ب / گه‌له‌ك زانا (خودێ ژێ رازى بيت) ب گشتى ل دۆر سترانێ دبێژن: ستران ئاخفتنه، يا حه‌لال حه‌لاله و يا حه‌رام حه‌رامه، و دێ چاوا زانى ستران حه‌لاله يان حه‌رامه؛ ژ وێ ناما هه‌لدگريت و ژ وێ ئارمانجا دخوازيت، و ژ ناڤه‌رۆكا سترانێ، و ژ په‌يڤ و ئاوازێت وێ، و ژ رێكا گۆتنا وێ، هه‌كه ئه‌ڤه دورست بن ستران يا حه‌لاله و دورسته، و هه‌كه ئه‌ڤه نه‌دورست بن ستران يا حه‌رامه، نه ژبه‌ر كو ناڤێ وێ سترانه به‌لكى ژبه‌ر وێ خرابيا د ناف خۆدا هه‌لگرتى، و ژبه‌ر وان په‌يڤ و ئاواز و رێكا گۆتنا وێ يا نه‌جوان.
و سروود، هه‌لبه‌ستن ب ده‌نگه‌كێ بلند و ب ئاواز و خۆشى دهێته گۆتن هه‌كه په‌يڤێت وێ بهابلند خوازبن و سنج و تۆره خوازبن تشته‌كێ جوانه و باشه، و گوهدانا سترانێ يان سروودێ دڤێت نه ل سه‌ر حسێبا ئه‌رك و واجبان بيت و دڤێت گه‌له‌ك ده‌مێ مه نه‌كوژيت، و هه‌رێكێ خودێ دێ ل دويف ئنيه‌تا وى ده‌تێ، يێ گوهدانا ستران و سروودان بكه‌ت ب ئنيه‌تا هندێ هاريكاربن بۆ وى ل سه‌ر گونه‌هێ ئه‌و ب ڤێ گوهدانێ يێ گونه‌هكاره، و يێ گوهدانێ بكه‌ت بۆ ئارامكرنا جانێ خۆ؛ دا ب هێز بكه‌ڤيت بۆ عيباده‌تى يێ خودان خێره، و يێ ئنيه‌تا وى نه‌ئه‌و بيت، و نه‌ئه‌و بيت وه‌خته‌كه دكوژيت و به‌لاش ژ خۆ دبه‌ت، نه خێر بۆ دهێته نڤێسين و نه گونه‌هـ، و راستيا ڤێ ژى پێغه‌مبه‌ر (سلاڤێت خودێ لێ بن) هه‌روه‌كى ژ ده‌ف بوخارى و موسلمى هاتى (خودێ ژێ رازى بيت)، دبێژيت: (انما الاعمال بالنيات وانما لكل امرْ ما نوى) ب راستى هه‌مى كار و كريار ب ئنيه‌تانه، و ب راستى بۆ هه‌ر مرۆڤه‌كى كا چ ئنيه‌ت ئينايه دێ ئه‌و بيت.
