ب / هه‌كه مه بڤێت دوعايا مه پتر نێزيكى قه‌بويلكنێ بيت، دڤێت رێز و ره‌وشتێت وێ به‌رچاڤ وه‌رگرين، و پێشيا دوعايا خۆ بێخين، دا دوعايا مه پتر نێزيكى قه‌بويلبوونێ ببيت، و يێت ژ هه‌ميان فه‌رتر ئه‌ڤه‌نه:
ئێك: خۆدويركرن ژ خوران و ڤه‌خوارن و جلكێ حه‌رام، و ب راستى هه‌ركه‌سێ بكه‌ڤيته د حه‌راميدا نه دوعايێت وى قه‌بويل دبن، و نه ئه‌وێت بۆ دهێنه‌كرن، پێغه‌مبه‌ر (سلاڤێت خودێ لێ بن) دبێژيت: ((زه‌لامێ هه‌ى يێ وه‌غه‌ر درێژه و يێ سه‌ر قژه‌ڤژ و تۆزه‌كيه، ده‌ستێ خۆ بۆ عه‌سمانى بلند دكه‌ت و دبێژيت: خودێ وۆ، خودێ وۆ و خوارنا وى يا حه‌رامه و كه‌دا وى يا حه‌رامه، و ب حه‌رامى يێ رابووى، ڤێجا ما چاوا دێ ژێ هێته قه‌بويلكرن؟! ئيمام موسلمى و ترمزى ڤه‌گێرايه.
دوو: حه‌مد و په‌سنا خودێ بێته‌كرن، و سلاڤ و سه‌له‌وات ل سه‌ر پێغه‌مبه‌رى (سلاڤێت خودێ لێ بن) بێنه‌دان، پاشى دوعا بێته‌كرن، پێغه‌مبه‌رێ خۆشتڤى (سلاڤێت خودێ لێ بن) د مزگه‌فتێڤه يێ روينشتى بوو، زه‌لامه‌ك ب ژۆر كه‌فت و نڤێژ كر و گۆت: يا خودێ ل گونه‌هێت من ببۆره و دلۆڤانيێ ب من ببه، ئينا پێغه‌مبه‌رى (سلاڤێت خودێ لێ بن) گۆتێ: ((هه‌ى نڤێژكه‌ر، ته له‌زكر، ئه‌گه‌ر ته نڤێژ كر و تو روينشتى، حه‌مدا خودێ بكه، وه‌كى ئه‌و هه‌ژى، و سلاڤ و سه‌له‌واتان بده سه‌ر من، پاشى دوعا ژ خودێ بكه)). ئيمام ترمزى ڤه‌گێرايه.
سێ: به‌رێ خۆ بده قيبلێ و دوعا بكه، چونكى ئه‌و جهه يێ هه‌مى موسلمان د په‌رستنا خۆدا به‌رێ خۆ دده‌نێ، و چونكى پێغه‌مبه‌ري (سلاڤێت خودێ لێ بن) باراپتر د دوعايێت خۆدا به‌رێ خۆ ددا قيبلێ.
چار: ده‌ست بلندكرن هه‌تا دگه‌هنه راستا ملان، و ئه‌ڤه سيه جاران يا ژ پێغه‌مبه‌رى (سلاڤێت خودێ لێ بن) هاتيه ڤه‌گوهاستن، ژبه‌ر هندێ سونه‌ته د هه‌مى دوعاياندا ده‌ست بێنه بلندكرن ئه‌و نه‌بن ئه‌وێت ژێ هاتيه ڤه‌گوهاستن كو نابيت و نه‌يا دورسته ده‌ست تێدا بێنه بلندكرن، وه‌كى دوعايێت د نڤێژێدا دئێنه‌كرن، وه‌كى دى هه‌مى دوعايێت دى سونه‌ته ده‌ست بێنه بلندكرن هه‌روه‌كى قه‌سته‌لانى ڤێ د كتێبا (ارشاد الساري، شرح صحيح البخاري)دا دبێژيت.
