ب / خودێ مه‌زن هۆسا موسلمانان دده‌ته نياسين ئه‌وێت دويف ئێك و دوودا دهێن: ((وَالَّذِينَ جَاءُوا مِن بَعْدِهِمْ يَقُولُونَ رَبَّنَا اغْفِرْ لَنَا وَلِإِخْوَانِنَا الَّذِينَ سَبَقُونَا بِالْإِيمَانِ وَلَا تَجْعَلْ فِي قُلُوبِنَا غِلًّا لِّلَّذِينَ آمَنُوا رَبَّنَا إِنَّكَ رَءُوفٌ رَّحِيمٌ)) و ئه‌وێت د دويف وانرِا هاتين دبێژن: يا خودێ گونه‌هێت مه و يێت برايێت مه يێت به‌رى مه باوه‌رى ئينايين ژێ ببه، و نه‌ڤيانا وان ئه‌وێت باوه‌رى ئينايين نه‌ئێخه د دلێت مه‌دا، و مه د راستا واندا زكرِه‌ش نه‌كه، يا خودێ تو ميهره‌بان و دلۆڤانى. ديسا د سۆره‌تا موحه‌ممه‌ددا دبێژته پێغه‌مبه‌رێ خۆ (سلاڤێت خودێ لێ بن): ((وَاسْتَغْفِرْ لِذَنبِكَ وَلِلْمُؤْمِنِينَ وَالْمُؤْمِنَاتِ وَاللَّهُ يَعْلَمُ مُتَقَلَّبَكُمْ وَمَثْوَاكُمْ)) و داخوازا لێبۆرينێ بۆ گونه‌هێت خۆ و بۆ گونه‌هێت هه‌مى خودان باوه‌ران، چ زه‌لام چ ژن بكه. ڤێجا دڤێت ئه‌م نه به‌س دوعا بۆ خۆ ب تنآ بكه‌ين، و هه‌كه ئه‌م بزانين كا دوعاكرن بۆ موسلمانان چه‌ندا ب خێره به‌رده‌وام دآ دوعايێت ب كۆمى و گشتى كه‌ين و هه‌ركه‌سآ ئه‌م بنياسين دآ دوعا بۆ كه‌ين، چونكى:
ئێك: ب هژمارا وان دێ دوعا بۆ ته هێنه نڤێسين، ئانكو: هه‌كه تو دوعا بۆ گونديێت خۆ هه‌ميان بكه‌ي ب هژمارا وان دێ خودان خێربى، و هه‌كه بۆ موسلمانان هه‌ميان بكه‌ى ب هه‌ژمارا وان كا چه‌ند مليارن هند خێر دێ بۆ ته هێنه نڤێسين، و راستيا ڤێ چه‌ندێ ژى گۆتنا پێغه‌مبه‌رێ خودێيه (سلاڤێت خودێ لێ بن)، عوبادێ كورێ سامتى دبێژيت: من گولێبوو پێغه‌مبه‌رى (سلاڤێت خودێ لێ بن) دگۆت: ((هه‌ركه‌سێ دوعا گونه‌هـ ژێبرنێ بۆ موسلمانێت ژن و زه‌لام بكه‌ت، ب هه‌ژمارا هه‌ر موسلمانه‌كي چ ژن چ زه‌لام خێره‌ك دێ بۆ ئێته نڤێسين)). ته‌به‌رانى ڤه‌گێرايه و شێخ ئه‌لبانى حه‌سه‌ن و باش دانايه، و يا ئاشكه‌رايه ئه‌ڤرۆ هه‌ژمارا موسلمانان ژ ملياره‌كێ دبۆريت. و ئه‌گه‌ر ئه‌م بێژين هه‌ژمارا وان به‌س مليۆنه‌كه. رۆژانه تو دوعا گونه‌ه ژێبرنێ بۆ وان بكه‌ى، رۆژانه ب هه‌ژمارا وان خێر دێ بۆ ته هێنه نڤێسين. و ئه‌گه‌ر تو ژيێ خۆ هه‌ميێ زكرى و ته‌سبيحان بكه‌ى تو ناگه‌هيه ڤێ هه‌ژمارێ، و ئه‌گه‌ر ئه‌ڤه نه‌ئه‌و خێر با يا پێغه‌مبه‌رى (سلاڤێت خودێ لێ بن) به‌رێ مه دايێ دا ئه‌م ب چه‌ند ئاخفتنه‌كێت كورت هند خێران كۆمكه‌ين، كو چو جاران د هزرا مه‌دا نه؟! و تو هزر دكه‌ى ئه‌گه‌ر تو ڤێ دوعايێ بۆ هه‌مى موسلمانان بكه‌ى يێت مرى و يێت ساخ كا دێ خێرێت ته بنه چه‌ند؟ ئه‌ز هزر دكه‌م ئانه‌هيا خودێ دێ بيه بليۆنێر، به‌لێ نه ب دينار و دۆلاران، به‌لكى ب خێران.
دوو: يێ دوعا بۆ خۆ ب تنآ دكه‌ت ئه‌و ژ دوعايێت ملياكه‌تان بێبار بوو، ڤێجا هه‌ى موسلمان، ئه‌گه‌ر ته مرۆڤێت خۆ و هه‌ڤالێت خۆ و سه‌يدايێت خۆ نه‌ئينانه بيرا خۆ و دوعا بۆ نه‌كرن، دێ ژ خوساره‌تان بى، چونكى ئه‌و دوعا تو بۆ وان دكه‌ى هه‌ر وێ دوعايێ ملياكه‌ت ژى بۆ ته دكه‌ن، ل ڤێرێ تو دوعا بۆ وان دكه‌ى ل وێراهه ملياكه‌ت هه‌ر وێ دوعايێ بۆ ته دكه‌ن. دگه‌ل من به‌رێ خۆ بدێ كا پێغه‌مبه‌رێ خۆشتڤى (سلاڤێت خودێ لێ بن) د راستا ويدا چ دبێژيت يێ دوعا بۆ غه‌يرى خۆ دكه‌ت، ئه‌بو ده‌رداْ (خودێ ژێ رازى بيت) گول پێغه‌مبه‌رێ خودێ بوو (سلاڤێت خودێ لێ بن) دگۆت: ((نينه موسلمانه‌ك نه‌په‌نى دوعا بۆ برايێ خۆ بكه‌ت هه‌كه ملياكه‌ت نه‌بێژتێ خودێ وه‌كى وێ دوعايێ بده‌ته ته)). ديسا هه‌ر ئه‌و د ڤه‌گێره‌كا ديدا دبێژيت: پێغه‌مبه‌رێ خودێ (سلاڤێت خودێ لێ بن) گۆت: ((دوعايا مرۆڤێ موسلمان نه‌په‌نى برايێ خۆ بۆ دكه‌ت يا قه‌بويلكريه، ملياكه‌ته‌كێ ل ده‌ف سه‌رێ وى بۆ ڤى كارى يێ هاتيه دانان هه‌رگاڤا دوعا خێرێ بۆ برايێ خۆ كر ملياكه‌تێ ب ويڤه هاتيه گرێدان دێ بێژيت: يا خودێ قه‌بويلكه، و بۆ ته ژى وه‌كى وێ دوعايێ)). و ئه‌گه‌ر ئه‌م هه‌مى بۆ ئێك و دوو د هۆسا بين، و دوعا بۆ ئێك و دوو بكه‌ين نه‌دويره گونه‌هێت گه‌له‌كان ژ مه پويچ ببن و نه‌مينن، و ئه‌م د نڤستى، و خودێ چێتر دزانيت.
