ب / ئه‌و كه‌سێت دوعايێت وان قه‌بول دبن ئه‌ڤێت خوارێنه:
ئێك: هه‌ركه‌سێ مه‌رج و رێز و ره‌وشتێت دوعايێ ب جه بينيت، و دوعايا وى يا راست و دورست بيت.
دوو: ئه‌و كه‌سێ د ته‌نگاڤيه‌كا مه‌زندا، و بزانيت كه‌س نينه وى ژێ ده‌ربێخيت، خودێ نه‌بيت، و ژ دل و كه‌ل ده‌ستێت خۆ بلند بكه‌ت، و دوعا بكه‌ت ((أَمَّن يُجِيبُ الْمُضْطَرَّ إِذَا دَعَاهُ وَيَكْشِفُ السُّوءَ)) و هه‌روه‌كى ئه‌و سێيێت چۆينه شكه‌فتێ و ده‌رگه‌هێ شكه‌فتێ لێ هاتيه گرتن، پشتى زانى كه‌س نينه وان رزگاركه‌ت خودێ نه‌بيت دوعا ب باشترين كار و كريارێت خۆ كرن و خودێ ئه‌و رزگاركرن.
سآ: مرۆڤێ سته‌ملێكرى، پێغه‌مبه‌ر (سلاڤێت خودێ لێ بن) دبێژيت: خۆ ژ دوعايا مرۆڤێ سته‌م لێكرى بده‌نه پاش، ب راستى چو په‌رده د ناڤبه‌را دوعا وى و خودێدا نينه، ئيمام بوخارى و موسلمى ڤه‌گێرايه. ژبه‌ر هندێ زانايێت مه دبێژن خودێ دوعايا سته‌ملێكرى قه‌بويل دكه‌ت، خۆ هه‌كه يێ خراب و موسلمان ژى نه‌بيت. و پێغه‌مبه‌ر (سلاڤێت خودێ لێ بن) دبێژيت: ((خودێ مه‌زن دبێژيته مرۆڤێ سته‌ملێكرى ئه‌ز ب هێز و مه‌زناتيا خۆكه‌م، ئه‌ز دێ هاريكاريا ته كه‌م و ته ب سه‌رئێخم خۆ هه‌كه پشتى ده‌مه‌كێ دى بيت. ئيمام ترمزى ڤه‌گێرايه.
چار: مرۆڤێ ب رۆژى و يێ رێڤنگ و پێشه‌وا (خوندكار، به‌رپرسێ ئێكێ) يێ دادپه‌روه‌ر، پێغه‌مبه‌ر (سلاڤێت خودێ لێ بن) دبێژيت: ((سێ كه‌سان دوعايا وان نائێته ڤه‌گێران، پێشوايێ دادپه‌روه‌ر، و رۆژيگر هه‌تا فتارێ دكه‌ت، و دوعايا سته‌ملێكرى)) ئيمام ئه‌حمه‌د و ترمزى و ئبن ماجه ڤه‌گێرايه. ديسا پێغه‌مبه‌ر دبێژيت: ((سێيان دوعايا وان دهێته قه‌بويلكرن: دوعايا بابێ، و دوعايا رێڤنگى و دوعايا سته‌ملێكرى)). ئيمام ئه‌حمه‌د ڤه‌گێرايه.
پێنج: دوعايا كورێ ژ خودێ ترس و يێ قه‌نج و باش بۆ ده‌يبابان. پێغه‌مبه‌رێ خۆشتڤى (سلاڤێت خودێ لێ بن) دبێژيت: ((ئه‌گه‌ر مرۆڤ مر كار و كريارێت وى ژ دنيايێ قه‌تيان و نه‌مان ژ سێ رێكان نه‌بيت، كوره‌كێ باش يان كچه‌كا باش دوعا بۆ بكه‌ت، زانينه‌ك پاش خۆ هێلابيت مفاى ژێ وه‌رگريت، خێره‌كا به‌رده‌وام بۆ خۆ كربيت)). ئيمام موسلمى ڤه‌گێرايه.
شه‌ش: دوعايا مرۆڤێ موسلمان بۆ برايێ خۆ دكه‌ت، به‌لێ نه‌په‌نى وى و پشت ويرِا. پێغه‌مبه‌ر (سلاڤێت خودێ لێ بن) دبێژيت: ((نينه مرۆڤه‌كێ موسلمان دوعايێ بۆ برايێ خۆ يێ موسلمان پشت ويرِا بكه‌ت، هه‌كه ملياكه‌ته‌ك نه‌بێژيت بۆ ته ژى وه‌كى وێ دوعايێ. ئيمام موسلمى ڤه‌گێرايه.
حه‌فت: دوعايا مرۆڤێ تۆبه‌دار، ئه‌و تۆبا راست و دورست.
هه‌شت: دوعايا وى يێ ب شه‌ڤ هشيار دبيت و ژ خه‌وا خۆ رادبيت. پێغه‌مبه‌ر (سلاڤێت خودێ لێ بن) دبێژيت: ((هه‌ركه‌سێ شه‌ڤێ ژ خه‌و رابيت و بێژيت: (لا إله إلا الله وحده لاشريك له، له الملك وله الحمد، وهو على كل شيء قدير، الحمد لله وسبحان الله ولا إله إلا الله والله أكبر ولا حول ولا قوه إلا بالله) و بێژيت: خودێ وۆ گونه‌هێت من ژێ ببه، يان دوعا بكه‌ت خودێ دێ دوعايێت وى قه‌بويل كه‌ت، و هه‌كه رابوو ده‌ستنڤێژ شويشت و نڤێژ كر نڤێژا وى دێ هێته قه‌بويلكرن)). ئيمام بوخارى ڤه‌گێرايه، و خودێ چێتر دزانيت.
