ب/ دڤێت ئه‌م بزانين شويشتنا ده‌ستنڤێژێ په‌رستنه، و په‌رستن دڤێت ب هيڤيا هزركرنا مه‌ڤه نه‌بيت، و دڤێت وه‌سا بێته‌كرن هه‌روه‌كى بۆ مه هاتيه ڤه‌گوهاستن، هه‌كه مه ئه‌ڤه زانى دڤێت ده‌ستنڤێژێ وه‌سا بشۆين هه‌روه‌كى بۆ مه ژ پێغه‌مبه‌رێ خودێ (سلاڤێت خودێ لێ بن) هاتيه ڤه‌گوهاستن بێى زێده‌هى و بێى كێماسى، و نابيت ئه‌م بكه‌ينه جهێ ئيجتهادێ و كا مه چاوا بڤێت وه‌سا، چونكى په‌رستن د راوه‌ستاينه ل سه‌ر ڤه‌گوهاستنێ، و ده‌ستپێكا وه‌سواسێ ژ ڤێ ئاخفتنێ ده‌ست پێ دكه‌ت: ما زێده‌يى زيانه؟! به‌لێ.. زێده‌يى زيانه، و گه‌له‌ك زيانه، چونكى وه‌كى مه گۆتى په‌رستن ده‌ڤێت وه‌سا بێته‌كرن وه‌كى هاتيه ڤه‌گوهاستن و زێده‌يى ل سه‌ر نه‌گوهداريه و ده‌ركه‌فتنه ژ گوهداريێ و ژ چاوانيا جهئينانا په‌رستنێ، و ئه‌ڤه ئه‌گه‌رێ سه‌ره‌كيه يێ وه‌سواسێ، و وه‌سواس ژى ژ شه‌يتانيه، و شه‌يتانى هندى پێ چێبيت ناهێليت ده‌ستنڤێژا خۆ ب دورستى بشۆت و هندى بشێت دێ ل به‌ر خه‌له‌ت كه‌ت و ل به‌ر به‌رزه كه‌ت و وه‌سواسێ دێ بۆ چێكه‌ت، و ده‌ستپێكا ڤێ وه‌سواسێ دێ بێژيتێ ته دورست ده‌ستنڤێژا خۆ گرت ما چيه هه‌كه شوينا سێ جاران بكه‌يه چار يان پێنج و هۆسا دێ به‌ر ب وه‌سواسێڤه به‌ت، هه‌كه وى گوهێ خۆ دايێ و گۆت: زێده‌يى نه‌زيانه، به‌لێ.. زێده‌يى زێده زيانه، به‌رێ خۆ بدێ كا پێغه‌مبه‌رێ خودێ (سلاڤێت خودێ لێ بن) چه‌ند ئاڤ ب كار دئينا نه‌بۆ ده‌ستنڤێژ شويشتنێ به‌لكى بۆ راكرنا جه‌نابه‌تێ.
ئه‌نه‌س (خودێ ژێ رازي بيت) دبێژيت: پيغه‌مبه‌رێ خودێ (سلاڤێت خودێ لێ بن) ئامانه‌ك هه‌بو دگۆتنێ (صاع) ئانكو: ترار، و ب ئێك ترارێ ئاڤێ غوسل ل سه‌ر خۆ رادكر، و ب پێنج مستێت ئاڤێ ده‌ستنڤێژا خۆ دشويشت، هه‌روه‌كى ئه‌ڤه د بوخارى و موسلميدا هاتى.
عه‌بدوللايێ كورێ يه‌زيدى (خودێ ژێ رازي بيت) دبێژيت: ئێك هاته ده‌ف ئبن عه‌باسى (خودێ ژێ رازي بيت) گۆتێ: يا كورمامێ پێغه‌مبه‌رى.. كا بۆ من بێژه ئه‌ز چه‌ند ئاڤێ بۆ ده‌ستنڤێژێ ب كار بينم به‌سى منه؟ گۆتێ: تو دشێى چه‌ند مسته‌كا ب كار بينى، گۆت: به‌لێ ئه‌ڤه تێرا من ناكه‌ت، گۆتێ: (لا أم لك)، ئانكو: مالا ته ڤێ ئاڤێ تێرا يێ ژ ته چێتر ـ پێغه‌مبه‌رێ خودێ (سلاڤێت خودێ لێ بن) ـ دكر، بوچى تێرا ته ناكه‌ت.
