ب / حوكمێ واسته‌كاريێ و يێ واسته‌كارى بۆ دهێته‌كرن ب بابه‌تآ خۆڤه يێ گرێدايه، هه‌كه بابه‌ت يآ دورست و حه‌لال بيت، و يێ واسته‌كارى بۆ دهێته‌كرن يێ مافداربيت، و مافێ كه‌سێ ناهێته خوارن و ژێبرن، هنگى دورسته واسته‌كارى بێته‌كرن، و به‌رگريان بێته‌كرن؛ دا ئه‌و كار سه‌ر بگريت و چێ ببيت، و د ڤى كراسيدا واسته‌كار يێ خودان خێره، و خێره‌كا مه‌زن ژى، چونكى ئه‌مرآ مه يێ هاتيه‌كرن ئه‌م هاريكارێت هه‌ڤبين ل سه‌ر خێرێ، خودێ مه‌زن فه‌رمانا مه دكه‌ت: ((وَآتُوا النِّسَاءَ صَدُقَاتِهِنَّ نِحْلَةً فَإِن طِبْنَ لَكُمْ عَن شَيْءٍ مِّنْهُ نَفْسًا فَكُلُوهُ هَنِيئًا مَّرِيئًا)) و ل سه‌ر باشى و پارێزكاريا خودێ هاريكارێت ئێك بن. ديسا خودێ مه‌زن دبێژيت: ((مَّن يَشْفَعْ شَفَاعَةً حَسَنَةً يَكُن لَّهُ نَصِيبٌ مِّنْهَا وَمَن يَشْفَعْ شَفَاعَةً سَيِّئَةً يَكُن لَّهُ كِفْلٌ مِّنْهَا )) هه‌ركه‌سێ به‌رِه‌ڤانيه‌كا خێرێ بكه‌ت مه‌هده‌را قه‌نجيێ بكه‌ت وى باره‌ك ژ وێ مه‌هده‌رێ هه‌يه. ئه‌بى موسايێ ئه‌شعه‌رى (خودێ ژێ رازى بيت) د ڤه‌گێرا بوخارى و موسلميدا دبێژيت: (كان النبي صَلّى اللهُ عَلَيْهِ وسَلَّم إِذا أَتَاهُ طالِبُ حاجه أَقْبَلَ عَلَى جُلسائِهِ فقال: اشْفَعُوا تُؤجَرُوا ويقْضي اللَّه عَلَى لِسان نَبِيِّهِ ما أَحبَّ) پێغه‌مبه‌رێ خودێ (سلاڤێت خودێ لێ بن) هه‌كه خودان هه‌وجه‌يه‌ك هاتبا ده‌ف به‌رێ خۆ ددا روينشتيێت ده‌ف خۆ (كه‌سێت ل ديوانا وى د روينشتى) و دگۆت: به‌رِه‌ڤانيێ و مه‌هده‌ريا خێرێ بكه‌ن، دێ خودان خێر بن، و كا خودێ چ ڤيا ببيت سه‌ر ئه‌زمانێ پێغه‌مبه‌رێ خۆ دئينيت. (ئانكو هوين مه‌هده‌ريێ بكه‌ن يان نه‌كه‌ن دێ هه‌ر ئه‌و بيت، يا خودێ نڤێسى، به‌لێ هه‌كه هه‌وه مه‌هده‌ريا خێرێ كر دێ خودان خێر بن، چ ئه‌و شۆل ببيت يان نه). و ب راستى واسته‌كارى و مه‌هده‌ريا خێرێ كاره‌كێ باشه، و پێغه‌مبه‌رى (سلاڤێت خودێ لێ بن) به‌رێ مه يێ دايێ و كاره‌كێ باش و ب خێر دانايه، چونكى دويفچۆنا هه‌وجه‌ييا هه‌وجه‌خوازيه، و بۆ ڤى كارى پێغه‌مبه‌رآ خۆشتڤى (سلاڤێت خودێ لێ بن) د ڤه‌گێرا موسلميدا دبێژيت: (واللَّه فِي عوْنِ العبْد ما كانَ العبْدُ في عوْن أَخيهِ) ئانكو: و به‌رده‌وام خودێ يێ د هاريكاريا به‌نده‌يدا هندى به‌نده د هاريكاريا برايێ خۆدا بيت (ئانكو هه‌وجه‌يێت وى بقه‌تينيت) و د ڤه‌گێرا حاكميدا دبێژيت: (ولأن يمشي أحدكم مع أخيه في قضاء حاجته أفضل من أن يعتكف في مسجدي هذا شهرين). و هه‌كه ئێك ژ هه‌وه بچيت هه‌وجه‌ييا برايێ خۆ بقه‌تينيت باشتره ئه‌و دوو هه‌يڤان خۆ ڤالابكه‌ت بۆ عيباده‌تى د ڤێ مزگه‌فتا مندا، و ئيمام عه‌لى (خودێ ژێ رازى بيت) دبێژيت: (ولأن أقضي لامرئ مسلم حاجه أحب إلي من ملء الأرض ذهبا وفضه) هه‌كه ئه‌ز هه‌وجه‌ييه‌كا موسلمانه‌كى بقه‌تينم من پێخۆشتره ژ تژى عه‌ردى زێر و زيف.