پێنج: دوعا ب ترس و شكاندن بێنه‌كرن، چونكى ئه‌وێ دوعا ژێ دئێته‌كرن، خودانێ ئه‌رد و ئه‌سمانانه، و هندى د ناڤبه‌را واندا هه‌ى، و خودێ مه‌زن ب ڤى ره‌نگى فه‌رمانا مه دكه‌ت: ((ادْعُوا رَبَّكُمْ تَضَرُّعًا)) خۆشكاندى دوعا ژ خودايێ خۆ بكه‌ن.
شه‌ش: دوعا ژ خودێ ب باشناڤێت وى يێت پاك و پاقژ بكه‌ن، ئه‌وێت هه‌ر جارا داخوازى پێ هاته‌كرن، خودێ بده‌ته مرۆڤى، و دوعا پێ هاته‌كرن بێته قه‌بويلكرن، خودێ مه‌زن ئه‌مر دكه‌ت: ((وَلِلَّهِ الْأَسْمَاءُ الْحُسْنَىٰ فَادْعُوهُ بِهَا )) خودێ باشناڤێت هه‌ين دوعا ژ وى پێ بكه‌ن.
حه‌فت: كاره‌كێ قه‌نج و باش پێش دوعايێ بێته ئێخستن، چ خێر و سه‌ده‌قه بيت، يان هه‌ر تشته‌كێ دى يێ خودێ پێ خۆش بيت.
هه‌شت: هندى ته پێچێبيت بلا ئه‌و دوعا بن، ئه‌وێت ژ پێغه‌مبه‌رى (سلاڤێت خودێ لێ بن) هاتينه ڤه‌گوهاستن يان ئه‌و دوعايێت د قورئانێدا هاتين، چونكى هه‌روه‌كى ئيمامێ غه‌زالى (خودێ ژێ رازى بيت) دبێژيت: نه‌هه‌ركه‌سێ هه‌بيت دزانيت جوان دوعا بكه‌ت، دبيت هنده دوعايێت نه‌يێت دورست بكه‌ت، و زێده‌گاڤيان بكه‌ت، ژبه‌ر هندێ ئه‌گه‌ر ئه‌و دوعا بن ئه‌وێت ژ پێغه‌مبه‌رى (سلاڤێت خودێ لێ بن) هاتينه ڤه‌گوهاستن چێتره.
نه‌هـ: گونه‌هێت خۆ ل سه‌ر خۆ ئاشكه‌را بكه‌ت و دياركه‌ت، كو ئه‌و يێ گونه‌هكاره، و هه‌ر ژبه‌ر هندێ يوونس پێغه‌مبه‌رى (سلاڤێت خودێ لێ بن) ب ڤى ره‌نگى د زكێ نه‌هنگيدا گازى خودايێ خۆ كر ((فَنَادَىٰ فِي الظُّلُمَاتِ أَن لَّا إِلَٰهَ إِلَّا أَنتَ سُبْحَانَكَ إِنِّي كُنتُ مِنَ الظَّالِمِينَ)) د تاريستاناندا هه‌واركر: يا خودێ.. ب راستى ژبلى ته چو په‌رستى نينن، پاك و پاقژى ژ هه‌مى كێماسيان هه‌ر بۆ ته‌يه، ب راستى ئه‌ز هێژاى ڤي جزايى مه من سته‌مكارى ل خۆ كر. و هه‌ر ژبه‌ر هندێ ژى ئه‌ڤ دوعايه ژ دوعايێت زێده مه‌زنه و ب قه‌در دئێته زانين. و ئه‌و دوعايا مرۆڤ گونه‌هێت خۆ ل سه‌ر خۆ ئاشكه‌را دكه‌ت و دانپێدانێ و ئعتيرافى دكه‌ت، پێغه‌مبه‌ر (سلاڤێت خودێ لێ بن) ب (سيد الاستغفار) ددانيت و دبێژيت: ((سه‌ردارا دوعايا گونه‌هـ ژێبرنێ ئه‌ڤه‌يه: به‌نده بێژيت: (خودێ وۆ تو خودانێ منى، ژبه‌لى