ب / هه‌كه به‌رێ دارێ و شينكاتى نه‌گه‌هشت بيت يان هێژ كوليلك بيت نه‌دورسته بێته فرۆتن؛ چونكى دبيت ئاتافه‌كا عه‌سمانى ب سه‌ر داروباريدا بێته خوارێ، و به‌ر نه‌گريت، هنگى به‌رامبه‌ر چ دێ ئه‌و پارێ وه‌رگرتى بۆ خۆ حه‌لالكه‌ت، هه‌روه‌كى بوخارى (خودێ ژێ رازى بيت) ژ ئه‌نه‌سى (خودێ ژێ رازى بيت) ڤه‌دگوهێزيت دبێژيت: پێغه‌مبه‌رێ خودێ (سلاڤێت خودێ لێ بن) دبێژيت: ((ئه‌رێ هه‌كه ئاتافه‌ك ژ عه‌سمانى ب سه‌ردا هاته خوارێ دێ ئێك ژ هه‌وه حه‌قێ برايێ خۆ ب چ حه‌لالكه‌ت)) ڤێجا چ داروبار بيت يان ده‌رامه‌ت بيت هه‌كه نه‌گه‌هشتبيت و كوليلك بيت نابيت بێته فرۆتن به‌لێ هه‌كه فێقي باله‌ته ببيت، و گه‌هشت بيت و دندكا ده‌رامه‌تى زه‌ر ببيت، و به‌رف گه‌هشتنێڤه چۆبيت، دورسته بێته فرۆتن، ئيمامآ بوخارى و موسلم هه‌ردوو ژ ئبن عومه‌رى (خودێ ژێ رازى بيت) ڤه‌دگوهێزن گۆت: پێغه‌مبه‌رى (سلاڤێت خودێ لێ بن) نه‌هياكرى فێقي ب كوليلكێڤه بێته فرۆتن حه‌تا باله‌ته نه‌بيت، ديسا هه‌ردوو ڤه‌دگێرن دبێژن: پێغه‌مبه‌رى (سلاڤێت خودێ لێ بن) نه‌هياكري قه‌سپ ب دارێڤه بێته فرۆتن هه‌تا زه‌ر نه‌بيت، ئانكو به‌رف چێبوونێڤه نه‌چيت، و خودێ چێتر دزانيت.
