ب / پێدڤيه مرۆڤ يێ هشيار بيت، و دوعا ب ره‌نگێ دورست بكه‌ت و نه‌كه‌ڤيته د چو خه‌له‌تياندا وه‌ختێ دوعايێ دكه‌ت، دا خودێ به‌ره‌كه‌تێ بێخيته دوعايێت وى، و كۆمه‌كا خه‌له‌تيان يێت هه‌ين گه‌له‌ك دوعاكه‌ر دكه‌ڤنه تێدا، دێ بۆ ته ئاشكه‌را كه‌ين دا خۆ ژێ بپارێزى، ئه‌و ژى ئه‌ڤه‌نه:
ئێك: دوعاكرن ب ناڤێ ئێكێ دى غه‌يرى خودێ، ڤێجا چ ئه‌و دار بيت، به‌ر بيت، مه‌رقه‌د و مرۆڤ بن، نابيت مرۆڤ هه‌واركه‌ته كه‌سێ ژبلى خودێ، و دڤێت دوعا ئێكسه‌ر ژ خودێ بكه‌ين، و نه‌يا دورسته ب چو ره‌نگان دوعا ژ غه‌يرى خودێ بێته‌كرن.
دوو: نفرينان ل خۆ بكه‌ت، هنده مرۆڤ ئه‌گه‌ر نه‌خۆشيا وان گران بوو، نفرينان ل خۆ دكه‌ن، و دوعا نه‌مانێ بۆ خۆ دخوازن و دكه‌ن، و ئه‌ڤه ژى يا خه‌له‌ته. قه‌يس (خودێ ژێ رازى بيت) دبێژيت: ئه‌ز هاتمه ده‌ف (خه‌بابێ كورێ ئه‌رتى) د حه‌فت جهارا له‌شێ وى هاتبوو داخكرن، ئينا گۆت: (ئه‌گه‌ر ژبه‌ر هندێ نه‌بايه پێغه‌مبه‌رى (سلاڤێت خودێ لێ بن) ئه‌م يێت داينه پاش و نه‌هێلايه ئه‌م نفرينا ل خۆ بكه‌ين، ئه‌ز دا دوعا مرنێ بۆ خۆ كه‌م). ئيمام بوخارى و موسلمى ڤه‌گێرايه. ديسا پێغه‌مبه‌ر (سلاڤێت خودێ لێ بن) دبێژيت: ((كه‌س ژ هه‌وه ژبه‌ر نه‌خۆشيه‌كا ب سه‌رێ وى هاتى داخوازا مرنێ بۆ خۆ نه‌كه‌ت، و هه‌كه چو چاره نه‌بيت هه‌ر دێ داخوازا مرنێ كه‌ت، بلا بێژيت: خودێ وۆ.. من بهێله ساخ هندى مانا من د خێرا مندا بيت، و من بمرينه هندى مرنا من د خێرا مندا بيت)). ئيمام موسلم و ئه‌حمه‌د و ترمزى ڤه‌گێرايه.
سێ: له‌ز ل سزاكرنا قيامه‌تێ: وه‌كى مرۆڤ بێژيت: خودێ وۆ.. ئه‌و ئيزايا دێ تو رۆژا قيامه‌تێ ده‌يه به‌ر من د دنيايێدا بده من، دا رۆژا قيامه‌تێ بچمه به‌حه‌شتێ، و يا دورست دوعا سلامه‌تكرنێيه بۆ دنيا و ئاخره‌تێ. ئه‌نه‌س (خودێ ژێ رازى بيت) دبێژيت: پێغه‌مبه‌رى (سلاڤێت خودێ لێ بن) سه‌را موسلمانه‌كى دا هند لاواز ببوو هه‌تا وه‌كى چويچه‌لۆكه‌كێ لێ هاتبوو: ئينا پێغه‌مبه‌رى (سلاڤێت خودێ لێ بن) گۆتێ: ((ئه‌رێ ته بۆ خۆ دوعايه‌ك دكر))؟ گۆت: به‌لێ، من دگۆت: خودێ وۆ.. ئه‌و سزايا ته بۆ من د ئاخره‌تێدا دانايى له‌زێ بۆ من لێ بكه د دنيايێدا ب سه‌رێ من بينه. ئينا پێغه‌مبه‌رى (سلاڤێت خودێ لێ بن) گۆت: ((وه‌ى (سبحان الله) تو نه‌شێى خۆ ل به‌ر بگرى ـ ته بۆ نه‌دگۆت: (( رَبَّنَا آتِنَا فِي الدُّنْيَا حَسَنَةً وَفِي الْآخِرَةِ حَسَنَةً وَقِنَا عَذَابَ النَّارِ)) ئيمام ئه‌حمه‌د ڤه‌گێرايه. ئانكو: خودێ وۆ.. د دنيايێدا باشى و خۆشيێ بده مه و ئاخره‌تێ ژى باشى و خۆشيێ بده مه و مه ژ ئاگرێ جه‌هنه‌مێ بپارێزه.