به‌لێ ل ڤێرێ فه‌ره ئه‌ز تێبينيه‌كێ دياركه‌م ئه‌و ژى ئه‌ڤه‌يه: زانا ئه‌وێت ستران حه‌لالكرى ئه‌ز ل وێ باوه‌رێمه سه‌د ژ سه‌دێ مه‌خسه‌دا وان نه‌سترانا ئه‌ڤرۆيه ئه‌ڤا ڤيديۆ كليپكرى و سه‌رى هه‌تا بنى بێ ئه‌مريا خودێ و پێغه‌مبه‌رى (سلاڤێت خودێ لێ بن) تێدا، و ژ په‌يڤێ بگره هه‌تا ئاوازێ هه‌تا ده‌رهێنانێ و رێكا گۆتنێ ئارمانج ژێ سنج هه‌رفاندن و نه‌هێلانا تۆر و ئه‌ده‌ب و بها بلندان، و هونه‌ركرنێ د تۆماركرن و ده‌رێخستنێدا دكه‌ن دا پتر يا خرابكار و هه‌رفتنكار بيت، ئه‌ڤ ره‌نگه سترانه ناخوازيت ئه‌م به‌رامبه‌ر راوه‌ستين كا يا دورسته يان نه، حه‌لاله يان حه‌رامه، بێ گۆمان ئه‌ڤ ره‌نگه سترانه حه‌رامن و نه‌دورستن و زانا هه‌مى ئێكن ئه‌ڤه د حه‌رامن، چونكى هه‌مى پشك ژ ڤێ سترانێ خرابيێ دخوازن و بۆ خرابى و نه‌باشيآ گازي دكه‌ن، ژبه‌ر هندێ نه دڤێت گوهدانا ڤان بێته‌كرن نه هاريكاريا وان ل سه‌ر ڤان سترانا ب هه‌ر ره‌نگه‌كێ هه‌بيت هه‌كه دێ يێ پشكدار بيت د گونه‌ها واندا، و يێ ڤان سترانا دبێژيت دڤێت ل خۆ بزڤريت و تۆبه بكه‌ت و ژ خودێ بترسيت، هه‌كه ل سه‌ر ئێك و دوويا خۆ و سه‌روبه‌رێ خۆ ما و مر و تۆبه نه‌كر ئه‌ڤه هه‌تا رۆژا قيامه‌تێ، هندى گوهداريا سترانا وى بێته‌كرن، گونه‌ها وى دێ يا به‌رده‌وام بيت، ستران وى هه‌تا رۆژا قيامه‌تێ كێ بۆ گونه‌هه‌كێ پالده‌ن، و گونه‌هێ د دلێ كێدا بئارينيت، گونه‌هـ بۆ وييه و ئه‌و يێت گۆرێت خۆدا يێ ل هيڤيا خێران و خێر بۆ بێنه‌كرن، به‌لێ به‌رده‌وام گونه‌هـ دێ بۆ هێنه نڤێسين و ره‌سيدێ وان به‌رده‌وام دێ گران بيت، به‌لێ نه ژ خێران به‌لكى ژ گونه‌هان نه‌خۆزيێت وى يێ كراس و ره‌وشا وى يا هۆسا، د ڤێ رامانێدا خودێ مه‌زن دبێژيت: ((إِنَّا نَحْنُ نُحْيِي الْمَوْتَىٰ وَنَكْتُبُ مَا قَدَّمُوا وَآثَارَهُمْ وَكُلَّ شَيْءٍ أَحْصَيْنَاهُ فِي إِمَامٍ مُّبِينٍ)) ب راستى ئه‌مين مريان ساخ دكه‌ين، و كريارێت وان د ژيانا خۆدا و يێت پشتى مرنا خۆ ب پاش خۆڤه هێلاين، ئه‌م هه‌ميان دنڤێسين و هه‌مى تشت ژ كار و كريارێت به‌نده‌يان مه يێت د كتێبه‌كا دياركه‌ردا ـ مه‌خسه‌د پێ ده‌پێ پارستيه ـ هه‌ژمارتين و دياركرين ئانكو: ب هه‌ژمار مه يێت نڤێسين. و پێغه‌مبه‌رێ خودێ ژى (سلاڤێت خودێ لێ بن) د ڤه‌گێرا موسلميدا دبێژيت: (ومَنْ سَنَّ في الإِسْلامِ سُنَّه سێئه كَانَ عَليه وِزْرها وَوِزرُ مَنْ عَمِلَ بِهَا مِنْ بعْده مِنْ غَيْرِ أَنْ ينْقُصَ مِنْ أَوْزارهمْ شَيْءٌ) و هه‌ركه‌سێ د موسلمانه‌تيێدا كاره‌كێ خراب بكه‌ت، گونه‌ها وى كارى بۆ ويه، و گونه‌ها هه‌ركه‌سه‌كێ پشتى وى كار ب وى كارى بكه‌ت، بێى كو تشته‌ك ژ گونه‌هێت وان كێم ببيت. ڤێجا بلا ئه‌ڤ ره‌نگه سترانبێژه ژ خودێ بترسن و بزانن كا پشتى وان چه‌ند كه‌س سترانێت وان دبێژن و چه‌ند گوهدان بۆ دئێته‌كرن هه‌مى دێ بۆ گونه‌ه ئێنه نڤێسين، و خودێ چێتر دزانيت.
