ب / ب گشتى كولى حه‌لالن و دورسته بێنه خوارن، دلێ هنده‌كان ناچيتێ ئه‌و تشته‌كێ ديه، و ئه‌ڤه تشتى حه‌رام ناكه‌ت، چونكى گه‌له‌ك كه‌س يێت هه‌ين دلێ وان ناچيته گۆشتى و نه‌شێن بخۆن يان فێقى و هه‌كه خوار دێ راكه‌ن، به‌لێ ئه‌ڤه هندێ ناگه‌هينيت ئه‌و تشتێ دلێ وان نه‌چيتێ حه‌رامن. و به‌لگه ل سه‌ر حه‌لاليا كوليان پێغه‌مبه‌ر (سلاڤێت خودێ لێ بن) دبێژيت: ((دوو مرى و دوو خوين بۆ مه يێت هاتينه دورستكرن، هه‌ردوو مرى ماسى و كولينه و هه‌ردوو خوين مێلاك و خالخالكه)). ديسا عه‌بدوللايێ كورێ ئه‌بى ئه‌وفاى، خودێ ژ هه‌ردوويان رازى بيت دبێژيت: مه حه‌فت خه‌زا دگه‌ل پێغه‌مبه‌رێ خودێ (سلاڤێت خودێ لێ بن) كرن مه كولى دخوارن. و د ريوايه‌ته‌كێدا: مه كولى دگه‌ل وى دخوار. بوخارى و موسلمى ڤه‌گێرايه، و ماسى چاوا دهێته خوارن وه‌سا كولى ژى دهێته خوارن، به‌س يێ بمريت چ ب كوشتنێ يان ب سه‌رژێكرنێ و مه‌رج نينه بێته سه‌رژێكرن، وه‌كى ماسيێ به‌سه بێ روح ببيت ڤێجا ب هه‌ر رێكه‌كا هه‌بيت، به‌لێ دڤێت ئه‌م بزانين ره‌نگه‌كێ كولى يێ ژه‌هرداره ئه‌ڤه نه‌حه‌لالن وه‌كى كوليێ ئه‌نده‌لوسى، و كوليێ نه‌ژه‌هردار وه‌كى كوليێ حيجازێ يێ دورسته. و حه‌ديسا پێغه‌مبه‌رى (سلاڤێت خودێ لێ بن) ژ ڤى ره‌نگى دگريت، چونكى يێ بێ ژه‌هره، به‌لێ كوليێ ب ژه‌هر نه‌يێ دورسته ژبه‌ر ژه‌هرا وى، و خودێ چێتر دزانيت.
