ئه‌ز هايدانا ناڤێ كوردى ناكه‌م.. نه‌خێر، وه‌سا نينه، به‌س من دڤێت بێژم ناڤ مافه‌كێ كه‌ساتيه چ ناڤێ بۆ خۆ هه‌لدبژێريت بلا هه‌لبژێريت به‌س ئه‌ڤ شه‌نگستێت بۆرى به‌رچاڤ بێنه وه‌رگرتن د شه‌رعينه و دورستن.
و كا كيژ ناڤ خودێ پتر ژ هه‌ميان حه‌ژێ دكه‌ت د حه‌ديسا سه‌حيحدا هاتى خۆشڤيترين ناڤ بۆ خودێ (عه‌بدوللا) و (عه‌بدلره‌حمان)ـه، و هنده ته‌فسيرزان ڤێ ئايه‌تێ دكه‌نه ده‌ليل كو عه‌بدوللا خۆشڤيترين ناڤه ل ده‌ف خودێ ((وَأَنَّهُ لَمَّا قَامَ عَبْدُ اللَّهِ يَدْعُوهُ)) مه‌خسه‌د پێ موحه‌ممه‌ده پێغه‌مبه‌رێ خودێ (سلاڤێت خودێ لێ بن) ب ناڤى عه‌بدوللا گازى پێغه‌مبه‌رێ خۆ كر، و ئيمامێ مه‌ناوى دبێژيت: باشترين ناڤ (محمد و أحمد)ـه چونكى ئه‌و خودێ بۆ خۆشتڤي و پێغه‌مبه‌رێ خۆ يێ هه‌لبژارتى، ئه‌و ناڤێ خودێ هه‌لبژارتى و بۆ يێ ژ هه‌ميان خۆشڤيتر دڤێت ژ هه‌مى ناڤان باشتر بيت، و پێغه‌مبه‌رێ مه (سلاڤێت خودێ لێ بن) حه‌ژ ناڤێ (عبدالله و عبدالرحمن) دكر ژبه‌ر هندێ هنده زانايێت مه دبێژن موسته‌حه‌به ئه‌م ڤان ناڤان راكه‌ين و هه‌ر ناڤه‌كێ ڤێ رامانێ بده‌ت، و خودێ چێتر دزانيت.
