ب / پێغه‌مبه‌رێ خۆشتڤێ (سلاڤێت خودێ لێ بن) دبێژيت: ((خودێ يێ ل ئوممه‌تا من بۆرى ژ بێ ده‌ستيێ و ژبيركرنێ و ژ تشتێ خورتى ل سه‌ر لێهاتيه‌كرن))، به‌لێ دڤێت بازرگاني ئاگه‌هـ ژ خۆ هه‌بيت و به‌رده‌وام دوعا بۆ خۆ بكه‌ت خودێ وان گونه‌هان بۆ ژێببه‌ت يێت وى كرين و ئاگه‌هـ ژ خۆ نه و پێ نه‌حه‌سياى. پێغه‌مبه‌ر (سلاڤێت خودێ لێ بن) پێغه‌مبه‌رێ خودێ بوو دگه‌ل هندێ ژى به‌رده‌وام ئه‌ڤ دوعايه د نڤێژا خۆدا دكر، چونكى دبيت مرۆڤى گونه‌هـ كربيت و پێ نه‌زانيبيت، و ژ عه‌لى (خودێ ژێ رازى بيت)، گۆت: پێغه‌مبه‌رێ خودێ (سلاڤێت خودێ لێ بن) ده‌مێ رادبوو نڤێژێ دويماهيك ئاخفتنا وى د ناڤبه‌را ته‌حيات و سلاڤا ملاندا دگۆت: ((يا خودێ.. بۆ من ژێ ببه يا من ل پێشيا خۆ كرى، و يا من ب پاش خۆڤه هێلايى، و يا من ب به‌رزه‌ييڤه كرى و يا من ب ئاشكه‌رايى كرى، و يا من ژ تخويبان بۆراندى و يا تو پێ ژ من ب ئاگه‌هتر، تو به‌نده‌ى ب گوهداريێ پێش دئێخى و به‌نده‌ى ب گونه‌هێ پاش دئێخى، ب راستى چو خودێ و په‌رستى يێت راست و دورست نينن تو نه‌بى)). ديسا بازرگان و فرۆشكارێ تێگه‌هشتى و ب ژير ئه‌وه يێ هزرا ڤان خه‌له‌تيان بكه‌ت و خێر و خێراتان بكه‌ت؛ دا وان گونه‌هێت وى ئاگه‌هـ ژ خۆ نه و كرين، بێنه ژێبرن، و پێغه‌مبه‌رێ خودێ (سلاڤێت خودێ لێ بن) بازرگان و فرۆشكار يێ ژ ڤێ راستيێ هشياركرين دبێژيت: (يا معشر التجار إن هذا البيع يحضره الكذب واليمين فشوبوه بالصدقه) گه‌لى بازرگانان ئه‌ڤێ كرين و فرۆتنێ دره‌و و سويند دكه‌ڤنه تێدا ڤێجا دگه‌ل سه‌ده‌قێ تێكه‌لكه‌ن، و خودێ چێتر دزانيت.
