1ـ ئه‌گه‌ر ژنێ عادا خۆ زانى، و عادا وێ يا ئاشكه‌را بيت، هند رۆژان دێ خۆ گريت و پاشى دێ خۆ شۆت و نڤێژان كه‌ت، به‌لگه و نيشان به‌حسێ ژنه‌كێ بۆ پێغه‌مبه‌رى (سلاڤێت خودێ لێ بن) هاته‌كرن كو ژنه‌كا هۆسا يا هه‌ى گه‌له‌ك خوينا وێ دئێت، پێغه‌مبه‌رى (سلاڤێت خودێ لێ بن) گۆت: (به‌رى هينگێ چه‌ند رۆژان دما، بلا هند ژ هه‌يڤێ خۆ بگريت، پاشى بلا سه‌رێ خۆ بشۆت و نڤێژێت خۆ تێدا بكه‌ت) نه‌سائى ڤه‌گێرِايه..
2ـ ب زانينا ره‌نگێ خوينێ ئه‌گه‌ر رۆژێت خۆ نه‌زانيت كا چه‌ندن ب ره‌نگێ خوينێ دبيت بزانيت، خوينا عادێ يا ره‌شه، هندى خوين يا ره‌ش بيت دێ خۆ گريت و ئه‌گه‌ر ژ ره‌شى ده‌ركه‌فت بۆ ره‌نگه‌كێ دى، وى وه‌ختى ژ عادێ ده‌ركه‌فت و بێ نڤێژى ب دويماهى هات، و كه‌فته د ئستيحازێدا و دڤێت سه‌رێ خۆ بشۆت و نڤێژێت خۆ بكه‌ت.. به‌لگه و نيشان ل سه‌ر ڤێ چه‌ندێ، پێغه‌مبه‌رى (سلاڤێت خودێ لێ بن) گۆته فاتيمايا كچا ئه‌بى حوبه‌يشى (خودێ ژێ رازي بيت) ده‌مێ هاتيه ده‌ف پێغه‌مبه‌رى، و گۆتيێ: ئه‌ز پاقژ نابم؛ خوين هه‌ر يا دئێت ئه‌ز چ بكه‌م؟ ئينا پێغه‌مبه‌رى گۆتێ: ((خوينا عادێ يا ئاشكه‌رايه يا ره‌شه، ئه‌گه‌ر ژ وى ره‌نگى ده‌ركه‌فت رامانا وێ ئه‌وه تو ژ عادێ ده‌ركه‌فتى، دڤێت سه‌رێ خۆ بشۆى و نڤێژێت خۆ بكه‌ى)) نه‌سائى ڤه‌گێرِايه..
3ـ ئه‌گه‌ر رۆژێت خۆ نه‌زانيت و چو ژ ره‌نگى ژى نه‌زانيت، وه‌كى كچا ژ نوى بالغ بووى، و ئه‌ڤ خوينه ديت و نه‌راوه‌ستيا. و ژ نوى دبينيت نه رۆژان دزانيت نه چو ژ ره‌نگى دزانيت كو ژێك ببه‌ته ده‌رێ، ئه‌ڤه خوينا عادێيه يا ره‌شه و ئه‌ڤه يا ئستيحازێيه ره‌نگه‌كێ ديه.. وى وه‌ختى ئه‌و دێ به‌رێ خۆ ده‌تێ كا باراپتر ژنێت وێ ده‌ڤه‌رێ نه‌خاسمه ژنێت نێزيكى وێ ژ خويشك و دۆتمام و كه‌س و كاران كا چه‌ند دمينن و رۆژێت وان چه‌ندن، هند دێ خۆ گريت و نڤێژان تێدا ناكه‌ت، پشتى هينگێ دێ سه‌رێ خۆ شۆت و نڤێژان كه‌ت و خه‌م نينه بلا خوين هه‌ر يا به‌رده‌وام بيت. حمنا (خودێ ژێ رازي بيت) دشا پێغه‌مبه‌رى (سلاڤێت خودێ لێ بن) دبێژيت: ئه‌ز هاتمه ده‌ف پێغه‌مبه‌رى (سلاڤێت خودێ لێ بن)، ل مالا خويشكا من زه‌ينه‌بێ بوو، من گۆتێ: حال و مه‌سه‌لێت من ئه‌ڤه‌نه (كو به‌رده‌وام هه‌مى هه‌يڤێ ئه‌ز خوينێ دبينم، و ناهێليت ئه‌ز نڤێژ و رۆژيان بگرم.. ڤێجا تو چ فه‌رمان ل من دكه‌ى؟).. ئينا پێغه‌مبه‌رى (سلاڤێت خودێ لێ بن) گۆتێ: ((بۆچى تو په‌مبى ب كار نائينى، به‌لكى خوينێ بگريت))، گۆت: پتره ژ هندێ، گۆت: ((باشه پاته‌يه‌كى بێخه به‌ر))، گۆت: ژ هندێ پتره، گۆت: ((جلكه‌كێ دى بكه به‌ر خۆ))، گۆت: ژ هندێ پتره، خوينا من گه‌له‌ك دئێت. ئينا پێغه‌مبه‌رى (سلاڤێت خودێ لێ بن) گۆتێ: ((ئه‌ز دێ دوو تشتان بۆ ته بێژم، هه‌چيا تو بكه‌ى دورسته و تو چێتر دزانى، ئه‌ڤه تشته‌كه ژ شه‌يتانى دڤێت رۆژێت ژنان ل به‌ر به‌رزه‌كه‌ت (يا پێدڤيه ئه‌م بۆ شه‌يتانى نه‌هێلين)، شه‌ش رۆژان ئان حه‌فتان خۆ بگره پاشى سه‌رێ خۆ بشۆ و بيست و سێ رۆژان يان بيست و چاران و ب شه‌ڤێت وانڤه نڤێژ و رۆژيان بگره)). ترمزى ڤه‌گێرِايه.