عه‌بدوللايێ كورێ عومه‌رى (خودێ ژێ رازي بيت) ڤه‌دگوهێزيت: پێغه‌مبه‌رێ خودێ (سلاڤێت خودێ لێ بن) د به‌ر عه‌باسيرِا بۆرى و وى ده‌ستنڤێژا خۆ دشويشت، ئينا گۆته پێغه‌مبه‌رێ خودێ (سلاڤێت خودێ لێ بن): يا پێغه‌مبه‌رێ خودێ.. ما ده‌رِێژى و ئيسراف د ئاڤێدا هه‌يه؟ گۆت: ((به‌لێ، خۆ هه‌كه تو ل سه‌ر رويباره‌كێ ب رێژ ژى بى)). و ده‌رِێژى و ئيسراف ژى ئه‌ڤه‌يه تو زێده ئاڤێ ب كار بينى و زێده‌تر ژ سێ جاران بشۆى.
به‌رێ خۆ بدێ كا پێغه‌مبه‌رێ خودێ (سلاڤێت خودێ لێ بن) د راستا ويدا چ دبێژيت يێ زێده‌تر ژ سێ جاران ده‌ستنڤێژا خۆ بشۆت. عه‌مرێ كورێ شوعه‌يبى ژ بابێ خۆ و ژ باپيرێ خۆ (خودێ ژێ رازي بيت) ڤه‌دگوهێزيت، دبێژيت: كۆچه‌ره عه‌ره‌به‌ك هاته ده‌ف پێغه‌مبه‌رێ خودێ (سلاڤێت خودێ لێ بن)، گۆتێ: ده‌ستنڤێژێ نيشا من بده، ئينا پێغه‌مبه‌رێ خودێ (سلاڤێت خودێ لێ بن) سێ جاران شويشت و گۆتێ: ((ئه‌ڤه‌يه ده‌ستنڤێژ، و هه‌ركه‌سێ لێ زێده‌كه‌ت وى ته‌عدايى و سته‌م كر)). هه‌روه‌كى ئه‌ڤ حه‌ديسه ئيمام ئه‌حمه‌د و نه‌سائى بۆ مه ڤه‌گێرِاى.
ديسا حاكم و ئه‌بو داوود ژ عه‌بدوللايێ كورێ موغه‌فه‌لى (خودێ ژێ رازي بيت) ڤه‌دگوهێزن، دبێژيت: من گوه ل پێغه‌مبه‌رێ خودێ بوو (سلاڤێت خودێ لێ بن) گۆت: ((د ڤێ ئوممه‌تێدا يێت هين زێده‌گاڤيێ د ده‌ستنڤێژێدا دكه‌ن)). و زێده‌گاڤى ئه‌ڤه‌يه زێده ئاڤ بێته ب كارئينان و ئيسراف و ده‌رِێژى د ئاڤێدا بێته‌كرن. له‌وا بوخارى دبێژيت: خودان زانين هه‌مى دگه‌ل هندێنه مرۆڤ د ده‌ستنڤێژ شويشتنێدا ژ پێغه‌مبه‌رێ خودێ (سلاڤێت خودێ لێ بن) زێده نه‌كه‌ت، و دويماهيا چاره‌يا وه‌سواسێ يا د ده‌ستێت ته‌دا، ئێك: دڤێت بزاني ده‌ستنڤێژ په‌رستنه و يا راوه‌ستايه ل سه‌ر ڤه‌گوهاستنێ، دڤێت وه‌سا بێته وه‌رگرتن هه‌روه‌كى بۆ مه هاتيه ڤه‌گوهاستن بيێ كێم و زێده‌يى، و زێده‌يى زيانه. و باشه هه‌كه ده‌ستئاڤێ تو نه‌شێيه خۆ، دڤێت هه‌ر ئاڤێ زێده ب كار بينى بۆ ده‌مه‌كێ ئاڤێ ب كار نه‌ئينه و به‌ركان بۆ خۆپاقژكرنێ ب كار بينه.. هه‌تا بشێيه شه‌يتانێ خۆ پاشى بزڤره ئاڤێ پشتى تو ژ وه‌سواسا شه‌يتانى قورتال بووي، يان ژى هه‌ر ئاڤێ ب كار بينه و ژ كێمه‌كێ نه‌بۆره، و هه‌ر گاڤا شه‌يتانى وه‌سواس بۆ ته چێكر دلێ خۆ موكوم بكه و خۆ پشت راست بكه و ژ خودێ بخوازه ته ژ شه‌يتانى بپارێزيت و رابه و بێژه: يا خودێ من ژ شه‌يتانى و وه‌سواسا وى بپارێزه، و رابه‌ڤه بلا هه‌ر شه‌يتان ڤێ ئاوازێ بۆ ته بێژيت گوهێ خۆ نه‌دێ، و بۆ ده‌ستنڤێژێ بۆ ده‌مه‌كێ باش هه‌تا ژ وه‌سواسێ قورتال ببى ژ جاره‌كێ زێده نه‌كه، جاره‌كێ ب تنێ بشۆ، نه‌كه سێ جار هه‌تا بشێى خۆ ژ ئيسراف و وه‌سواسێ قورتالكه‌ى و خودێ چێتر دزانيت.