ڤێجا هه‌كه به‌رگه‌ريان و واسته‌كارى و مه‌هده‌رى بۆ كاره‌كێ دورست بيت و بۆ مرۆڤه‌كێ مافداربيت كاره‌كێ باشه و يێ دورسته و ژ لايێ خودێ و پێغه‌مبه‌رێ ويڤه فه‌رمانپێكريه.
به‌لێ هه‌كه بۆ بابه‌ته‌كێ نه‌دورست بيت يان بۆ مرۆڤه‌كێ نه‌مافداربيت يان ببيته ئه‌گه‌رێ خوارنا مافداره‌كى.. هنگى گونه‌هه و هاريكاريه ل سه‌ر گونه‌هێ، و ئه‌م د فه‌رمانكرينه هاريكاريا هه‌ڤدوو ل سه‌ر گونه‌هێ نه‌كه‌ين، خودێ مه‌زن دبێژيت: ((وَلَا تَعَاوَنُوا عَلَى الْإِثْمِ وَالْعُدْوَانِ وَاتَّقُوا اللَّهَ إِنَّ اللَّهَ شَدِيدُ الْعِقَابِ )) و ل سه‌ر گونه‌هـ و ده‌ست درێژيێ هاريكارێت ئێك نه‌بن. و يێ ڤێ واسته‌كاريێ بكه‌ت پشكداره د گونه‌هێدا بلا چو نه‌گه‌هيته وى ژى، خودێ مه‌زن دبێژيت: ((وَمَن يَشْفَعْ شَفَاعَةً سَيِّئَةً يَكُن لَّهُ كِفْلٌ مِّنْهَا وَكَانَ اللَّهُ عَلَىٰ كُلِّ شَيْءٍ مُّقِيتًا)) و هه‌ركه‌سێ به‌رِه‌ڤانيا خرابيێ بكه‌ت، باره‌ك ژ گونه‌ها وێ به‌رِه‌ڤانيێ بۆ ويه، و خودێ ل سه‌ر هه‌مى تشتان ده‌ستهه‌لاتدار و شاهده جزايى به‌رانبه‌ر هه‌مى تشتان دده‌ت. و هه‌كه بابه‌ت يێ دورست بيت به‌لێ يێ واسته‌كارى بۆ دهێته‌كرن نه‌يێ مافداربيت گونه‌هه و نه‌دورسته، ڤێجا دڤێت ئه‌ڤێ ب كارێ مه‌هده‌رى و واسته‌كاريێ رادبيت بلا ده‌هجاركى هزرا خۆ بكه‌ت هه‌تا ب وى كارى راببيت هه‌كه بابه‌ت و داخوازكه‌ر د مافداربن بلا ب مه‌هده‌ريێ رابيت و يێ خودان خێره، و هه‌كه نه‌يێ مافداربيت هنگى يێ گونه‌هكاره و دڤێت پێ نه‌رابيت، و خودێ چێتر دزانيت.
