ب / ل دۆر زوهاكرنا سه‌روچاڤان پشتى ده‌ستنڤێژ شويشتنێ جهێ ئاخفتنيێه د ناڤبه‌را زاناياندا.
زانايێ ناڤدار نه‌وه‌وى (خودێ ژێ رازي بيت) دبێژيت: زانا و هه‌ڤالێت مه د راستا زوهاكرنا سه‌روچاڤاندا پشتى ده‌ستنڤێژێ پێنج بۆچۆنن: يا ژ هه‌ميان به‌لاڤتر، نه‌زوهاكرن موسته‌حه‌به و ب خێرتره، و زوهاكرن نه مه‌كروهه. و يا دووێ: زوهاكرن مه‌كروهه. و يا سيێ: زوهاكرن و نه‌زوهاكرن هه‌ردوو وه‌كى ئێك د دورستن، و دبێژيت: ئه‌ز ڤێ دهه‌لبژێرم چونكى ئيستحباب و نه‌هێلان، پێدڤى به‌لگه‌يێ ئاشكرايه. و يا چارێ: زوهاكرن موسته‌حه‌به و ب خێرتره. و يا پێنجێ: زوهاكرن هاڤينێ مه‌كروهه و زڤستانێ نه. و پاشى دبێژيت: سه‌حابى سێ بۆچۆنن:
ئه‌نه‌سێ كورێ مالكى(خودێ ژێ رازي بيت) دبێژيت: زوهاكرن پشتى شويشتنا ده‌ستنڤێژێ و سه‌رشويشتنا جه‌نابه‌تێ دورسته، و زوهاكرن و نه‌زوهاكرن وه‌كى ئێكه. ئبن عومه‌ر (خودێ ژێ رازي بيت) دبێژيت: زوهاكرن بۆ ده‌ستنڤێژێ و جه‌نابه‌تێ مه‌كروهه. و ئبن عه‌باس (خودێ ژێ رازي بيت) دبێژيت: بۆ ده‌ستنڤێژێ مه‌كروهه و بۆ جه‌نابه‌تى نه‌مه‌كروهه.
و به‌لگه‌يێ وان يێت دبێژن نه‌زوهاكرن خێرتره.. حه‌ديسا دايكا مه موسلمانانه مه‌يمونه (خودێ ژێ رازي بيت)، دبێژيت: من كه‌فيكه‌ك پێشكێشى پێغه‌مبه‌رێ خودێ كر (سلاڤێت خودێ لێ بن) پشتى سه‌رێ خۆ بۆ جه‌نابه‌تێ شويشتى وه‌رنه‌گرت و زڤرِاند، به‌لێ زانا دبێژن: ئه‌ڤه نابيته به‌لگه ل سه‌ر نه‌دورستيا زوهاكرنێ؛ چونكى هه‌ر د عه‌ينى حه‌ديسێدا دايكا مه موسلمانان دبێژيت: كه‌فيك وه‌رنه‌گرت و زڤرِاند و ده‌ستێت خۆ داقوتان، و هه‌كه داقوتان يا دورست بيت.. زوهاكرن وه‌كى وێيه، و دبيت وه‌رنه‌گرتنا و زڤرِاندنا وى بۆ كه‌فيكێ ژبه‌ر ئه‌گه‌ره‌كێ دي بيت، كو دبيت يێ ب له‌ز بيت. و هاتيه زانين ب هنده حه‌ديسێت دى پێغه‌مبه‌رێ خۆشتڤى (سلاڤێت خودێ لێ بن) كه‌فيكه‌ك هه‌بوو سه‌روچاڤێت خۆ پشتى ده‌ستنڤێژێ زوها دكرن. و سه‌لمانێ فارسى (خودێ ژێ رازي بيت) ڤه‌دگێريت، دبێژيت: پێغه‌مبه‌رێ خودێ (سلاڤێت خودێ لێ بن) پشتى ده‌ستنڤێژا خۆ شويشتى عه‌بايه‌كێ هريێ ل به‌ر بوو، وه‌رگێرا و سه‌روچاڤێت خۆ پێ زوهاكرن، هه‌رچه‌نده هنده زانايان ئاخفتنا ل سه‌ر ڤێ حه‌ديسێ هه‌ى يا به‌يهقى و ئبن ماجه و (گبراني) ڤه‌گێراى، به‌لى ژ كۆمه‌كا سه‌حابه و تابعيان زوهاكرن هاتيه زانين هه‌روه‌كى ئبن ئه‌بى شه‌يبه (خودێ ژێ رازي بيت) د موسه‌نه‌فا خۆدا دئينيت: سه‌حابى وه‌كى عوسمانێ كورێ عه‌فانى و حه‌سه‌نێ كورێ عه‌لى و ئه‌نه‌سێ كورێ مالكى، و تابعى وه‌كى مه‌سروق و ئبن سيرين و حه‌سه‌ن به‌سرى خودێ ژ هه‌ميان رازى بيت و زانا باراپتر دگه‌ل هندێنه زوهاكرن دورسته و چو تێدا نينه، وه‌كى ئه‌بو حه‌نيفه و ئيمام مالك و سه‌ورى و ئه‌وزاعى خودێ ژ وان هه‌ميان رازى بيت و خودێ چێتر دزانيت.
