ب / پێدڤيه هه‌ر موسلمانه‌ك د جهێ خۆدا خوَ ئه‌ندامه‌ك بدانيت ژ له‌شێ ئيسلامێ، و خه‌ما پێدڤى بۆ بخۆت، و خۆ ژ دۆزێت موسلمانه‌تيێ بێ ئاگه‌هـ نه‌كه‌ت، و خۆ ژێ نه‌ده‌ته پاش، و خه‌ما ئيسلامه‌تيێ و دينێ خۆ بخۆت، و پشكدارێ خۆشى و نه‌خۆشيێت وان بيت. پێغه‌مبه‌ر (سلاڤێت خودێ لێ بن) هه‌روه‌كى ئيمام بوخارى و موسلمى ڤه‌گێراي، دبێژيت: ((مه‌ته‌لا موسلمانان د حه‌ژێكرن و دلۆڤاني و دلپێڤه‌بوونێدا وه‌كى له‌شه‌كينه، ئه‌گه‌ر پارچه‌يه‌ك ژێ ئێشا هه‌مى له‌ش ب خه‌وره‌ڤين و تايێ دكه‌ڤيته به‌ر))، ديسا پێغه‌مبه‌ر (سلاڤێت خودێ لێ بن) هه‌روه‌كى ئه‌بو نه‌عيمى ڤه‌گێراي، دبێژيت: ((هه‌ركه‌سێ خه‌ما كاروبارێت موسلمانان نه‌خۆت ئه‌و نه ژ مه‌يه)). و دڤێت هه‌رئێك دويف شيانێت خۆ، ئه‌وێت خودێ داينێ د خزمه‌تا دينێ خۆدا بيت، و د خزمه‌تا ئيسلامێدا، كێم كێم.. مرۆڤ موسلمانان ژ دوعايێت خۆ بێ بار نه‌كه‌ت، و مرۆڤ ب دوعايێت خۆ له‌شكه‌ره‌كێ نه‌نياس بيت، ئه‌گه‌ر مرۆڤى چو يێ دى پێ چێنه‌بيت. و ژبير نه‌كه‌ت دوعايان كارلێكرنه‌كا مه‌زن يا هه‌ى، و ئه‌و ب خۆ ژى چه‌كه‌كه ژ چه‌كان و دڤێت مرۆڤ نه‌دانيت، هه‌روه‌كى پێغه‌مبه‌ر (سلاڤێت خودێ لێ بن) دبێژيت: ((دوعا چه‌كێ موسلمانيه و ستوينا دينيه و رۆناهيا عه‌رد و عه‌سمانانه)). ئيمام حاكم د موسته‌دره‌كێدا ڤه‌گێرايه، ڤێجا ئه‌گه‌ر مرۆڤى چو پێ چێنه‌بيت بۆ دينێ خۆ و موسلمانان بكه‌ت مرۆڤ دشێت دوعا ژ دل بۆ بكه‌ت و ئه‌ڤه ب خۆ ئه‌گه‌ر ژ دله‌كێ هشيار و پاقژ ده‌ركه‌ڤيت نه‌يا كێمه، و گه‌له‌ك موسلمان ژ ڤێ پێڤه‌تر هيڤيا مه نينن، ژبير نه‌كه پێغه‌مبه‌ێ خۆشتڤى (سلاڤێت خودێ لێ بن) دبێژيت: ((ئه‌ڤ مله‌ته ب بێچارێت خۆ سه‌ردكه‌ڤيت ب دوعايێت وان و ب نڤێژێت وان و ب دلسۆزيا وان)). بوخارى و نه‌سائى ڤه‌گێرايه، به‌رێ خۆ بدێ كا چاوا پێغه‌مبه‌رى (سلاڤێت خودێ لێ بن) دوعايێت بێچاره‌يان كره ئه‌گه‌ره‌كێ سه‌ره‌كى بۆ سه‌ركه‌فتنا موسلمانان. ڤێجا هه‌ى خويشك و برايێت موسلمان ئه‌گه‌ر تو خۆ بێچاره ددانى و ته چو پێ چێنه‌بيت، تو دشێى ده‌ستێت ته هه‌ر دسه‌رئه‌ڤراز بن، دوعا ژ دل بۆ موسلمانان هه‌ميان بكه‌ى، نه‌خاسمه ئه‌وێت جان و مالێت خۆ بۆ ڤى دينى كرينه وه‌قف، و ئارمانج و هيڤى و ئومێد و پاشه‌رۆژا خۆ ب ڤى دينيڤه گرێداين، كێم كێم ب دوعايێت خۆ دگه‌ل ڤان ئه‌وێت ب ڤى ره‌نگى خۆ داينه دينێ خۆ و ته، ئه‌و دينێ تو خودێ خۆ پێ دعه‌بدينى. و قورئان ب خۆ ڤى ره‌نگى مه په‌روه‌رده دكه‌ت، كو ئه‌م د دوعايێت خۆدا ب برايێت خۆ يێت باوه‌ريێڤه بێنه گرێدان، و نه‌به‌س دوعايان بۆ وان موسلمانان بكه‌ين. و خودێ مه‌زن هۆسا مرۆڤێت خودان باوه‌ر دده‌ته نياسين و ب ڤى ره‌نگى مه‌دحێت وان دكه‌ت و دبێژيت: ((وَالَّذِينَ جَاءُوا مِن بَعْدِهِمْ يَقُولُونَ رَبَّنَا اغْفِرْ لَنَا وَلِإِخْوَانِنَا