ب / ده‌ستنڤێژ كا ب ده‌ستكرنا ناڤبه‌را ژن و زه‌لاماندا دكه‌ڤيت يان نه جهێ نه‌لێكيێيه.
د مه‌زهه‌بێ شافعيدا (خودێ ژێ رازي بيت) ب ده‌ستى يان بێ ده‌ستى بيت ماده‌م ژن و مێرێت ئێكن يان بۆ ئێكدو دورستن و د بيانينه ده‌ستنڤێژ دكه‌ڤيت.
د مه‌زهه‌بێ مالكيدا (خودێ ژێ رازي بيت) چه‌ند مه‌رجان ددانيت، هه‌كه ئه‌ڤ مه‌رجه په‌يدابوون ئه‌ڤه ده‌ستنڤێژ كه‌فت، و هه‌كه نه ناكه‌ڤيت.
ـ ئه‌ڤێ ده‌ستكرنێ دكه‌ت دڤێت يێ بالغ بيت.
ـ ئه‌ڤێ ده‌ست ڤێ كه‌فتى دڤێت ژ وان بيت ئه‌وێت شه‌هوه‌ت پێ چێدبيت، ڤێجا چ يێ بالغ بيت يان نه، چ ده‌ست ب نوينۆكێ يان پرچێ بكه‌ڤيت يان ئه‌ڤ ده‌ستكرنه ل سه‌ر تشته‌كێ رابيت و چ ب ده‌ستى بيت يان ب تشته‌كێ دى.
ـ هه‌كه مه‌خسه‌دا وى يێ ده‌ستكرنێ دكه‌ت شه‌هوه‌ت بيت، ده‌ستنڤێژا وى دكه‌ڤيت.. چ شه‌هوه‌ت بۆ چێببيت و چ نه‌چێبيت، به‌لێ هه‌كه ئنيه‌تا وى ل ده‌ستپێكا ده‌ستكرنێ شه‌هوه‌ت نه‌بيت، به‌لێ پشتى ده‌ستكرنێ شه‌هوه‌ت بۆ چێبوو، ده‌ستنڤێژا وى دكه‌ڤيت، به‌لێ هه‌كه چو ئنيه‌ت نه‌بوون و شه‌هوه‌ت بۆ چێنه‌بوو ده‌ستنڤێژا وى ناكه‌ڤيت.
د مه‌زهه‌بێ حه‌نبه‌ليدا هه‌كه ده‌ستكرن ب ئنيه‌تا شه‌هوه‌تێ بيت دكه‌ڤيت، و هه‌كه ب ئنيه‌تا شه‌هوه‌تێ نه‌بيت ناكه‌ڤيت، چونكى گه‌له‌ك جاران ده‌ستكرن د ناڤبه‌را پێغه‌مبه‌رى (سلاڤێت خودێ لێ بن) و ژنێت ويدا يا چێبووى و ده‌ستنڤێژا خۆ نه‌شويشتيه، به‌لكى د نڤێژێدا پێغه‌مبه‌رى (سلاڤێت خودێ لێ بن) ده‌ستكره هه‌ڤسه‌را خۆ، و وێ ده‌ستكرى، و هه‌كه ده‌ستنڤێژ ب ده‌ستكرنێ كه‌تبا وه‌نه‌دكر.
و مه‌زهه‌بێ حه‌نه‌فى دبێژيت: ده‌ستكرن د ناڤبه‌را زه‌لام و ژناندا چ ب شه‌هوه‌ت بيت يان بێ شه‌هوه‌ت بيت ناكه‌ڤيت، چونكى يا هاتيه زانين ژ پێغه‌مبه‌رى (سلاڤێت خودێ لێ بن) هنده هه‌ڤسه‌رێت خۆ ماچى دكرن پاشى نڤێژ دكر و ده‌ستنڤێژا خۆ نه‌دگرته‌ڤه.
و ره‌ئيا دوستتر مه‌زهه‌بێ ئيمام ئه‌حمه‌ديه، هه‌كه ده‌ستكرنێ ئنيه‌تا شه‌هوه‌تێ تێدا بيت ده‌ستنڤێژ دكه‌ڤيت، و هه‌كه يا بێ ئنيه‌ت بيت يان بێ ده‌ستى بيت ناكه‌ڤيت، و گه‌له‌ك حه‌ديس پشته‌ڤانيا ڤێ ره‌ئيێ دكه‌ن و خودێ چێتر دزانيت.