چار: دوعاكرن ب تشته‌كێ موخالفى شه‌ريعه‌تى: وه‌كى بێژيت: خودێ فلان موسلمانى نه‌به به‌حه‌شتێ.
پێنج: دوعا گونه‌هێ بكه‌ت: وه‌كى بێژيت: ئه‌ى خودێ وێهه بهێله د گونه‌هێدا يان فلان كه‌سى ل سه‌ر گاوريێ بمرينه يان فلان كه‌سى به‌رهنگارى گونه‌هێ بكه.
شه‌ش: دوعا نه‌خۆشيێ د ناڤبه‌را مرۆڤێت ئێكدا، كو بێژيت: خودێ وۆ.. ناڤبه‌را فلانى و ده‌يكا وى يان هه‌ر كه‌سێ دى يێ مرۆڤێ وى نه‌خۆش بكه، يان ناڤبه‌را فلانى و هه‌ڤسه‌را وى... يان ناڤبه‌را موسلمانان... و هتد.
حه‌فت: دوعا بكه‌ت بۆ ته‌جريبه كا خودێ دێ دوعايێت وى قه‌بويل كه‌ت ئان نه؟
هه‌شت: دوعا خێرێ بكه‌ت، دا خرابيێ بكه‌ت، وه‌كى: دوعا مالى و ده‌ستهه‌لاتيێ بكه‌ت دا خۆ مه‌زن بكه‌ت و موسلمانان بێشينيت.
نه‌ه: دوعا بۆ خۆ نه‌كه‌ت و هه‌ر خۆ بهێليته ب هيڤيا دوعايێت غه‌يرى خۆڤه، ب هێجه‌تا هندێ ئه‌و يێ گونه‌هكاره، ڤێجا ئه‌و دوعا ناكه‌ت، و ژ وێهه و وێهه دخوازيت بۆ دوعا بكه‌ن، و ئه‌و ب خۆ چوجار دوعا بۆ خۆ ناكه‌ت.
ده‌هـ: كێم ئومێدى و بێ هيڤيبوون: دبيت هنده مرۆڤان نه‌خۆشيه‌ك گه‌هشتبيتێ بۆ جه‌ربه‌كرنا وى كا بێنفره‌هيا وى چه‌نده، ڤێجا شه‌يتان دێ بۆ بێژيت يا ژ خۆيه ئێشا ته هندا مه‌زنه خۆ تو دوعا ژى بكه‌ى هه‌ر قه‌بويل نابن، و ئه‌ڤه يا خه‌له‌ته دڤێت ئه‌م بزانين خودێ خودان شيانه ل سه‌ر هه‌مى تشتان هه‌ر تشتێ بڤێت: هه‌بيت دێ هه‌بيت، خۆ ئێش و نه‌خۆشيا مرۆڤى چه‌ندا مه‌زن بيت. به‌رێ خۆ بدێ ئه‌ڤه زه‌كه‌ريا پێغه‌مبه‌ره، زارِۆك نه‌دبوون، و هه‌ڤسه‌را وى ژى ژ عوزرا خلاس ببوو و زارِۆك نه‌دبوون، به‌لێ دگه‌ل هندێ ژى بێهيڤى نه‌بوو و دوعا كرن ((قَالَ رَبِّ هَبْ لِي مِن لَّدُنكَ ذُرِّيَّةً طَيِّبَةً إِنَّكَ سَمِيعُ الدُّعَاءِ)) خودێ وۆ.. تو ژ نك خۆ دوينده‌هه‌كا پاقژ بده من ب راستى تويى دوعا وه‌رگر. خودێ دوعا وى قه‌بويل كر ((فَنَادَتْهُ الْمَلَائِكَةُ وَهُوَ قَائِمٌ يُصَلِّي فِي الْمِحْرَابِ أَنَّ اللَّهَ يُبَشِّرُكَ بِيَحْيَىٰ مُصَدِّقًا بِكَلِمَةٍ مِّنَ اللَّهِ وَسَيِّدًا وَحَصُورًا وَنَبِيًّا مِّنَ الصَّالِحِينَ)) ڤێجا ملياكه‌تان گازيكرێ، و ئه‌و ل سه‌ر نڤێژێ يێ راوه‌ستياى بوو د ميحرابێدا، گۆتنێ: خودێ مزگينيا يه‌حيايى دده‌ته ته، باوه‌ريێ ب هاتنا په‌يڤا خودێ كو عيسايه دئينيت و سه‌روه‌ر و خۆراگره و پێغه‌مبه‌ره‌كه ژ قه‌نجان. ڤێجا دڤێت هه‌ى موسلمان تو چو جاران بێ هيڤى نه‌بى، و دوعا نه‌هێلى، لێ مخابن ئه‌ڤرۆ چه‌ند هه‌نه دوعا بۆ كورێ خۆ يان كچا خۆ ناكه‌ن، و ده‌ست يێت ژ دوعايێ به‌رداين، ب هێجه‌تا هندێ يا ژ خۆيه چێنابن، ما دێ بۆچى دوعاكه‌م؟! ئه‌ڤ مرۆڤێ هۆسا چاوا ژ ره‌حما خودێ بێ هيڤى دبيت؟ ئه‌رێ ما نوزانيت خودێ دوعايێت ده‌يبابان قه‌بويل دكه‌ت، ئه‌ڤرۆ نه سوبه‌هى، و ئه‌و دوعا هه‌كه د ژيانا بابێدا قه‌بويل نه‌بوو، دبيت پشتى وه‌غه‌ركرنا وى بۆ خۆ تۆبه بكه‌ت و خێرا وى بگه‌هيته وان ده‌يبابان، و يا دى ما ده‌يباب ژ چ د خوساره‌تن هه‌كه به‌رده‌وام دوعا بكه‌ن. ديسا وه‌كى ڤێ هه‌كه تو بێژيه ئێكى دوعا بۆ موسلمانان بكه: خودێ وان بكه‌ته ئێك، و كار و بارێت وان بۆ وان راست و دورست بكه‌ت، و ساناهى بكه‌ت، و هاريكاريا وان بكه‌ت، دێ سه‌رێ خۆ هه‌ژينيت و بێژيت: يا ژ خۆيه موسلمان ببنه ئێك ئه‌ڤه قه‌ت نابيت، و ئه‌ڤ بێهيڤياتيه هه‌مى يا خه‌له‌ته و نه‌يا دورسته.
يازده: دوعا ب هنده ناڤێت خودێ بێته‌كرن نه د قورئانێدا هاتين و نه د حه‌ديسا پێغه‌مبه‌ريدا (سلاڤێت خودێ لێ بن).
دوازده: ديسا ژ خه‌له‌تيان زێده ده‌نگ بلندى ب دوعايێ.
سێزده: ديسا ژ خه‌له‌تيان دوعا ب حه‌زكرنا خودێڤه بێته گرێدان و بێژيت: خودێ وۆ.. ئه‌گه‌ر ته بڤێت ئه‌گه‌ر تو حه‌ز بكه‌ى.
چارده: ديسا ژ خه‌له‌تيان د وه‌ختێ دوعايێدا، دل يێ بێ ئاگه‌هـ بيت، و ترسا خودێ تێدا نه‌بيت، و دلێ مرۆڤى ب دورستى دگه‌ل خودێ نه‌بيت، و خۆشكاندن تێدا نه‌بيت، و خودێ چێتر دزانيت.
