ب / يا ژ پێغه‌مبه‌رى (سلاڤێت خودێ لێ بن) هاتيه زانين ئه‌م ده‌ستێت خۆ بلندكه‌ين و به‌رێ ده‌ستێ خۆ بده‌ينه سه‌روچاڤێت خۆ و پشتا وان ل ئه‌ر دى بيت. پێغه‌مبه‌رێ خۆشتڤى (سلاڤێت خودێ لێ بن) دبێژيت: ((خودێ مه‌زن شه‌رمێ ژ به‌نده‌يێ خۆ دكه‌ت ئه‌و ده‌ستآ خۆ به‌رڤه بلند بكه‌ت و ئه‌و ده‌ستێ وى ڤالا بزڤرينيت. و ئه‌بو داوود ڤه‌دگێريت: هه‌كه هه‌وه تشته‌ك ژ خودايێ خۆ خواست ب به‌رێ ده‌ستێ خۆ ژێ بخوازن و ب پشتا ده‌ستێ خۆ ژێ نه‌خوازن. و هاتيه زانين پێغه‌مبه‌رێ خۆشتڤى (سلاڤێت خودێ لێ بن) ده‌مێ نڤێژا بارانێ كرى هند ده‌ستێت خۆ بلندكرن هه‌تا سپياتيا بنكه‌فشێت وى هاتيه ديتن به‌رێ ده‌ستێت خۆ دا ئاخێ و پشتا وان دا ئه‌سمانى، به‌لێ هنده‌ك زانا دبێژن ئه‌ڤ ره‌نگه ده‌ست بلندكرنه يا تايبه‌ته ب نڤێژا بارانێڤه و ده‌ست وه‌رگێران نيشانا ب هيڤى بوونێيه خودێ دێ ره‌وشێ گوهۆريت ژ بێ بارانيێ بۆ باران هاتنێ، هه‌رچه‌نده ئيمامێ نه‌وه‌وى (خودێ ژێ رازى بيت) دبێژيت: سونه‌ته بۆ خواستنێ ب به‌رێ ده‌ستى بكه‌ين و بۆ خۆ پاراستنێ دوعا ب پشتا ده‌ستى بكه‌ين، ب پشت به‌ستن ب ڤێ حه‌ديسێ به‌لێ ئه‌ز ره‌ئيا دى دورستر ددانم، چونكى نه‌هاتيه زانين پێغه‌مبه‌رێ خۆشتڤى (سلاڤێت خودێ لێ بن) د جهه‌كێ ديدا و هند دوعايێت خۆپارێزخوزيێ دكرن ده‌ستێت خۆ به‌روڤاژى كربن، و خودێ چێتر دزانيت.
