ب / ده‌ستنڤێژێ هنده‌ك شه‌نگستێت هه‌ين، هه‌رگاڤا ئێك ژ وان نه‌هاته وه‌رگرتن، وى وه‌ختى ده‌ستنڤێژ نه‌يا دورسته، و نڤێژ ل سه‌ر نائێته ئاڤاكرن و پێ نائێته‌كرن، ئه‌و ژى ئه‌ڤه‌نه:
1 ـ ئنيه‌ت: ده‌ستنڤێژ بێ ئنيه‌ت نابيت، و نه‌يا دورسته، و جهێ ئنيه‌تێ ژى دله، ڤێجا هه‌رگاڤا كره دلێ خۆ كو دێ ب ده‌ستنڤێژ شويشتنێ رابيت، ئه‌ڤه به‌سى ويه، و ئه‌ڤه وى ئنيه‌تا خۆ ئينا و نه‌مه‌رجه ب ده‌ڤى بێژيت.
2 ـ شويشتنا سه‌روچاڤان ژ سه‌رێ ئه‌نيێ هه‌تا ئه‌رزينكێ ب درێژى و ژ گوهى هه‌تا گوهى ب فره‌هى.
3 ـ شويشتنا ده‌ستان هه‌تا ئه‌نيشكێ و ئه‌نيشك ژى دگه‌له.
4 ـ ڤه‌مالين و مه‌سحا هنده‌كێ ژ سه‌رى و ب سێ ره‌نگان دئێته‌كرن:
أ ـ ڤه‌مالين و مه‌سحا هه‌مى سه‌رى، كو ده‌ستێ خۆ دانيته سه‌ر پێشيا سه‌رێ خۆ و ببه‌ته پاتكێ و بزڤرِينيته‌ڤه.
ب ـ ڤه‌مالين و مه‌سحا هنده‌كێ ژ سه‌رى.
ج ـ ڤه‌مالين و مه‌سحا هنده‌ك سه‌رى ل بن ده‌رسۆكێ و پاشى يا مايى تمامكه‌ت ب سه‌ر ده‌رسۆكێڤه مه‌سح كه‌ت.
5 ـ شويشتنا پێيان هه‌تا گۆزه‌كێ.
6 ـ ب رێز و ل دويف ئێك ئه‌ندامێت ده‌ستنڤێژێ بشۆت، هه‌روه‌كى مه دياركرى، و چويان ب پاش و پێش نه‌ئێخيت.
ئه‌ڤه ئه‌و تشتن يێت دڤێت د ده‌ستڤێژێدا بن هه‌تا ده‌ستنڤێژ يا دورست بيت و نڤێژ پێ بێته‌كرن، و هه‌كه ئێك ژ ڤان شه‌نگستنا ژ ده‌ستنڤێژێ ڤه‌ما هنگى تو يێ بێ ده‌ستنڤێژى بلا ته هه‌ر پێنج شه‌نگستێت دى كربن، له‌وا دڤێت موسلمان ب چو ره‌نگان خه‌مساريێ د ڤان شه‌نگستاندا نه‌كه‌ت و يێ لێ هشيار بيت دا زه‌حمه‌تا وى ب ئاڤێدا نه‌چيته خوارێ و نڤێژێت وى ژ وى نه‌چن، به‌لێ سونه‌ت نه‌وه‌كى شه‌نگستانه، هه‌كه ته نه‌كرن ژى ده‌ستنڤێژا ته يا دورسته و چو كێماسى تێدا نينه، به‌لێ ئينانا ڤان سونه‌تان ده‌ستنڤێژێ ب خێرتر دئێخيت و خێران ل ته زێده دكه‌ت و مرۆڤێ خێرا خۆ دڤێت دێ ل ڤان سونه‌تان هشياربيت دا خێران ل خۆ زێده‌كه‌ت، و سونه‌تێت ده‌ستنڤێژگرتنێ ئه‌ڤه‌نه:
ئينانا ناڤێ خودێيه دگه‌ل ده‌ستنڤێژگرتنێ و ب ڤى ره‌نگى: (بسم الله) و جهێ وێ پشتى ئنيه‌ت ئينانێيه، و شويشتنا ده‌ستانه سێ جاران به‌رى ده‌ستێ خۆ بكه‌ته د ئامانێ ئاڤێدا، و كارئينانا سيواكيه، و ئاڤ تێوه‌ردانا ده‌ڤيه سێ جاران و ب سێ مستان، و ئاڤ هه‌لكێشان و ئێخستنا بن دفنێيه و ده‌رێخستنا وێ سێ جاران و ب سێ مستان، و ئاڤ ب ناڤ تلان ئێخستنه و لڤاندنا گوستيركا ل تلێه دا ئاڤ جهێ وێ بگريت، و ئاڤ ب ناڤ رهان ئێخستنه نه‌خاسمه رهێت بۆش ب رێكا تلان، و ڤه‌مالينا گوهانه ب ئاڤه‌كا نوى، و ئه‌گه‌ر هه‌ر ب ئاڤا مه‌سحا سه‌رى ژى بيت دورسته، ژ ده‌رڤه و ژ ناڤدا ب تلا شه‌هدێ و به‌رانى، و ڤه‌مالين و مه‌سحا هه‌مى سه‌ريه، و شويشتنا ئه‌ندامێت ده‌ستنڤێژ شويشتنێيه سێ جاركى، و هه‌كه جاره‌كێ يان دوو جاران بشۆت دورسته، به‌لێ سێ جاران ب خێرتره، و د شويشتنا ده‌ست و پێياندا ره‌خێ راستێ ب سه‌ر يێ چه‌پێ بێخى، و په‌رخاندن و ڤه‌مالينا جهێ شويشتنێيه ـ ده‌ستێ خۆ ڤێرا بينى و ببه‌ي ـ، و نه‌ئاخڤي دبه‌ر ده‌ستنڤێژ شويشتنێرا، و نابيت ده‌رِێژكرن و ده‌ست درِيانێ (ئيسراف)ێ د ئاڤێدا بكه‌ى، و زێده‌ى پێدڤيێ ب كار بينى، خۆ هه‌كه ل سه‌ر رويبارى يان ده‌ريايێ ژى بي دڤێت ئابۆرێ د ئاڤێدا بكه‌ى، و شه‌هده‌دان و خواندنا دوعايێيه پشتى ده‌ستنڤێژ شويشتنێ و ب ڤى ره‌نگى: (أَشْهدُ أَنْ لا إِله إِلاَّ اللَّه وحْدَه لا شَريكَ لهُ، وأَشْهدُ أَنَّ مُحمَّدًا عبْدُهُ وَرسُولُه، اللهم اجْعَلْنِي من التَّوَّابِينَ وَاجْعَلْنِي من الْمُتَطهِّرِينَ)، ئانكو: ئه‌ز شه‌هده دده‌م كو ب راستى چو په‌رستى يێت راست و دورست نينن خودێ نه‌بيت، و يێ بێ شريك و بێ هه‌ڤاله، و موحه‌ممه‌د به‌نده‌يێ وييه، و پێغه‌مبه‌رێ وييه، يا خودێ، من ژ زێده ته‌وبه‌داران بدانه و من ژ پاقژكريان بدانه، و پاشى كرنا دوو ركاعه‌تێت سونه‌ته پشتى ده‌ستنڤێژ شويشتنێ.
