ب / چو گۆمان تێدا نينه هه‌كه ئه‌و تێژك ده‌ركه‌فت يا ساخ و هاته ڤه‌كوشتن به‌رى بمريت ئه‌و تێژك حه‌لاله و دورسته بێته خوارن، به‌لێ هه‌كه ب ڤه‌كوشتنا ده‌يكێ ده‌ركه‌فت مرى.. ئه‌رێ هنگى ئه‌و تێژك دورسته بێته خوارن! و ڤه‌كوشتنا ده‌يكا وێ دێ بۆ وێ بيته ڤه‌كوشتن؟ زانا د ڤى كراسيدا دوو بۆچۆنن، ده‌ف ئيمام ئه‌بو حه‌نيفه و مه‌زهه‌بێ حه‌نه‌فيان: هه‌كه تێژك ساخ ده‌ركه‌فت و هاته ڤه‌كوشتن دورسته، و هه‌كه نه ـ تێژك مرى ده‌ركه‌فت ـ ناهێته خوارن و نه‌يا دورسته، به‌لێ جمهورێ زانايان دبێژن: هه‌كه مرى ژى بيت ئه‌و تێژك يا حه‌لاله، چونكى ڤه‌كوشتنا ده‌يكا وێ بۆ ڤه‌كوشتنه. د حه‌ديسا پێغه‌مبه‌ريدا (سلاڤێت خودێ لێ بن) هاتيه، پسيار ژێ هاته‌كرن يا پێغه‌مبه‌رێ خودێ.. ئه‌م حێشترێ و چێلێ و بزنێ ڤه‌دكوژين ئه‌م تێشكێت وان تێدا دبينين، ئه‌م باڤێژين يان بخوين؟ پێغه‌مبه‌رى (سلاڤێت خودێ لێ بن) گۆته وان: ((بخۆن هه‌كه هه‌وه بڤێت))، به‌رێ خۆ بده ئاخفتنا پێغه‌مبه‌رى (سلاڤێت خودێ لێ بن) بخۆن هه‌كه هه‌وه بڤێت چه‌ند ئاخفتنه‌كا جوانه: هه‌كه دلێ هه‌وه بچيتێ يا حه‌لاله و هه‌كه دلێ هه‌وه نه‌چيتێ ئه‌و تشته‌كێ ديه. به‌لێ ئه‌ڤه حه‌لالى حه‌رام ناكه‌ت، گه‌له‌ك تشتان دلێ مرۆڤى ناگريت و ناچيتێ به‌لێ دێ هه‌ر مينن حه‌لال. و ديماهيێ ئه‌ز دبێژم: هه‌كه تێژك ساخ ده‌ركه‌فت بلا بێته ڤه‌كوشتن باشتره دا ژ خيلافێ ده‌ركه‌ڤن، و هه‌كه ژبه‌ر ڤه‌كوشتنێ مرى ده‌ركه‌فت هنگى يا حه‌لاله و ڤه‌كوشتنا ده‌يكێ بۆ وێ ڤه‌كوشتنه، و خودێ چێتر دزانيت.
