ب / و يێ موسلمان بيت ب چو ره‌نگان دڤێت دوعايان نه‌هێليت و پشتا خۆ نه‌ده‌تێ، چونكى پێغه‌مبه‌رێ خۆشتڤى (سلاڤێت خودێ لێ بن) دبێژيت: ((من لم يسال الله يغضب عليه)) يێ دوعا ژ خودێ نه‌كه‌ت خودێ ژێ كه‌ربگرتى دبيت، هه‌لبه‌ت ئه‌ڤ حه‌ديسه ئيمام ئه‌حمه‌د و ترمزى و ئبن ماجه و حاكمى ڤه‌گێرايه. و كى هه‌يه ژ مرۆڤان بشێت خۆ ل به‌ر كه‌ربگرتنا خودێ بگريت، و خودێ مه‌زن و دلۆڤان د قورئانا پيرۆزدا دبێژيت: ((وَمَن يَحْلِلْ عَلَيْهِ غَضَبِي فَقَدْ هَوَىٰ)) ئانكو: هه‌ركه‌سێ كه‌ربا من ژێ گرت ئه‌و كه‌فته د ئاگريدا. و خودێ ژ وى كه‌ربگرتى دبيت يێ دوعا ژ خودێ نه‌كه‌ت ژبه‌ر سێ ئه‌گه‌ران:
1 ـ نه‌دوعاكرن ره‌نگه‌كێ خۆمه‌زنكرنێيه، و نابيت ب چو ره‌نگان به‌نده‌يێ موسلمان خۆ مه‌زن بكه‌ت، و خودێ مه‌زن دبێژيت: ((وَقَالَ رَبُّكُمُ ادْعُونِي أَسْتَجِبْ لَكُمْ إِنَّ الَّذِينَ يَسْتَكْبِرُونَ عَنْ عِبَادَتِي سَيَدْخُلُونَ جَهَنَّمَ دَاخِرِينَ)) ئانكو: (خودايێ هه‌وه گۆت: دوعايێ ژ من بكه‌ن ئه‌ز دێ به‌رسڤا هه‌وه ده‌م ب راستى ئه‌وێت خۆ ل سه‌ر په‌رستنا من و دوعايا ژ من مه‌زن دكه‌ن دێ ئه‌و ره‌زيل و رسوا چنه د دۆژه‌هێدا.
2 ـ و يێ دوعا نه‌كه‌ت يێ گونه‌هكاره، چونكى دوعا ئه‌مره و ئه‌مرێ خودێ دڤێت بێته ب جهئينان.
3 ـ نه‌دوعاكرن بێ پاكيه ب خودێ، چونكى خۆ دبينيت يێ بێ منه‌ته و هه‌وجه‌يى ب خودێ نينه و به‌نده چه‌ندێ ژ خودێ ترس بيت هند هه‌وجه‌ييا خۆ بۆ خودێ ديار دكه‌ت. وه‌ختێ خودێ ئه‌مرێ مه دكه‌ت ئه‌م دوعايا بكه‌ين چونكى ئه‌م هه‌وجه‌ى وينه وى چو پاكى ب مه و دوعايێت مه و ب په‌رستنا مه نينه ((يَا أَيُّهَا النَّاسُ أَنتُمُ الْفُقَرَاءُ إِلَى اللَّهِ وَاللَّهُ هُوَ الْغَنِيُّ الْحَمِيدُ )) گه‌لى مرۆڤان هوين هه‌وجه‌ى خودێنه و خودێ ب خۆ يێ ده‌وله‌مه‌نده و منه‌ت ب كه‌سێ نينه و هێژايى شوكرێيه. و موسلمان هه‌مى وه‌ختان نه‌خاسمه د ڤى چه‌رخيدا و د ڤێ ژيانا ئالۆزدا پتر هه‌مى وه‌ختان هه‌وجه‌ى دوعايێنه، و نينه موسلمانه‌ك ژ موسلمانان و