ته من چو خودان نينن، ته ئه‌ز يێ چێكريم و ئه‌ز به‌نده‌يێ ته‌مه، و ئه‌ز يێ ل سه‌ر وێ سۆز و په‌يمانا ته ژ مه وه‌رگرتى، هندى ئه‌ز بشێم، ئه‌ز خۆ ب ته دپارێزم ژ خرابيا من كرى، و ئه‌ز كه‌ره‌مێت ته ل سه‌ر خۆ ئاشكه‌را دكه‌م و ئه‌ز دانپێدانێ و ئعتيرافى ب گونه‌هێت خۆ ژى دكه‌م، ڤێجا گونه‌هێت من ژێببه، ب راستى كه‌س گونه‌هان ژێ نابه‌ت تو نه‌بى)). پاشى پێغه‌مبه‌رى گۆت: ((هه‌ركه‌سێ ڤێ دوعايێ ب باوه‌ريه‌كا موكوم رۆژێ بێژيت و پاشى د رۆژا خۆدا بمريت به‌رى لێ ببيت ئێڤار، ئه‌و خه‌لكێ به‌حه‌شتێيه، و هه‌ركه‌سێ ڤێ دوعايێ ب باوه‌ريه‌كا موكوم شه‌ڤێ بێژيت، و پاشى بمريت به‌رى لێ ببيت رۆژ، ئه‌و خه‌لكێ به‌حه‌شتێيه. ئيمام بوخارى ڤه‌گێرايه.
ده‌هـ: دوعا بۆ خۆ بكه‌ت پاشى بۆ وى بكه‌ت يێ بۆ بڤێت.
يازده: و هه‌كه ئيمام بيت دڤێت دوعايا بۆ خۆ ب تنێ نه‌كه‌ت، نه‌خاسمه د وان دوعاياندا ئه‌وێت ئه‌و ده‌نگێ خۆ پێ بلند دكه‌ت.
دوازده: ئێكدلكرن د دوعايێدا، هه‌روه‌كى پێغه‌مبه‌ر (سلاڤێت خودێ لێ بن) دبێژيت: ((كه‌س ژ هه‌وه نه‌بێژيت: خودێ وۆ هه‌كه ته بڤێت گونه‌هێت من ژێببه، و هه‌كه ته بڤێت دلۆڤانيێ ب من ببه، و هه‌كه ته بڤێت رزقێ من زێده بكه، و بلا دوعا خۆ بكه‌ته ئێك، خودێ وێ دكه‌ت يا وى بڤێت و كه‌س نينه خورتيێ ل خودێ بكه‌ت)). ئيمام بوخارى ڤه‌گێرايه.
سێزده: دل يێ ئاماده بيت و يێ بێ ئاگه‌هـ نه‌بيت، و دلێ ئاگه‌هـ ژ خۆ نه، و يێ غافل خودێ دوعا ژێ قه‌بويل ناكه‌ت.
چارده: دوعا چه‌ند جارى و ب لاڤلاڤ بێته‌كرن. پێغه‌مبه‌ر (سلاڤێت خودێ لێ بن) هه‌رجارا دوعا كربا دوباره دكر، ديسا پێغه‌مبه‌ر (سلاڤێت خودێ لێ بن) دبێژيت: ((خودێ حه‌ژ وان دكه‌ت ئه‌وێت لاڤلاڤێ دكه‌ن و دميننه ب دوعايێڤه. ئيمام به‌يهه‌قى ڤه‌گێرايه.
پازده: دلۆڤانيا خودێ به‌رته‌نگ نه‌كه‌ت، و ئه‌و ب خۆ يا به‌رفره‌هه. پێغه‌مبه‌رى (سلاڤێت خودێ لێ بن) گول كۆچه‌ره عه‌ره‌به‌كي بوو دگۆت: خودێ وۆ دلۆڤانيێ ب من و موحه‌ممه‌دى ببه و دلۆڤانيێ ب كه‌سێ دى دگه‌ل مه نه‌به. ئينا پێغه‌مبه‌رى (سلاڤێت خودێ لێ بن) گۆتێ: ته تشته‌كێ به‌رفره‌ه به‌رته‌نگ كر. ئيمام بوخارى ڤه‌گێرايه.
