ب / پێغه‌مبه‌رێ خودێ (سلاڤێت خودێ لێ بن) زكر و ته‌سبيح ب تلێت ده‌ستێ خۆ يێ راستێ يێت كرين، و به‌رێ مه يێ دايه هندێ ئه‌م ب تلان بكه‌ين، چونكى تل بۆ مرۆڤى رۆژا قيامه‌تێ دبنه شاهد، به‌لێ دگه‌ل هندێ ژى ژ پێغه‌مبه‌رێ خۆشتڤى (سلاڤێت خودێ لێ بن) هاتيه زانين په‌سندكرن و ئيقرارا وى ته‌سبيح و زكر ب به‌ركان و ب به‌ركێت قه‌سپان بێته‌كرن. سه‌عدێ كورێ ئه‌بى وه‌قاس (خودێ ژێ رازى بيت) دبێژيت: پێغه‌مبه‌رآ خودێ (سلاڤێت خودێ لێ بن) ژنه‌ك ديت هنده به‌رك ل به‌ر سينگێ وێ بوون، و زكر پێ دكر، و پێغه‌مبه‌رێ خودێ (سلاڤێت خودێ لێ بن) ده‌ينه‌كرێ و نه‌گۆتێ ئه‌ڤه نه‌دورسته، ديسا سه‌فيا ده‌يكا مه موسلمانان (خودێ ژێ رازى بيت) دبێژيت: پێغه‌مبه‌رێ خودێ (سلاڤێت خودێ لێ بن) هاته ده‌ف من و چار هزار به‌ركێت قه‌سپان ل به‌ر سينگێ من بوون، من ته‌سبيح پێ دكر، ئينا گۆت: ((يا كچا حويه‌ى ئه‌ڤه چى يه))؟ من گۆت: ئه‌ز ته‌سبيحان پێ دكه‌م، ئينا گۆت: ((ئه‌ڤه ئه‌ز ل هنداڤ سه‌رێ ته راوه‌ستيايم من پتر ژ ته يێت كرين))، من گۆت: نيشا من بده يا پێغه‌مبه‌رێ خودێ، گۆت: بێژه ((سبحان الله عدد ما خلق)). حاكمى ئه‌ڤ حه‌ديسه ڤه‌گێرايه و دبێژيت: ئه‌ڤ حه‌ديسه دويف مه‌رجێت بوخارى و موسلميه و وان نه‌ڤه‌گێرايه. ئيمامێ شه‌وكانى دبێژيت: ئه‌ڤ هه‌ردوو حه‌ديسه به‌لگه و ده‌ليلن ل سه‌ر دورستيا ته‌سبيحاتان ب به‌ركێت قه‌سپان و به‌ره‌شيشكان و ب تزبيان ژى، چونكى جوداهي د ناڤبه‌را واندا نه د رامانێدايه، چونكى پێغه‌مبه‌رى (سلاڤێت خودێ لێ بن) دوو جارا يا ديتى زكر ب به‌ركێت قه‌سپان، يان به‌ره‌شيشكان يێ هاتيه‌كرن و ده‌ينه‌كريه، و ئاراسته‌كرنا وى بۆ تشتێ باشتر نه‌دورستيا ته‌سبيحكرنآ ب به‌ره‌شيشكان و به‌ركێت قه‌سپان و تزبيان و هه‌رتشتآ دى ناراگه‌هينيت، و چه‌ند پێزانين ژى ژ سه‌حابان يێت هاتين زكر و ته‌سبيح ب به‌ره‌شيشكان دكرن ئه‌بو سه‌فييه ئازاكريآ پێغه‌مبه‌رى (سلاڤێت خودێ لێ بن) كه‌ڤله‌ك بۆ دهاته دانان و زه‌نبيله‌ك ددانا سه‌ر يا تژى به‌رك بوو سپێدآ هه‌تا نيڤا رۆژآ ته‌سبيحات پآ دكرن پاشى دهاته راكرن هه‌تا نڤێژا نيڤرۆ كربا و پاشى جاره‌كا دى دا دانيته‌ڤه و ته‌سبيح پآ دكر هه‌تا ئێڤار لێ دبوو. ديسا ئبن سه‌عد د ته‌به‌قاتێدا دبێژيت: سه‌عدآ كورآ ئه‌بى وه‌قاس (خودێ ژێ رازى بيت) ته‌سبيح ب به‌ركێت قه‌سپان دكر، و ئيمام ئه‌حمه‌د ژ ئه‌بو هوره‌يره وى به‌ندكه‌ك هه‌بوو هزار گرێك لێ بوون نه‌دنڤست هه‌تا ته‌سبيح پآ نه‌كربا، ديسا ئيمام ئه‌حمه‌د ڤه‌دگوهێزيت دبێژيت: ئه‌بو ده‌ردائى (خودێ ژێ رازى بيت) كيسكه‌كێ به‌ركێت قه‌سپان هه‌بو ده‌مێ نڤێژا سپێدێ دكر ته‌سبيح پێ دكر هه‌تا كيسك ڤالاكربا، و ئيمامێ سيوتى بابه‌ته‌ك ب ڤى ناڤى (المنحة في السبحة) د كتێبا خۆدا (المجموع في الفتاوى) ئينايه، و دويماهيێ دبێژيت: ژ كه‌سه‌كێ ژ سه‌له‌فان و دويف هاتيان نه‌هاتيه زكر و ته‌سبيحكرن ب تزبحان نه‌دورسته يان نه‌باشه و مه‌كروهه پشتى ژ پێغه‌مبه‌رێ خۆشتڤى (سلاڤێت خودێ لێ بن) هاتيه زانين سه‌حابى يێت ديتين زكرى ب به‌ركان دكه‌ن و خۆ بێده‌نگ كريه، و هاتيه زانين پتر ژ سه‌حابيه‌كى زكر ب به‌ركان دكر ئه‌ڤه به‌لگه و ده‌ليله زكر ب تزبحان دورسته و نه‌بيدعه‌يه، و نه‌دورسته ب بيدعه بێته زانين. دمينيت ئه‌م بێژين كيژ باشتره ب تلان بێته‌كرن يان ب تزبحان؟! زانايێت مه دبێژن: هه‌كه هه‌ژمار ل به‌ر مرۆڤى به‌رزه نه‌بيت ب تلان باشتره، به‌لێ هه‌كه هژمار دێ ل به‌ر به‌رزه بيت و نوزانيت كا چه‌ند كرن نه‌خاسمه ئه‌و زكرێت ب هه‌ژمار بۆ مه هاتين ب تزبحان باشتره، و خودێ چێتر دزانيت.
