ب / يا باشتر ئه‌وه ئه‌م به‌رێ خۆ بده‌ينێ كا پێغه‌مبه‌رێ خودێ (سلاڤێت خودێ لێ بن) چاوا ده‌ستنڤێژا خۆ شويشتيه و كا چ گۆتيه ئه‌م لێ زێده نه‌كه‌ين، چونكي پێغه‌مبه‌ر (سلاڤێت خودێ لێ بن) د حه‌ديسه‌كێدا پشتى ده‌ستنڤێژا خۆ شويشتى، گۆت: ((هه‌ركه‌سێ هۆسا ده‌ستنڤێژا خۆ بشۆت، گونه‌هێت وى يێت بۆرين هاتنه ژێبرن، و نڤێژا وى و چۆنا وى بۆ مزگه‌فتێ بۆ زێده‌نه)). و پێغه‌مبه‌رێ خودێ (سلاڤێت خودێ لێ بن) ده‌ستپێكێ ناڤێ خودێ دئينا و دگۆت: ((بسم الله))، و پشتي ب دويماهى دئينا، دگۆت: ((أَشْهدُ أَنْ لا إِله إِلاَّ اللَّه وحْدَه لا شَريكَ لهُ، وأَشْهدُ أَنَّ مُحمَّدًا عبْدُهُ وَرسُولُه اللهم اجْعَلْنِي من التَّوَّابِينَ وَاجْعَلْنِي من الْمُتَطهِّرِينَ))، ئانكو: ئه‌ز شه‌هده دده‌م كو ب راستى چو په‌رستى يێت راست و دورست نينن خودێ نه‌بيت، و يێ بێ شريك و بێ هه‌ڤاله، و موحه‌ممه‌د به‌نده‌يێ ويه و پێغه‌مبه‌رێ ويه، يا خودێ.. من ژ زێده ته‌وبه‌داران بدانه و من ژ پاقژكريان بدانه. و ژ ڤێ پێڤه‌تر ژ پێغه‌مبه‌رێ خودێ (سلاڤێت خودێ لێ بن) نه‌هاتيه زانين، و واجبه ئه‌م پێگريێ ب سونه‌تا پێغه‌مبه‌رى (سلاڤێت خودێ لێ بن) بكه‌ين و ئه‌ڤه باشتره, دگه‌ل هندێ ژى هه‌كه ئنيه‌تا وى ئه‌و نه‌بيت ئه‌ڤه سونه‌ته، دبيت چو تێدا نه‌بيت ئه‌و وێ دوعايێ بكه‌ت، به‌لێ هه‌كه سونه‌ت بزانيت ئه‌ڤه يا خه‌له‌ته و خودێ چێتر دزانيت.
