ب / هۆزان ب ره‌نگه‌كێ گشتى ئاخفتنه، و ئاخفتن ژى حه‌لالێ وێ يێ حه‌لاله، و حه‌رامێ وێ يێ حه‌رامه، و هه‌كه رامان و ناڤه‌رۆك و ئارامانج و نامه و مه‌به‌ستا هۆزان هه‌لدگريت يا دورست و حه‌لال بيت، ئه‌و هۆزان يا دورست و حه‌لاله، ناڤێ وێ هۆزانێ چ بيت، ئه‌ڤيندارى، شۆره‌شگێرى، وه‌لاتپه‌روه‌رى، په‌سنكارى، شيره‌تكارى، سالۆخه‌تكارى. و هۆزانا شۆره‌شگێرى هه‌كه مه‌خسه‌د پێ راكرن و نه‌هێلانا سته‌م و سته‌مكاريێ بيت، و هێزئێخستنا جانێ وه‌لاتپه‌روه‌ريێ بيت، چاندنا سه‌ربلندى و سالۆخه‌تێت ئازاديخوازيآ بيت، و ئاخفتنێت خه‌له‌ت تێدا نه‌بيت، ئه‌و هۆزان سه‌رپشكا هۆزانان دهێت، چونكى ئه‌و هۆزان نه‌ڤيان و ره‌دكرنا سته‌م و سته‌مكاران ل ده‌ف مرۆڤى په‌يدا دكه‌ت، سه‌ربلندى و سه‌رفه‌رازيێ په‌يدا دكه‌ت، مرۆڤى پالدده‌ت پشته‌ڤانێ ته‌په‌سه‌ر و بنده‌ست و هه‌ژاران بيت و به‌رِه‌ڤانيێ ژ وان بكه‌ت ئه‌وێت خودێ مه‌زن ژ مه خواستى ئه‌م شه‌رى سه‌را وان بكه‌ين، دبێژيت: ((وَمَا لَكُمْ لَا تُقَاتِلُونَ فِي سَبِيلِ اللَّهِ وَالْمُسْتَضْعَفِينَ مِنَ الرِّجَالِ وَالنِّسَاءِ وَالْوِلْدَانِ الَّذِينَ يَقُولُونَ رَبَّنَا أَخْرِجْنَا مِنْ هَٰذِهِ الْقَرْيَةِ الظَّالِمِ أَهْلُهَا وَاجْعَل لَّنَا مِن لَّدُنكَ وَلِيًّا وَاجْعَل لَّنَا مِن لَّدُنكَ نَصِيرًا )) هه‌وه خێره؟ بۆچى هوين د رێكا خودێدا شه‌رى ناكه‌ن ژبه‌ر ته‌په‌سه‌ر و بێ ده‌ستهه‌لاتان ژ زه‌لام و ژن و بچويكان، ئه‌وێت گازى دكه‌ن دبێژن: يا خودێ تو مه ژ ڤى گوندێ خه‌لكێ وى سته‌مكار ده‌ربێخه، و بۆ مه هاريكاره‌كى ژ ده‌ف خۆ بهنێره، و بۆ مه پشته‌ڤانه‌كى ژ ده‌ف خۆ بهنێره. و ئارماجا سه‌ره‌كى ژ هۆزانا شۆره‌شگێرى هه‌ڤركيا سته‌م و سته‌مكاريێ بێته‌كرن، و پێغه‌مبه‌رى (سلاڤێت خودێ لێ بن) ئه‌ڤه يا كريه مه‌زنترين جيهاد، ئيمامآ نه‌سائى ژ ئه‌بى عه‌بدوللايى تارقێ كورێ شيهابێ بوجه‌لى يێ ئه‌حمه‌سى (خودێ ژێ رازى بيت) ڤه‌دگێريت، دبێژيت: زه‌لامه‌كى پسيار ژ پێغه‌مبه‌رێ خودێ (سلاڤێت خودێ لێ بن) كر و پێ خۆ كربوو د ركێبێرا، گۆت: كيژ جيهاد ژ هه‌ميان باشتره؟ گۆت: ((باشترين جيهاد: ئاخفتنا راست و دورسته ل ده‌ف حاكمرانه‌كێ زالم و زۆردار)). و كۆرت و مفاكار، هه‌كه مه‌به‌ست ژ هۆزانێ خودێ بيت و دينێ خودێ هنگى ئه‌و هۆزان ره‌نگه‌كێ جيهادێيه، له‌وا پێغه‌مبه‌رێ مه (سلاڤێت خودێ لێ بن) د ڤه‌گێره‌كا ئه‌بو داووديدا دبێژيت: (جاهِدُوا المُشرِكينَ بِأَموالِكُمْ وأَنْفُسِكُم وأَلسِنَتِكُم) ب مالێ خۆ و ب خۆ و ب ئه‌زمانێت خۆ جيهادێ دگه‌ل هه‌ڤپشكچێكه‌ران بكه‌ن. و د حه‌ديسه‌كا ديدا ژ ڤه‌گێرانا موسلمى، دبێژيت: (مَا مِنَ نَبِي بعَثهُ اللَّه في أُمَّه قَبْلِي إِلاَّ كان لَه مِن أُمَّتِهِ حواريُّون وأَصْحَابٌ يأْخذون بِسُنَّتِهِ ويقْتدُون بأَمْرِه، ثمَّ إِنَّها تَخْلُفُ مِنْ بعْدِهمْ خُلُوفٌ يقُولُون مَالاَ يفْعلُونَ، ويفْعَلُون مَالاَ يُؤمَرون، فَمَنْ جاهدهُم بِيدهِ فَهُو مُؤمِنٌ، وَمَنْ جاهدهم بقَلْبِهِ فَهُو مُؤمِنٌ، ومَنْ جَاهَدهُمْ بِلِسانِهِ فَهُو مُؤمِنٌ، وليس وراءَ ذلِك مِن الإِيمانِ حبَّه خرْدل) نينه پێغه‌مبه‌ره‌ك به‌رى من د مله‌ته‌كيدا هاتبيته هنارتن، هه‌كه هاريكار و پشته‌ڤان و هه‌ڤال نه‌بن رێكا وى دگرن و دويف ئه‌مرێ وى دچن، پاشى ده‌سته‌كه‌كا خراب پاش وانڤه هاتن، وێ دبێژن يا نه‌كه‌ن، و وێ دكه‌ن يا ئه‌مرێ وان پێ نه‌هاتيه‌كرن، هه‌ركه‌سێ جيهادێ ب ده‌ستێ خۆ دگه‌ل وان بكه‌ت ئه‌و خودان ئيمانه، و هه‌ركه‌سێ جيهادێ ب ئه‌زمانێ خۆ دگه‌ل وان بكه‌ت ئه‌و خودان ئيمانه، و هه‌ركه‌سێ جيهادێ ب دلێ خۆ دگه‌ل وان بكه‌ت ئه‌و خودان ئيمانه، و پشتى ڤێ دنكه‌ك ژێ ژ ئيمان و باوه‌ريێ نينه. دوعا دكه‌ين خودآ مه‌زن هاريكاريا هۆزانڤانان بكه‌ت ئه‌و بن يێت هۆزانا بۆ خێرآ ڤه‌هينن و به‌رێ خه‌لكى بده‌نه رامانێت جوان و سنجێت بها بلند و ئه‌و ژ وان نه‌بن يێت خودآ د راستا واندا گۆتى: ((وَالشُّعَرَاءُ يَتَّبِعُهُمُ الْغَاوُونَ ))((أَلَمْ تَرَ أَنَّهُمْ فِي كُلِّ وَادٍ يَهِيمُونَ))(( وَأَنَّهُمْ يَقُولُونَ مَا لَا يَفْعَلُونَ)) و هۆزانڤان (يێت نه‌موسلمان، و يێت گاور، و يێت خراب) مرۆڤێت سه‌رداچۆيى، ب دويف وان دكه‌ڤن و گوهێ خۆ دده‌نه وان. ما تو نابينى ئه‌و د هه‌مى رێك و هونه‌رێت دره‌وێدا، ل دويف سه‌رێ خۆ دچن جار دهاڤێژنه ڤى، و جار يێ دى، جار ڤێ بێ به‌ختيێ، جار يا دى، دكه‌ن. و ب راستى ئه‌و وێ دبێژن، يا نه‌كه‌ن. و هيڤيا من ئه‌وه هۆزانڤانێت مه ژ وان بن يێت دويف ڤێ ئايه‌تێرا خودێ د راستا واندا گۆتى: ((إِلَّا الَّذِينَ آمَنُوا وَعَمِلُوا الصَّالِحَاتِ وَذَكَرُوا اللَّهَ كَثِيرًا وَانتَصَرُوا مِن بَعْدِ مَا ظُلِمُوا وَسَيَعْلَمُ الَّذِينَ ظَلَمُوا أَيَّ مُنقَلَبٍ يَنقَلِبُونَ )) ژبلى وان ئه‌وێت باوه‌رى ئينايين و كار و كريارێت راست و باش كرين، و گه‌له‌ك زكرێ خودێ كرين و خۆ ب سه‌رئێخستين، پشتى سته‌م ل وان هاتيه‌كرن (ئانكو: هاڤێتينه وان گاوران ئه‌وێت هاڤێتينه موسلمانان)، و ئه‌وێت سته‌م كرين، دێ زانن كا ئه‌و دێ بۆ چ دويماهيك زڤرِن، و خودێ چێتر دزانيت.
