ب / نه‌خێر هه‌مى جه وه‌كى ئێك نينن، جه ژ جهى جودايه. ڤێجا يا فه‌ر دوعاكه‌ر لێ بگه‌ريت دوعايێت خۆ بێخيته د جهێت پيرۆزدا، ئه‌و جهێت خودێ پيرۆزكرين و دوعا پتر تێدا دهێنه قه‌بويلكرن، و مه‌خسه‌د نه‌ئه‌وه دوعا د هنده جهاندا دهێنه قه‌بويلكرن و د هنده‌كاندا نه، ئه‌م نه‌شێين بێژين.. به‌لێ ئه‌م دشێين بێژين هنده جه ژ هنده‌كان پيرۆزترن و پتر جهێ هندێنه مرۆڤ دوعا تێدا بكه‌ت و هيڤى هه‌بن دێ هێنه قه‌بويلكرن. ئه‌و ژى ئه‌ڤ جهه‌نه:
1 ـ ل مالێت خودێ، نه‌خاسمه ل هه‌رسێ مزگه‌فتێت پيرۆز: كه‌عبه‌يێ و مزگه‌فتا پێغه‌مبه‌رى (سلاڤێت خودێ لێ بن) و مزگه‌فتا قودسێ.
2 ـ ل ته‌وافێ، نه‌خاسمه د ناڤبه‌را كوژيێ يه‌مانى و به‌رێ ره‌شدا.
3 ـ ل ده‌ف جهێ ئيبراهيم پێغه‌مبه‌ر (سلاڤێت خودێ لێ بن) ل مزگه‌فتا كه‌عبه‌يێ.
4 ـ ل سه‌ر ئاڤا زمزم.
5 ـ ل سه‌فا و مه‌روايێ.
6 ـ ل عه‌ره‌فێ.
7 ـ ل موزده‌ليفێ.
8 ـ ل مينايێ و دگه‌ل ره‌جما شه‌يتانى و هه‌رسێ رۆژان، و خودێ چێتر دزانيت.
