ب / خوف ڤێگاڤێ ژى، يێت هه‌ين و گه‌له‌ك ب كار دئينن نه‌خاسمه ئه‌و جهێت سار وه‌كى توركيا و جهێت وه‌كى توركيا، و خوف ره‌نگه‌كێ گۆرايه ژ پيستى و ژ كه‌ڤلى دهێته چێكرن و يا ب هێزه، مرۆڤ دشێت ل سه‌ر ب رێڤه بچيت.
زانايێ ناڤدار ئبن المنزر (خودێ ژێ رازي بيت) ژ ئبن مباره‌كى (خودێ ژێ رازي بيت) ڤه‌دگوهێزيت، دبێژيت: نه‌لێكى د دورستيا مه‌سحا سه‌ر خوفاندا نينه، و دورستيا وى ب فه‌رموودێت دورست و سه‌حيح يا بنه‌جه بووى، و پێغه‌مبه‌رێ خودێ (سلاڤێت خودێ لێ بن) مه‌سحا كري، و حه‌سه‌ن به‌سرى (خودێ ژێ رازي بيت) دبێژيت: حه‌فتێ هه‌ڤالێت پێغه‌مبه‌رێ خودێ (سلاڤێت خودێ لێ بن) يا بۆ من گۆتى پێغه‌مبه‌رێ خودێ (سلاڤێت خودێ لێ بن) مه‌سحا ل سه‌ر خوفێ كرى. و مه‌سحا ل سه‌ر خوفێ گه‌له‌ك زانا ژ بابه‌تێت عه‌قيدێ دانايه، هه‌رچه‌نده ئه‌و ب خۆ بابه‌ته‌كێ فقهيه، ژبه‌ر كو دا (أهل السنه والجماعه) ژ غه‌يرى خۆ بێنه جوداكرن، چونكى ئه‌و مه‌سحا ل سه‌ر خوفێ دورست نابينن، ڤێجا دا موسلمانێت سونه و جه‌ماعه‌ت ژ وان بێنه جوداكرن. د كتێبێت عه‌قيدێدا هاتيه ئه‌م مه‌سحا ل سه‌ر خوفا دورست دبينين، باشه ڤێگاڤێ خوفك دكێمن و باراپتر ژ خه‌لكى گۆران دكه‌نێ، ئه‌رێ مه‌سحا ل سه‌ر گۆران دورسته يان نه؟ هنده زانا دورست ناكه‌ن، به‌لێ بۆچۆنا ب به‌لگه و ده‌ليل پشته‌ڤانى و پالپشتيێ بۆ دكه‌ن دورسته مه‌سح ل سه‌ر گۆرێ بێته‌كرن ب مه‌رجێت خۆڤه هه‌كه ب سه‌ر ده‌ستنڤێژێرا هاتبيته‌كرن، و ژ نه‌هـ سه‌حابان هاتيه ڤه‌گوهاستن دورستيا مه‌سحا ل سه‌ر گۆرێ، و پاشى زانايان هنده مه‌رجێت ب زه‌حمه‌ت بۆ ڤێ مه‌سحێ داناينه، ژ وان: دڤێت يا ستوير بيت و مرۆڤ بشێت ل سه‌ر برێڤه بچيت و چو تشت ژ پێ مرۆڤى ده‌رنه‌كه‌ڤيت ئانكو يا درِياي نه‌بيت. به‌لێ زانايێ ناڤدار ئبن قه‌يم (خودێ ژێ رازي بيت) دبێژيت: ئه‌ڤ مه‌رجه نه د دورستن نه‌خاسمه مه‌رجێ دويێ كو دڤێت د درِياى نه‌بن، چونكى يا ئاشكرايه عه‌ره‌بان شمك دكرنه پێت خۆ نه پێلاڤ و نه‌يا به‌رعه‌قله گۆره د شمكاندا نه د درِياي بن، ديسا نه‌يا به‌رعه‌قله جلكێت وان هه‌مى د كون كون بن و د به‌ر درِياى بن و به‌س گۆرێت وان چو كون لێ نه‌بن.
ل ڤێرێ ئه‌ز دبينم دورسته مه‌سح ل سه‌ر گۆرێ بێته‌كرن، هه‌كه ل سه‌ر ده‌ستنڤێژێرا هاته‌كرنێ و يا ته‌نك نه‌بيت له‌شێ مرۆڤى تێرِا بێته ديتن وه‌كى گۆرێت هاڤينێ ئه‌ڤێت ته‌نك يان گۆرێت ژنان ئه‌ڤێت دێ تو بێژى چو ل پێت وان نينه و هه‌مى ده‌مان دورسته مه‌سحا ل سه‌ر گۆرێ بێته‌كرن و ب چو وه‌رز و ده‌مانڤه گرێداى نينه، و مه‌رج نينه زڤستان و سار بيت هه‌تا مه‌سح بێته‌كرن، و دڤێت شه‌يێ پێى بێته مه‌سحكرن نه بنێ پێى، له‌وا ئيمام عه‌لى (خودێ ژێ رازي بيت) دبێژيت: هه‌كه دين ب ره‌ئيێ با دا بنێ پێى هێژاتر بيت بێته مه‌سحكرن ژ شه‌يێ پێى. ژ ڤێرێ دهێته زانين دڤێت ئه‌م ژ دف خۆ فه‌توا نه‌ده‌ين بێژين: ڤى ده‌مى چێدبيت و ڤى ده‌مى ناچێبيت، ئه‌ڤه تشته‌كێ نه‌يێ جوانه و يێ خه‌له‌ته و كا چه‌ند رۆژان دورسته مه‌سح بێتكرن، هه‌كه مرۆڤ ل مال بيت بۆ هه‌يه شه‌ڤه‌ك و رۆژه‌كان مه‌سحێ د سه‌ر گۆرێرِا بكه‌ت، هه‌كه ل سه‌ر ده‌ستنڤێژێرِا هاتبيته كرنێ، ئانكو: پێنج نڤێژان، و هه‌كه د سه‌فه‌رێدا بيت سێ شه‌ڤ و رۆژان دورسته مه‌سح د سه‌ر گۆرێرا بيته كرن. هه‌لبه‌ت ديسا هه‌كه د سه‌ر ده‌ستنڤێژێرا هاتبيته كرنێ ئانكو پازده نڤێژان، و هه‌ر گاڤا گۆرا خۆ يان خوفكا خۆ ئێخست ده‌ستنڤێژا وى كه‌فت دڤێت ده‌ستنڤێژا خۆ نويكه‌ته‌ڤه، و هه‌ر گاڤا ب جه‌نابه‌ت كه‌فت ديسا دڤێت خوفكا خۆ و گۆرا خۆ بێخيت، چونكى مه‌سح بۆ ده‌ستنڤێژ شويشتنێ دهێته‌كرن نه بۆ جه‌نابه‌تێ. ژن وه‌كى زه‌لاميه بێ جوداهى د فه‌رمان و ئه‌حكامێت مه‌سحێدا و خودێ چێتر دزانيت.
