ب / ده‌ستپێكێ دڤێت ئه‌م رامانا ئستيخارێ بزانين؛ دا بۆ مه ئاشكرا ببيت كا به‌رده‌وام ئه‌م هه‌وجه‌ي ڤێ دوعايێنه يان نه، و به‌رده‌وام ئه‌م پێدڤى ئستيخارێينه يان نه؟ رامانا ئستيخارێ داخوازا خێرێيه ژ خودێ، ئه‌رێ ئه‌م به‌رده‌وام د كاروبارێت خۆدا پێدڤى نينين خودێ هاريكاريا مه بكه‌ت، و خێرێ بێخته تێدا، ئه‌رێ بارا پتر ژ كاروكريارێت مه ئه‌م نه‌پێدڤى ڤێ دوعايێنه، جابرێ كورێ عه‌بدوللاى (خودێ ژێ رازى بيت) دبێژيت: پێغه‌مبه‌رى (سلاڤێت خودێ لێ بن) د هه‌مى كاروبارێت مه‌دا ئستيخاره نيشا مه ددا، هه‌روه‌كى سۆره‌ته‌ك ژ سۆره‌تێت قورئانێ نيشا مه ددا. و ئه‌ڤ نڤێژه ل وى ده‌مى دئێته‌كرن ده‌مێ مرۆڤ دكه‌ڤيته د ناڤبه‌را دوو بريارێن ژێك جودادا و مرۆڤ نوزانيت كيژكێ ژ وان بكه‌ت، ب مه‌رجه‌كى ئه‌و تشتێ مرۆڤ تێدا دودل نه ژ واجيباتان بيت، چونكى تشتێ واجب نابيت مرۆڤ ل سه‌ر يێ دودل بيت، به‌لێ هه‌كه تشته‌كێ نه‌يێ واجب بيت، و مرۆڤ نه‌زانيت، و بۆ مرۆڤى ديار نه‌بوو كا چ بكه‌م خێرتره، هنگى دێ نڤێژا ئستيخارێ كه‌ت؛ دا سه‌رێ خێرێ بۆ مرۆڤى ئاشكرا ببيت، چونكى رامانا ئستيخارێ ئه‌وه: ره‌ئيا خێر دگه‌ل مرۆڤ نوزانيت، ڤێجا دڤێت خودێ ژ هه‌ردوو ره‌ئيان دلێ وى بێخيته سه‌ر ره‌ئيا خێرێ، و بۆ وێ ره‌ئيێ دلێ وى رۆنكه‌ت. بۆ نموونه: ئێك يێ كچێ دخوازيت و نوزانيت رازى بيت بۆ وى چێتره يان نه، هينگێ دێ ڤێ نڤێژێ كه‌ت؛ دا ل سه‌ر ئێك ره‌ئى راوه‌ستيت. و ئه‌ڤ نڤێژه دوو ركاعه‌تن ده‌مێ كرنێ نه‌يێ ده‌ستنيشانكريه، هه‌ر ده‌مه‌كێ بێته‌كرن دورسته. شيره‌تا من ل سێكا دويماهيا شه‌ڤێ بێته‌كرن چێتره، چونكى وى ده‌مى زهنا مرۆڤى يا سافيه و خودێ مه‌زن ژى دئێته عه‌سمانێ دنيايێ و دبێژيت: كێ داخوازه‌ك هه‌يه ئه‌ز بۆ ب جه بينم. كێ دوعايه‌ك هه‌يه ئه‌ز قه‌بويل بكه‌م. پشتى دوو ركاعه‌ت دئێنه‌كرن و سلاڤا ملان دئێته‌ڤه‌دان خودانێ هه‌وجه‌ييێ دێ ڤێ دوعايێ كه‌ت: ((اللهم اني استخيرك بعلمك واستقدرك بقدرتك واسالك من فضلك العظيم فانك تعلم ولااعلم وتقدر ولااقدر وانت علام الغيوب، اللهم ان كنت تعلم ـ ڤێرێ دێ هه‌وجه‌ييا خۆ بێژى ـ خير لي في ديني ومعاشي وعاقبه امري فاقدره لي ويسره لي ثم بارك لي فيه، اللهم ان كنت تعلم ـ ڤێرێ دێ هه‌وجه‌ييا خۆ بێژى ـ شر لي في ديني ومعاشي وعاقبه امري فاصرفه عني واصرفني عنه واقدر لي الخير حيث كان)). هه‌لبه‌ت كرنا ڤێ دوعايێ ب كوردى ژى بيت دورسته و ب ئانه‌هيا خودێ دێ خودێ دلێ وى ئێخيته سه‌ر وێ ره‌ئيا د خێرا ويدا. به‌لێ يا خه‌له‌ته ئه‌م ڤآ دووعايآ ب كاروبارێت سه‌ره‌كى و چاره‌نڤێسڤه گرێده‌ين هه‌ركاره‌كآ هه‌بيت واجب و ئه‌رك تێنه‌بن يێت دى هه‌مى يا باشتر ئه‌وه ئستيخاره بۆ بێته‌كرن، چونكى كه‌س نوزانيت كا خێر د كرنێدايه يان د نه‌كرنێدا، و يا باش ئه‌وه ئه‌ڤ دوعايه پشتى نڤێژێ بێته‌كرن، به‌لێ مه‌رج نينه، دورسته يێ نه‌شێت نڤێژێ بكه‌ت چ يێ ب جه‌نابه‌ت بيت يان ژن د عادێ و چلكاندا بيت دورسته بۆ خۆ دوعا ئستيخارێ بێ نڤێژ ژى بكه‌ن و دوعايآ تنآ بخوينن و بێژن، و مه‌رج نينه ب عه‌ره‌بى بێژن، ب كوردێ دورسته دوعا ئستيخارێ بكه‌ن. و ب ڤى ره‌نگى: يا خودێ ئه‌ز ب زانينا ته يا خێرتر ژ ته دخوازم، و ئه‌ز شيانێ ب شيانا ته دخوازم، و ئه‌ز داخوازێ ژ ته دكه‌م ژ كه‌ره‌ما ته يا مه‌زن، ب راستى تو دشێى و ئه‌ز نه‌شێم، و تو دزانى (كا خێرا من د كيرێدايه) و ئه‌ز نوزانم و تو زانايێ نهێنيانى. يا خودێ هه‌كه تو بزانى ئه‌ڤ كاره ـ كارێ خۆ بێژه ـ بۆ من، د دينێ مندا و د دنيا مندا و د دويماهيا مندا چێتره، بۆ من بنڤێسه، و بۆ من ساناهى بكه، يا خودێ هه‌كه تو بزانى ئه‌ڤ كاره ـ كارێ خۆ بێژه ـ بۆ من، د دينێ من و د دنيا مندا و د دويماهيا مندا خرابتره، ژ من بده پاش و من ژێ بده پاش، و خێرێ ب رزقێ من بكه هه‌ر جهێ لێ بيت پاشى من ژێ رازيكه، و خودێ چێتر دزانيت.