به‌نده‌يه‌ك ژ به‌نده‌يان پاكى و هه‌وجه‌يى ب دوعايێ نه‌بيت، هه‌كه به‌رپرس و پێشه‌وا بيت، هه‌وجه‌ى دوعايێيه دا خودێ ده‌سهه‌لاتا وى بۆ بهێليت و كارێ وى راست بكه‌ت، و بشێت ده‌رهه‌ق بێته‌ده‌رێ، و رۆژا قيامه‌تێ د راستا وان كه‌ساندا ئه‌وێت به‌رده‌ستێ وى يێ گونه‌هكار نه‌بيت، و هه‌كه بانگهلدێر بيت (داعي بيت) چه‌ند هه‌وجه‌ى دوعايێيه، دا خودێ كاروبارێت وى بۆ ساناهى بكه‌ت و خودێ هاريكاريا وى بكه‌ت، و وى سه‌رفه‌راز بكه‌ت، و ل سه‌ر حه‌قيێ بهێليت و سه‌برێ ل سه‌ر ئاسته‌نگ و گرفتێت رێكێ بده‌تێ، و دا خودێ گوه و دلێت خه‌لكى بۆ ئاخفتنا وى يا خێرێ ڤه‌كه‌ت و دويف وى بهێن. و هه‌كه يێ نه‌ساخه و د ته‌نگاڤيێدايه، چه‌ند پێدڤى دوعايێيه دا خودێ سلامه‌تيێ بده‌تێ و وى ژ ته‌نگاڤيێ ده‌ربێخيت. و هه‌كه يێ زه‌نگين و ده‌وله‌مه‌نده هه‌وجه‌ى دوعايێيه دا خودێ بۆ بهێليت و ژ ده‌ست نه‌به‌ت و وى و مالێ وى د هيلاك نه‌به‌ت و خودێ هه‌ر بۆ رابگريت. و كورت و كرمانج موسلمانه‌ك ل سه‌ر ڤى رويێ عه‌ردى نينه زێده زێده هه‌وجه‌يى ب دوعايێ نه‌بيت، دا بگه‌هيته خێرا دنيا و ئاخره‌تێ. و ژ كه‌ره‌ما خودێ هندى مرۆڤ دوعايێ درێژتر لێ بكه‌ت و لاڤلاڤێ بكه‌ت خودێ پتر حه‌ژ مرۆڤى دكه‌ت و چه‌ند ئه‌م ده‌رگه‌هێ وى بقوتين پتر دێ ده‌ته مه و ده‌رگه‌هێ وى ل رويێ كه‌سێ ناهێته گرتن هندى ئه‌و هه‌وجه‌ييێت خۆ زێده‌كه‌ت. و هه‌كه دوعايێ ئه‌ڤ قه‌در و جهێ بلند هه‌بيت د ئيسلامێدا و ئه‌ڤ خێروبێره پێڤه دهێن. پێدڤيه موسلمان زێده يێ دوعاكه‌ر بيت و به‌رده‌وام هه‌وجه‌يێت خۆ بۆ خودێ بلند بكه‌ت نه خاسمه پێغه‌مبه‌رێ خۆشتڤى (سلاڤێت خودێ لێ بن) هه‌روه‌كى ئبن حه‌بان ژ ئه‌نه‌سێ كورێ مالكى ڤه‌گێرايى دبێژيت: پێغه‌مبه‌رى (سلاڤێت خودێ لێ بن) گۆت: (لِيسْأَلَ أَحَدُكُمْ رَبَّهُ حَاجَتَهُ كُلَّهَا حَتَّى شِسْعَ نَعْلِهِ إِذا انْقَطعَ) بلا ئێك ژ هه‌وه هه‌وجه‌يێت خۆ هه‌ميان ژ خودايێ خۆ بخوازيت هه‌تا قه‌يتانا شمكا خۆ هه‌كه بزديا، ئانكو دوعا بكه‌ت خودێ بۆ چێكه‌ت، و خودێ چێتر دزانيت.
