ب / هه‌ر وه‌ختێ وێ زێده‌تر ژ عادا خۆ خوين ديت، دڤێت بزانيت ئه‌و رۆژێت زێده، ئستيحازه‌نه، نه عاده‌نه. ل ڤێرێ دبيت ئه‌ڤ پسياره بێته پێش و دبيت ل سه‌ر دلێ گه‌له‌ك ژنانه و حه‌زدكه‌ن بێته‌كرن: ئه‌رێ عاده هنده رۆژ بوون و هندێ كێشا؟ (هه‌ر جار پێنج رۆژ بوون. ڤێ هه‌يڤێ ب تنێ ده‌هـ رۆژان كێشا).
ئها ئه‌ڤه وى وه‌ختى دێ پێنج رۆژان ب تنێ خۆ گريت و ژ پێنجان وێڤه دێ سه‌رێ خۆ شۆت و هه‌مى ئه‌رك دكه‌ڤنه سه‌ر.
دبيت هنده ژن نه‌زانن خوينا ئستيحازێ چيه، ژن سێ خوينا دبينيت ئێك يا عادێيه، يا دووێ يا چلكان و بچويك بوونێيه، و خوينا سيێ يا ژن دبينيت دبێژنێ ئستيحازه: ئه‌و خوينه يا به‌رده‌وام ژن دبينيت پشتى وه‌ختێ وێ يێ ئاشكه‌را دبۆريت. بۆ نموونه: ئه‌گه‌ر عادا وێ پێنج رۆژ بن، هه‌يڤه‌كێ بگه‌هيته ده‌هـ رۆژان. ئه‌و پێنج رۆژێت زێده ئستيحازه‌نه. يان وه‌ختێ جارا ئێكێ خوينێ دبينيت ژى نه‌راوه‌ستيت ديسا ئه‌و ژى ئستيحازه‌يه.
ڤێجا دڤێت ژن گه‌له‌كا شاره‌زا و ئاقل بيت و ژێك جودا بكه‌ت، چونكى هه‌ر خوينه‌كێ حوكمێ خۆ يێ هه‌ى، بۆ ئستيحازێ سه‌رێ خۆ ناشۆت و نه‌ئه‌ركه بشۆت، به‌لێ هه‌ر نڤێژه‌كا فه‌رز دێ ده‌ستنڤێژه‌كێ بۆ گريت و هه‌تا نڤێژا دى دئێت دشێت هندى بڤێت سونه‌تان ب وێ ده‌ستنڤێژێ بكه‌ت و بلا خوينێ ژى ببينيت كارتێكرنێ ناكه‌ته سه‌ر ده‌ستنڤێژا وێ، به‌لێ ئه‌گه‌ر وه‌ختێ نڤێژه‌كا دى يا فه‌رز هات دڤێت ده‌ستنڤێژه‌كا نوى بۆ بگريت و هۆسا و خودێ چێتر دزانيت.
