ب / ب راستى دوعا كه‌ره‌م و خه‌لات و دانه‌كا مه‌زن و ب قه‌دره، خودێ مه‌زن دايه به‌نده‌يێت خۆ، نه‌خاسمه وه‌ختێ فه‌رمانا وان كرى ئه‌و دوعايێ بكه‌ن ((ادعوني)) ئانكو: دوعا ژ من بكه‌ن، و ئه‌و دێ قه‌بويل كه‌ت ((أستجب لكم)) ئه‌ز دێ بۆ هه‌وه قه‌بويل كه‌م. و كارێ دوعايێ گه‌له‌كێ مه‌زنه و جهێ وێ د دينيدا گه‌له‌كێ بلنده، چو تشتان وه‌كى دوعايێ خێر و كه‌ره‌م پێڤه ناهێن و چو تشتان وه‌كى دوعايێ به‌لا و نه‌خۆشى پێ ناهێنه پالدان، چونكى دوعا تشته‌كه ب ئێكينى و خودانيا خودێڤه يا گرێدايه و هه‌ر ئه‌ڤه‌يه نيڤشك و سه‌رێ دينى. هۆسا ديار دبيت دوعا كاره‌كه ب بيروباوه‌ر و عه‌قيدێڤه يا گرێدايه، چونكى چێكريان دئێخيته د جهێ واندا يێ ئه‌و هه‌ژى، به‌نده‌يێت شكه‌ستى به‌رانبه‌ر خودێ و هه‌وجه‌ى وى، و دوعا دكه‌ڤيته د ناف هه‌مى په‌رستنێت ديدا و هه‌مى دوعانه، مه‌خسه‌د ژێ رازيبوونا خودێيه و ژ ئيزايا وى بێنه رزگاركرن، و ما ده‌م خودێ ئه‌م ب قه‌در ئێخستين و ژ مه خواست ئه‌م دوعا بكه‌ين، بلا ئه‌م ژى دويف وى قه‌درى بين و ب دل و ده‌روونێت پاك و پاقژ دوعا بكه‌ين.
ب راستى دوعا خواندنگه‌هه‌كا په‌روه‌رده‌ييا مه‌زنه، مرۆڤى ل سه‌ر هندێ په‌روه‌رده دكه‌ت په‌يوه‌نديێت مرۆڤى دگه‌ل خودێ د باش و راست و دورست بن و دلێ مرۆڤى يێ ساخ و ئاڤا بيت ب زكر و گوهداريا خودێ، و يێ خه‌ما دوعايێ ب دورستى بخۆت ب دورستى دێ خۆ چێكه‌ت و مه‌رجێت دوعايێ هه‌ميان دێ ب جه ئينيت و ب ڤى ره‌نگى دوعا خواندنگه‌ها په‌روه‌رده‌ييه، و خودێ چێتر دزانيت.
