ب / ژ كه‌ره‌ما خودێ ده‌ستنڤێژ ژبلى پاك و پاقژيێ خێره‌كا مه‌زن ژى دگه‌هيته مرۆڤى و گه‌له‌ك حه‌ديسێت پێغه‌مبه‌رى (سلاڤێت خودێ لێ بن) ل سه‌ر خێرا ده‌ستنڤێژێ هاتينه، ژ وان:
پێغه‌مبه‌رێ خۆشتڤى (سلاڤێت خودێ لێ بن) دبێژيت: ((هه‌كه به‌نده‌يێ موسلمان، يان يێ خودان باوه‌ر ده‌ستنڤێژا خۆ شويشت و سه‌ر و چاڤێت خۆ شويشتن، هه‌ر گونه‌هه‌كا ب چاڤێ خۆ به‌رێ خۆ دايێ دگه‌ل ئاڤێ ژ سه‌ر و چاڤێت وى ده‌ركه‌ڤيت، يان دگه‌ل چپكا دويماهيكێ يا ئاڤێ، و هه‌كه ده‌ستێت خۆ شويشتن، هه‌ر گونه‌هه‌كا ب ده‌ستێت خۆ كرى، دگه‌ل ئاڤێ ژ ده‌ستێت وى ده‌ركه‌ڤيت، يان دگه‌ل چپكا دويماهيكێ يا ئاڤێ، و هه‌كه پێت خۆ شويشتن، هه‌ر گونه‌هه‌كا ب پێت خۆ چۆيێ، دگه‌ل ئاڤێ ده‌ركه‌ڤيت، يان دگه‌ل چپكا دويماهيكێ يا ئاڤێ، هه‌تا ژ گونه‌هان پاقژ ده‌ردكه‌ڤيت)).
ديسا پێغه‌مبه‌رێ خودێ (سلاڤێت خودێ لێ بن) دبێژيت: ((ئه‌ز نيشا هه‌وه نه‌ده‌م تشتێ خودێ گونه‌هان پێ ژێ دبه‌ت، و ده‌ره‌جه‌يان پێ بلند دكه‌ت؟)) گۆتن: به‌لێ يا پێغه‌مبه‌رێ خودێ، گۆت: ((ده‌ستنڤێژ شويشتنا دورست د نه‌خۆشياندا، و زێده پێنگاڤ هاڤێتن بۆ مزگه‌فتان و خۆگرتن ل هيڤيا نڤێژێ پشتى كرنا نڤێژێ، ئه‌ڤه‌يه هه‌ژى مرۆڤ خۆ بۆ ڤالا و ئاسێ بكه‌ت)).
ديسا پێغه‌مبه‌رێ خۆشتڤى (سلاڤێت خودێ لێ بن) دبێژيت: ((وه‌ختێ مرۆڤێ موسلمان، ده‌ستنڤێژا خۆ دشۆت، گونه‌هێت وى ژ گوه و چاڤ و ده‌ست و پيان ده‌ردكه‌ڤن و نامينن، و پاشى هه‌كه روينشته خوار، بێ گونه‌ه روينشت)).
ديسا پێغه‌مبه‌رێ خۆشتڤى (سلاڤێت خودێ لێ بن) دبێژيت: ((وه‌ختێ موسلمان ده‌ستنڤێژا خۆ ـ وه‌كى فه‌رمان پێ هاتيه‌كرن ـ دشۆت، گونه‌هێت وى يێت گوه و چاڤ و ده‌ست و پيان دچن و نامينن.
ديسا پێغه‌مبه‌رێ خۆشتڤى (سلاڤێت خودێ لێ بن) دبێژيت: ((نينه ئێك ژ هه‌وه ده‌ستنڤێژا خۆ راست و دورست بشۆت، پاشى بێژيت: ئه‌ز شه‌هده دده‌م كو ب راستى چو په‌رستى يێت راست و دورست نينن خودێ نه‌بيت، و يێ بێ شريك و بێ هه‌ڤاله، و موحه‌ممه‌د به‌نده‌يێ ويه و پێغه‌مبه‌رێ ويه، هه‌كه هه‌ر هه‌شت ده‌رگه‌هێت به‌حه‌شتێ بۆ ڤه‌نه‌بن)).
ديسا پێغه‌مبه‌رێ خۆشتڤى (سلاڤێت خودێ لێ بن) دبێژيت: ((ب راستى رۆژا قيامه‌تێ ئوممه‌تا من سه‌ر و چاڤ گه‌ش و پێ به‌له‌ك ژ شوينوارێت ده‌ستنڤێژێ دێ هێنه گازيكرن، ڤێجا هه‌ركه‌سێ ژ هه‌وه بڤێت گه‌شاتيا سه‌ر و چاڤێت خۆ زێده‌كه‌ت، بلا زێده‌كه‌ت)).
ئه‌بو هوره‌يره (خودێ ژێ رازي بيت) دبێژيت: من گول هه‌ڤالێ خۆ بوو (سلاڤێت خودێ لێ بن) دگۆت: ((چه‌كێ به‌حه‌شتێ ژ موسلمانى دێ گه‌هيته جهێ ده‌ستنڤێژ دگه‌هيتێ)).
ديسا پێغه‌مبه‌رێ خۆشتڤى (سلاڤێت خودێ لێ بن) دبێژيت: ((يێ ده‌ستنڤێژێ بشۆت و راست و دورست بشۆت، گونه‌هێت وى ژ له‌شێ وى ده‌ردكه‌ڤن هه‌تا ژ بن نوينۆكێت وى ده‌ردكه‌ڤن)).
عوسمانێ كورێ عه‌فانى (خودێ ژێ رازي بيت) گۆت: من پێغه‌مبه‌رێ خودێ (سلاڤێت خودێ لێ بن) ديت ده‌ستنڤێژا خۆ وه‌كى ڤێ ده‌ستنڤێژا من شويشت، پاشى گۆت: ((هه‌ركه‌سێ هۆسا ده‌ستنڤێژا خۆ بشۆت، گونه‌هێت وى يێت بۆرين هاتنه ژێبرن، و نڤێژا وى و چۆنا وى بۆ مزگه‌فتێ بۆ زێده‌نه)).
ديسا پێغه‌مبه‌رێ خۆشتڤى (سلاڤێت خودێ لێ بن) دبێژيت: ((ئه‌ز تشتێ خودێ گونه‌هان پێ ژێ دبه‌ت، و ده‌ره‌جه‌يان پێ بلند دكه‌ت نيشا هه‌وه نه‌ده‌م؟))، گۆتن: به‌لێ يا پێغه‌مبه‌رێ خودێ، گۆت: ((ده‌ستنڤێژ شويشتنا دورست د نه‌خۆشياندا و زێده پێنگاڤ هاڤێتن بۆ مزگه‌فتان و خۆگرتن هيڤيا نڤێژێ پشتى كرنا نڤێژێ، ئه‌ڤه‌يه هه‌ژى مرۆڤ خۆ بۆ ڤالا و ئاسێ بكه‌ت)).