شازده: دويماهيا دوعايێ (ئامين) بێته گۆتن، ئانكو: يا خودێ دوعا من قه‌بويل بكه، پێغه‌مبه‌رى (سلاڤێت خودێ لێ بن) گول زه‌لامه‌كي بوو دوعا دكرن، (سلاڤێت خودێ لێ بن) گۆت: دوعايێت وى قه‌بويل بوون هه‌كه ب (ئامين) ب دويماهى بينيت. ئيمام ئه‌بو داوود ڤه‌گێرايه.
هه‌ڤده: پشتى ب دويماهى دهێت ده‌ستێت خۆ ب سه‌ر و چاڤێت خۆدا بينيته خوارێ.
هه‌ژده: له‌زێ نه‌كه‌ت و بێژيت: من دوعاكرن و نه‌هاتنه قه‌بويلكرن، و مه‌خسه‌د ژ له‌زێكرنێ نه‌ئه‌وه: مرۆڤ بێژيت خودێ وۆ بۆ من له‌زێ ل فلان تشتى بكه، به‌لێ له‌زكرن ئه‌ڤه‌يه بێژيت: من دوعاكرن و نه‌هاتنه قه‌بويلكرن، و پێغه‌مبه‌ر (سلاڤێت خودێ لێ بن) دبێژيت: ((خودێ به‌رده‌وام دێ دوعايا به‌نده‌ى قه‌بويلكه‌ت هندى ئه‌و له‌زێ نه‌كه‌ت)) ئيمام بوخارى و موسلمى ڤه‌گێرايه، و له‌ز ژى ئه‌وه يا مه گۆتى.
نازده: دوعا بۆ هه‌ر تشته‌كێ ئه‌و هه‌وجه بكه‌ت، چ د بچويك بن يان مه‌زن، و يێت هوير و گر، و نه‌بێژيت: ئه‌ڤ هه‌وجه‌ييه يا بچويكه، و به‌رناكه‌ڤيت دوعا بۆ بكه‌م، و گه‌له‌ك مرۆڤ يێت هه‌ين ژ ڤێ چه‌ندێ د بێ ئاگه‌هن، دوعا چو هه‌وجه‌ييا ناكه‌ن، نه‌خۆشيه‌كا مه‌زن نه‌بيت ب سه‌رى بهێت، و ئه‌ڤه يا خه‌له‌ته پێدڤيه مرۆڤێ موسلمان بۆ تشتێ هوير و گر، دوعا ژ خودێ بكه‌ت، چونكى هه‌كه خودێ بۆ مه ب ساناهى نه‌كه‌ت و حه‌زكرنا وى دگه‌ل نه‌بيت، ئه‌م نه‌شێين فرِه‌كا ئاڤێ ژى ڤه‌خۆين يان پاريه‌كێ نانى بخۆين. پێغه‌مبه‌ر (سلاڤێت خودێ لێ بن) دبێژيت: دوعا هه‌مى تشتان ژ خودێ بكه‌ن هه‌تا بۆ به‌نكێ شمكا خۆ ژى، و هه‌كه خودێ ساناهى نه‌كه‌ت ساناهى نابيت. ئيمام ترمزى ڤه‌گێرايه.
بيست: ده‌نگ زێده نه‌هێته بلندكرن د دوعايێدا.
بيست و ئێك: لێ بگه‌ريت دوعايێت خۆ بێخيته د جهێت پيرۆزدا، ئه‌و جهێت خودێ پيرۆزكرين و دوعا پتر تێدا دهێنه قه‌بويلكرن.
بيست و دوو: لێ بگه‌ريت دوعايێت خۆ بێخيته د وه‌ختێت پيرۆزدا، ئه‌و وه‌ختێت دوعا چێتر تێدا دهێنه قه‌بويلكرن، و خودێ چێتر دزانيت.
