ب / نه‌خێر زكرێ سپێدێ و ئێڤاران وه‌ختێ خۆ يێ ئاشكرا يێ هه‌ى، و دڤێت زكرێ سپێدێ و ئێڤاران بكه‌ڤيته د وى وه‌ختيدا هه‌تا جهێ خۆ بگرت، هه‌كه وه‌كو دى زكر و ته‌سبيحاتن هه‌روه‌ختێ مرۆڤ بكه‌ت به‌ره‌كه‌ت و خێرا خۆ يا هه‌ى، و زانا ل سه‌ر وه‌ختێ زكرێ سپده و ئێڤاران ژێكجودانه:
زكرێ سپده‌يان ل سه‌ر سێ بۆچۆنان د ژێكجودانه:
1ـ زكرێ سپێده‌يان پشتى بانگێ سپێدێ ده‌ست پێ دكه‌ت و دكێشيت هه‌تا رۆژ ئاڤا دبيت، و ئه‌ڤه بۆچۆنا ئبن جزريه (خودێ ژێ رازى بيت) هه‌روه‌كى شه‌وكانى ڤه‌گوهاستي.
2ـ زكرێ سپێده‌يان پشتى بانگێ سپێدێ ده‌ست پێ دكه‌ت و ب هه‌لاتنا رۆژێ ب دويماهى دهێت، و ئه‌ڤه بۆچۆنا ئيمام ئبن ته‌يميه و ئبن قه‌يمى يه خودێ ژ هه‌ردوويان رازى بيت.
3ـ وه‌ختێ بژاره يێ زكرێ سپێده‌يان ژ ده‌ركه‌فتنا سپێدێ ده‌ست پێ دكه‌ت هه‌تا ده‌ركه‌فتنا رۆژێ و ئه‌و وه‌ختێ مايى و ناڤێ سپێدێێ ل سه‌ر بيت دكه‌ڤيته بن وه‌ختێ زكرێ سپێده‌يان.
و ديسا وه‌ختێ زكرێ ئێڤاران ژى زانا ل سه‌ر وه‌ختێ وێ د جودانه ل سه‌ر سێ بۆچۆنان:
1ـ وه‌ختێ زكرآ ئێڤاران پشتى ئێڤار دبيت ده‌ست پێ دكه‌ت و ب رۆژئاڤابوونێ ب دويماهى دهێت، و ئه‌ڤه بۆچۆنا ئيمام ئبن ته‌يميه و ئبن قه‌يمى يه خودێ ژ هه‌ردوويان رازى بيت.
2ـ وه‌ختێ زكرێ ئێڤاران ژ مه‌غره‌ب ده‌ست پێ دكه‌ت و دكێشيت هه‌تا بانگێ سپێدێ، و ئه‌ڤه بۆچۆنا ئبن جزريه (خودێ ژێ رازى بيت).
3ـ وه‌ختێ بژاره يێ زكرێ ئێڤاران دگه‌ل ئێڤارێ ده‌ست پێ دكه‌ت هه‌تا رۆژ ئاڤابوونێ و هندى وه‌خت مابيت بێژنێ ئێڤار ژ وه‌ختێ زكرێ ئێڤاران حسێبه، و ب راستى د وه‌ختێ زكرێ سپێده و ئێڤاراندا ئه‌ز بۆچۆنا ئبن ته‌يميه (خودێ ژێ رازى بيت) ب هێزتر ددانم، به‌لێ يێ نه‌گه‌هشت يان ژبيرێ چۆ دشێت بۆچۆنا سيێ بگريت، چونكى مه‌زنيا به‌ره‌كه‌تا زكرێ سپێده و ئێڤاران دخوازيت ئه‌و خێرا تێدا بگه‌هيته مرۆڤى هه‌روه‌كى ئبن حه‌جه‌ر (خودێ ژێ رازى بيت) دبێژيت، و خودێ چێتر دزانيت.
