ب / بێ گۆمان كا چاوا هنده جه يێت هه‌ين د جودانه و خودێ يێت پيرۆزكرين، هۆسا هنده ده‌م ژى يێت هه‌ين ژ غه‌يرى خۆ د جودانه، و خودێ يێت پيرۆزكرين، ژبه‌ر هندێ فه‌ره دوعاكه‌ر لێ بگه‌ريت دوعايێت خۆ بێخيته د وه‌ختێت پيرۆزدا، ئه‌و وه‌ختێت دوعا چێتر تێدا دهێنه قه‌بويلكرن، و مه‌خسه‌د نه‌ئه‌وه دوعا د هنده وه‌ختاندا دهێنه قه‌بويلكرن و د هنده‌كاندا نه، ئه‌م نه‌شێين بێژين.. به‌لێ ئه‌م دشێين بێژين هنده وه‌خت ژ هنده‌كان پيرۆزترن و پتر جهێ هندێنه مرۆڤ دوعا تێدا بكه‌ت و هيڤى هه‌بن دێ هێنه قه‌بويلكرن.
1 ـ وه‌ختێ سوجده‌يێ، چونكى سوجده خۆسپارتنه و خۆچه‌ماندنه بۆ خودێ و پارچه‌يه‌كه ژ نڤێژێ، و نڤێژ ژى خۆشڤيترين په‌رستنه بۆ خودێ، و هه‌ر ژبه‌ر هندێ ژى پێغه‌مبه‌رێ خۆشتڤى (سلاڤێت خودێ لێ بن) دبێژيت: ((جهێ پتر هه‌ميان به‌نده تێدا نێزيكى خودێ وه‌ختێ ئه‌و د سوجده‌يێدا، ڤێجا گه‌له‌ك دوعايان تێدا بكه‌ن)). ئيمام موسلمى ڤه‌گێرايه.
2 ـ د ناڤبه‌را بانگى و قامه‌تێدا، چونكى ئه‌ڤه وه‌خته‌كه به‌نده‌يێت موسلمان ب ده‌ست نڤێژێڤه مژويل دبن، دا خۆ كاركه‌ن و ل به‌ر ده‌ستێت خودێ براوه‌ستن، ژبه‌ر هندێ ئه‌ڤ وه‌خته هه‌ژيتره دوعا تێدا بێنه قه‌بويلكرن. پێغه‌مبه‌ر (سلاڤێت خودێ لێ بن) دبێژيت: ((دوعا د ناڤبه‌را بانگى و قامه‌تێدا ناهێته زڤرين)). به‌يهه‌قي و ئه‌بو داوود ڤه‌گێرايه.
3 ـ پشتى نڤێژا عه‌يشا هه‌تا سپێده دهێت. د ڤى وه‌ختيدا سه‌عه‌ته‌ك و ده‌مه‌كێ هه‌ى هه‌كه دوعا مرۆڤێ موسلمان كه‌فته تێدا، پێغه‌مبه‌ر(سلاڤێت خودێ لێ بن) دبێژيت: ((د شه‌ڤێدا ده‌مه‌كێ هه‌ى، نينه دوعايا مرۆڤه‌كێ موسلمان بكه‌ڤيته تێدا تشته‌كي بخوازيت ژ خێرا دنيايێ و ئاخره‌تێ هه‌كه خودێ نه‌ده‌تێ و ئه‌ڤه يا د هه‌مى شه‌ڤاندا هه‌ى)). ئيمام موسلمى ڤه‌گێرايه.
4 ـ نيڤا شه‌ڤێ و سێكا وێ يا دويماهيێ: پێغه‌مبه‌ر (سلاڤێت خودێ لێ بن) دبێژيت: ((ده‌رگه‌هێت عه‌سمانى نيڤا شه‌ڤێ ڤه‌دبن و گازيكه‌ره‌ك گازى دكه‌ت: كى هه‌يه دوعا بكه‌ت ژێ بێنه قه‌بويلكرن، كى هه‌يه داخوازه‌كێ بكه‌ت بۆ بێته ب جهئينان، كى هه‌يه د به‌رته‌نگيه‌كێدا ژ سه‌ر بێته راكرن)). ئيمام بوخارى و موسلمى ڤه‌گێرايه.
5 ـ به‌رى نڤێژا نيڤرۆ ب ده‌مه‌كێ كێم. پێغه‌مبه‌ر (سلاڤێت خودێ لێ بن) دبێژيت: ((چار ركعه‌تێت به‌رى نڤێژا نيڤرۆ ده‌رگه‌هێت عه‌سمانى بۆ ڤه‌دبن)). ئيمام ترمزى ڤه‌گێرايه.
6 ـ شه‌ڤا خوتبه و رۆژا خوتبه و وه‌ختێ خوتبێ: رۆژا خوتبه رۆژه‌كا زێده پيرۆزه و سه‌عه‌ت و ده‌قيقه‌يێت وێ ژى پيرۆزن، و رۆژا خوتبه ب قه‌در و بهايێ خۆڤه ب سه‌ر هه‌مى رۆژێت دى دكه‌ڤيت، و گه‌له‌ك حه‌ديس ب ڤێ چه‌ندێ يێت هاتين و هه‌مى ديار دكه‌ن كو رۆژا خوتبێ پيرۆزترين رۆژه و هنده تايبه‌تمه‌نديێت تێدا د رۆژێت ديدا نينن، و گه‌له‌ك زانايان ئه‌ڤ تايبه‌تمه‌نديه يێت د كتێبێت خۆدا ئيناين، و زانايێ ناڤدار (ابن القيم) يێت گه‌هاندينه بيست و چه‌نده‌كا، و زانايێ مه‌زن (مجد الدين اللغوي) د كتێبا خۆدا (سفر السعاده) ئه‌ڤ تايبه‌تمه‌نديه يێت ئيناين، و زانايێ ناڤدار (سيوتي) د كتێبا (في نور اللمعه) يێت كۆمكرين و گه‌هاندينه سه‌د تايبه‌تمه‌نديان. پێغه‌مبه‌ر (سلاڤێت خودێ لێ بن) دبێژيت: ((قه‌درترين رۆژێت هه‌وه رۆژا خوتبه‌يه، د وێ رۆژێدا ئاده‌م يێ هاتيه چێكرن، و د وێ رۆژێدا روحا وى يا هاتيه كێشان، و رۆژا قيامه‌تێ ژي دێ د وێ رۆژێدا بيت، ڤێجا زێده سه‌له‌واتان تێدا بده‌نه سه‌ر من)). ئيمام نه‌سائى و ئه‌بو داوود ڤه‌گێرايه. ديسا پێغه‌مبه‌ر (سلاڤێت خودێ لێ بن) دبێژيت: ((وه‌خته‌ك يێ د رۆژا ئه‌ينيدا هه‌ى، نينه به‌نده‌يه‌كێ موسلمان بكه‌ڤيته تێدا، و ئه‌و ژ پياڤه بيت نڤێژێ بكه‌ت، و دوعا ژ خودێ بكه‌ت، هه‌كه خودێ تشتێ داخوازكرى نه‌ده‌تێ)). ئيمام بوخارى و موسلمى ڤه‌گێرايه.
7 ـ وه‌ختێ قورئان دئێته ختمكرن، ژبه‌ر گۆتنا پێغه‌مبه‌رى (سلاڤێت خودێ لێ بن) دبێژيت: ((پشتى ختما قورئانێ دوعايه‌كا قه‌بويلكرى يا هه‌ى)). ئيمام به‌يهه‌قى ڤه‌گێرايه.
8 ـ پشتى نڤێژێت فه‌رز، پسيار ژ پێغه‌مبه‌رى (سلاڤێت خودێ لێ بن) هاته‌كرن ئه‌ى پێغه‌مبه‌رێ خودێ.. كيژ دوعا چێتر دهێته قه‌بويلكرن؟ ئينا گۆت: ((د نيڤا شه‌ڤێدا و پشتى نڤێژێت فه‌رز)). ئيمام ترمزى ڤه‌گێرايه.
9 ـ هه‌يڤا ره‌مه‌زانا پيرۆز و هه‌ر رۆژه‌كا موسلمان تێدا يێ ب رۆژى بيت. پێغه‌مبه‌ر (سلاڤێت خودێ لێ بن) دبێژيت: ((سێ كه‌سان خودێ دوعايا وان ناڤه‌گێريت، پێشه‌وايێ عادل، و رۆژيگر هه‌تا فتارێ دكه‌ت، و دوعايا سته‌ملێكرى)). ئيمام ترمزى ڤه‌گێرايه.
10 ـ شه‌ڤا (ليله القدر) ژبه‌ر ئه‌مرێ خودێ ((لَيْلَةُ الْقَدْرِ خَيْرٌ مِّنْ أَلْفِ شَهْرٍ)) شه‌ڤا ب رێز و رويمه‌ت و ب قه‌در چێتر و بقه‌درتره ژ هزار هه‌يڤان.
11 ـ و هه‌ر وه‌ختێ تو خۆ ببينى دلێ ته يێ نه‌رمه، و ترسا خودێ يا تێدا و دوعايێت ژ دل دێ ده‌ركه‌ڤن، و خودێ چێتر دزانيت.