الَّذِينَ سَبَقُونَا بِالْإِيمَانِ وَلَا تَجْعَلْ فِي قُلُوبِنَا غِلًّا لِّلَّذِينَ آمَنُوا رَبَّنَا إِنَّكَ رَءُوفٌ رَّحِيمٌ)) ئانكو: ئه‌وێت د دويف وانرِا مه‌خسه‌د پێ دويف سه‌حابيان هه‌تا رۆژا قيامه‌تێ ژ موسلمانان هاتين دبێژن: خودێ وۆ گونه‌هێت مه و يێت برايێت مه يێت به‌رى مه باوه‌رى ئينايين ژێببه و نه‌ڤيانا وان ئه‌وێت باوه‌رى ئينايين نه‌ئێخه د دلێت مه‌دا و مه د راستا واندا زكرِه‌ش نه‌كه، خودێ وۆ تو ميهره‌بان و دلۆڤانى. ڤێجا دوعاكرن بۆ موسلمانان ژ پێدڤيێت باوه‌ريێنه دڤێت ئه‌ڤه ل ده‌ف مرۆڤى هه‌بيت، و ئێك ژ نيشانێت دلپاقژيا مرۆڤى ئه‌وه مرۆڤ دوعا بۆ هه‌مى موسلمانان بكه‌ت، يێت چۆيين و يێت مايين، و هه‌ميان ئه‌ڤ مافه ل سه‌ر مرۆڤى يێ هه‌ى، و باوه‌ردارێ راست و دورست يێ هۆسايه، دوعاكه‌ره بۆ غه‌يرى خۆ و نه‌ڤيانا كه‌سێ نائێخيته د دلێ خۆدا، و دوعا دكه‌ت خودێ نه‌ڤيانا چو خودان باوه‌ران نه‌ئێخته د دلێ ويدا. باشه هه‌ى باوه‌ردار ئه‌گه‌ر موسلمان دڤێت يێ هۆسا بيت، پا تو چ دبێژى بۆ وان ئه‌وێت نه‌ڤيانا هنده‌ك موسلمانان هه‌لدگرن! نه ژبه‌ر چو ئه‌گه‌ران بۆ هندێ نه‌بيت چونكى خه‌م و خيالا وان ئه‌وه په‌ياما خودێ حاكم بيت، و په‌ياما خودێ ياسا بيت! ئه‌ڤه دێ چ بێژنه خۆ رۆژا قيامه‌تێ، وه‌ختێ به‌رده‌ستێت خودێ رادوه‌ستن؟ ديسا ئه‌گه‌ر ئه‌م به‌رێ خۆ بده‌ينه دوعايێت قورئانێ دێ بينين باراپتر ب ئاوايێ كۆمێ يێت هاتين وه‌كى: (( رَبَّنَا آتِنَا فِي الدُّنْيَا حَسَنَةً وَفِي الْآخِرَةِ حَسَنَةً وَقِنَا عَذَابَ النَّارِ))و(( رَبَّنَا لَا تُؤَاخِذْنَا إِن نَّسِينَا أَوْ أَخْطَأْنَا رَبَّنَا وَلَا تَحْمِلْ عَلَيْنَا إِصْرًا كَمَا حَمَلْتَهُ عَلَى الَّذِينَ مِن قَبْلِنَا رَبَّنَا وَلَا تُحَمِّلْنَا مَا لَا طَاقَةَ لَنَا بِهِ وَاعْفُ عَنَّا وَاغْفِرْ لَنَا وَارْحَمْنَا أَنتَ مَوْلَانَا فَانصُرْنَا عَلَى الْقَوْمِ الْكَافِرِينَ))(( وَالَّذِينَ يَقُولُونَ رَبَّنَا هَبْ لَنَا مِنْ أَزْوَاجِنَا وَذُرِّيَّاتِنَا قُرَّةَ أَعْيُنٍ وَاجْعَلْنَا لِلْمُتَّقِينَ إِمَامًا )) به‌لكى ئه‌و سۆره‌تا ئه‌م كێم كێم هه‌ڤده جاران دخوينين مه موسلمانان ل سه‌ر هندێ رادكه‌ت و په‌روه‌رده دكه‌ت ئه‌م ب دوعايێت ب موسلمانانڤه بێنه گرێدان و دوعا بۆ وان هه‌ميان بكه‌ين سۆره‌تا فاتيحێ ((اهْدِنَا الصِّرَاطَ الْمُسْتَقِيمَ)) و ئه‌ڤ سۆره‌ته به‌رێ مه دده‌ته هندێ ئه‌م دوعا خێرێ بۆ هه‌مى موسلمانان بكه‌ين و وان ژبير نه‌كه‌ين ب دوعايێت خۆ.
ژ ئه‌ڤا بۆرى بۆ مه ديار دبيت موسلمانه‌تيا مرۆڤى دورست و تمام نابيت ئه‌گه‌ر ئه‌ڤ سالۆخه‌ته ل ده‌ف نه‌بيت، دوعايان بۆ موسلمانان هه‌ميان نه‌كه‌ت نه‌خاسمه ئه‌و موسلمانێت كه‌فتينه بن بارێ سته‌م و زۆرداريێڤه، و خودێ چێتر دزانيت.
