ب / دڤێت ئه‌م گه‌له‌ك هشيارى پاريێ حه‌لال بين، و خۆ ژ حه‌رامى بده‌ينه پاش، و باش بزانين يێ نێزيكى حه‌رامى بوو دبيت بكه‌ڤيته تێدا. ئيمام بوخارى و موسلم ژ نه‌عمانێ كورێ به‌شيرى ڤه‌دگێرن دبێژيت: پێغه‌مبه‌رى (سلاڤێت خودێ لێ بن) گۆت: (إِنَّ الحَلاَلَ بَيِّنٌ، وإِنَّ الحَرامَ بَيِّنٌ، وَبَيْنَهما مُشْتَبِهاتٌ لاَ يعْلَمُهُنَّ كَپيرٌ مِنَ النَّاسِ، فَمَن اتَّقى الشُّبُهاتِ، اسْتَبْرَأَ لِدِينِهِ وعِرْضهِ، وَمَنْ وَقَعَ في الشبُهاتِ، وقَعَ في الحَرامِ، كالرَّاعي يرْعى حَوْلَ الحِمى يُوشِكُ أَنْ يرْتَع فِيهِ، أَلاَ وإِنَّ لِكُلِّ مَلِكٍ حِمًى، أَلاَ وَإِنَّ حِمَى اللَّهِ مَحَارِمهُ، أَلاَ وإِنَّ في الجسَدِ مُضغَه إذا صلَحَت صَلَحَ الجسَدُ كُلُّهُ، وَإِذا فَسَدَتْ فَسدَ الجَسَدُ كُلُّهُ: أَلاَ وَهِي القَلْبُ) ب راستى حه‌لالێ ئاشكرايه و حرامێ ئاشكرايه، و هنده كارێت حه‌لال و حه‌رام ژێ نه‌ديار د مابه‌ينا واندا يێت هه‌ين، گه‌له‌ك خه‌لك چو ژێ نوزانن، ڤێجا هه‌ركه‌سێ خۆ ژ كارێت حه‌لال و حه‌رام ژێ نه‌ديار پاراست، وى ساخله‌مى بۆ دينێ خۆ و نامويسا خۆ خواست يان ب ده‌ست خۆڤه ئينا (ئانكو ساخله‌م بوو ژ خه‌له‌تيا د دينيدا و ساخله‌م بوو ژ نه‌كاميا خه‌لكى ژى) و يێ كه‌فته د كارێت حه‌لال و حه‌رام ژێ نه‌دياردا، ئه‌و كه‌فته د حه‌راميدا، وه‌كى شڤانى دۆرماندۆر په‌وانى بچه‌رينيت، زوى دێ كه‌ڤيت د په‌وانيدا. بزانن ب راستى هه‌ر مه‌لكه‌كى په‌وانه‌كێ هه‌ى، بزانن ب راستى په‌وانێ خودێ حه‌رامكريێت وينه، و بزانن ب راستى پارچه‌كا د له‌شيدا هه‌ى هه‌كه باش بوو، ئه‌ڤه له‌ش هه‌مى باش بوو، و هه‌كه خراب بوو ئه‌ڤه له‌ش هه‌مى خراب بوو، بزانن ئه‌و پارچه دله.
ژبه‌ر هندێ فه‌ره هه‌تا ئه‌و تشتێ ئه‌م تێدا ب گۆمان و دودل بهێلين. و د ڤێ رامانيدا پێغه‌مبه‌ر (سلاڤێت خودێ لێ بن) هه‌روه‌كى ئيمام ترمزى ژ حه‌سه‌نێ كورێ عه‌لى خودێ ژ هه‌ردوويان رازى بيت، ڤه‌دگێريت دبێژيت: من ژ پێغه‌مبه‌رێ خودێ (سلاڤێت خودێ لێ بن) ژبه‌ركر تشتێ تو د دورستى و حه‌لاليا ويدا يێ ب شك و گۆمان بهێله، وه‌ره تشتێ تو د دورستى و حه‌لاليا ويدا نه‌يێ ب شك، و ب راستى راستگۆيى دلته‌ناييه (جهێ دل ره‌حه‌تى و ته‌ناهيێيه) و دره‌و دودليه (جهێ دل نه‌ره‌حه‌تيێيه). و ديسا د حه‌ديسه‌كا ديدا ل دۆر ڤێ رامانێ پێغه‌مبه‌ر (سلاڤێت خودێ لێ بن) دبێژيت: (لايبلغ العبدُ أَنْ يكون من المتقين حتى يدَعَ مالا بَأْس بِهِ حَذراً مما بِهِ بَأْسٌ) به‌نده ناگه‌هيته هندێ ژ خودێ ترسابيت هه‌تا ئه‌و تشتێ چو تێدا نه، نه‌هێليت ژ ترسا هندێ تشته‌ك تێدا بيت. پشتى ڤێ ئه‌ز دبێژم: هه‌كه ته نه‌زانيه هه‌تا هاتيه خوارێ چو گونه‌ه ل سه‌ر ته نينه و بۆ ته هه‌يه كرێيا خۆ وه‌رگرى و نه‌يا حه‌رامه، به‌لێ هه‌كه ده‌ستپێكێ ته ديتيه و ته خۆ ب سه‌رڤه نه‌بريه؛ ئه‌ڤه نه‌دورسته و حه‌رامه، چونكى پێغه‌مبه‌رى (سلاڤێت خودێ لێ بن) له‌عنه‌تێت ل ده‌هـ كه‌سان كرين هه‌روه‌كى ئه‌بو داوود و حاكم ژ ئبن عومه‌رى (خودێ ژێ رازى بيت) ڤه‌دگێرن، دبێژيت: (لَعَنَ الله الْخَمْرَ وَشَارِبَهَا وَسَاقِيهَا وَبَائِعَهَا وَمُبْتَاعَهَا وَعَاصِرَهَا وَمُعْتَصِرَهَا وَحَامِلَهَا وَالْمَحْمُولَه إليه) به‌لێ هه‌كه ته نه‌زانيه د ده‌ستپێكيدا و ب رێكێڤه ته زاني هنگى دڤێت تو ڤى حه‌ديسى ب جه بينى ئه‌وا موسلمى ژ سه‌عيدآ خوده‌رى ڤه‌گێرايى، دبێژيت: پێغه‌مبه‌رى (سلاڤێت خودێ لێ بن) گۆت: (مَنْ رَأَى مِنْكُم مُنْكراً فَلْيغيِّرْهُ بِێدهِ، فَإِنْ لَمْ يسْتَطعْ فبِلِسَانِهِ، فَإِنْ لَمْ يسْتَطعْ فَبقَلبهِ وَذلَكَ أَضَفُ الإِيمانِ) هه‌ركه‌سێ ژ هه‌وه گونه‌ه و خرابيه‌ك ديت بلا ب ده‌ستێ خۆ بگوهۆريت، هه‌كه نه‌شيا بلا ب ئه‌زمانێ خۆ بيت، هه‌كه نه‌شيا بلا ب دلێ خۆ بيت و ئه‌ڤه لاوازترين باوه‌ريه. دڤێت ئێك ژ ڤان ره‌وشان ل ته ديار ببيت و دورسته تو كرێيا خۆ وه‌رگرى، چونكى ئه‌ڤه نه‌هاريكاريه، به‌لێ نابيت تو وى ل به‌ر ده‌رگه‌هێ مه‌يخانێ راكه‌ى و بێژى من نه‌زانى يێ به‌ر ده‌رگه‌هێ مه‌يخانێ راوه‌ستياى و كيسه‌ك د ده‌ستيدا تو دبێژى دێ چ بيت! هنگى دڤێت تو بێژيێ هه‌كه عه‌ره‌ق ف ته‌يه ببۆره ئه‌ز نه‌شێم ته راكه‌م، و هه‌كه بۆ ته دياركر ئه‌و عه‌ره‌قێ ناهه‌لگريت دورسته راكى بلا ل به‌ر ده‌رگه‌هێ مه‌يخانێ ژى بيت، و خودێ چێتر دزانيت.
