ب / پێدڤيه مرۆڤێ موسلمان به‌رێ وى به‌س ل قازانج و فايده‌ى تنێ نه‌بيت، چونكى ئه‌و قازانجه هه‌كه ب رێكه‌كا حه‌رام هات، يێ حه‌رامه، و دڤێت ئه‌م بزانين رێكا بازرگانيێ هه‌كه نه‌يا دورست بيت، هنگى ئه‌و بازرگاني نه‌يا دورسته، و د ئه‌نجامدا ئه‌و قازانج و به‌رهه‌مآ پێڤه دهێت ژى، يآ حه‌رامه و نه‌دورسته، و ده‌رهه‌مه‌كێ حه‌لال بۆ دنيا و ئاخره‌تا بازرگاني ژ سه‌د ده‌رهه‌مێت حه‌رام چێتر و باشتره، چونكى پاريه‌كێ حه‌رام ب تنێ حنێرا وى گه‌له‌گه، پا تو چ دبێژى يێ خوارنا وى و مالێ وى هه‌مى حه‌رام، خوارنا حه‌رام عيباده‌تێ مرۆڤى پويچ دكه‌ت و دوعايێت مرۆڤى ژى.
پشتى سه‌عدێ كورێ ئه‌بى وه‌قاسى (خودێ ژێ رازى بيت)، گۆتيه پێغه‌مبه‌رى (سلاڤێت خودێ لێ بن) بۆ من دوعا بكه ئه‌ز ژ وان بم يێت خودێ دوعايێت وان قه‌بويل دكه‌ت، ئينا پێغه‌مبه‌رى (سلاڤێت خودێ لێ بن) گۆت: ((سه‌عد.. خوارنا خۆ حه‌لالكه دێ ژ وان بى يێت دوعايێت وان قه‌بويل دبن، ئه‌ز ب وى كه‌مه يێ جانێ موحه‌ممه‌دى د ده‌ستێ ويدا زه‌لامێ هه‌ى پاريه‌كى ب تنێ ژ حه‌رامى دهاڤێژيته د زكێ خۆدا چل رۆژان ژێ ناهێته قه‌بويلكرن، و هه‌ر به‌نده‌يه‌كێ گۆشتێ وى ب حه‌رامى و ب سه‌له‌فێ (ريبايێ) راببيت ئاگر هه‌ژى ويه)). ئيمام ئبن مرده‌وه‌يهى ڤه‌گێرايه. باش به‌رێ خۆ بدێ هه‌ى خودان باوه‌ر، كا حنێرا پاريه‌كي ب تنێ ژ حه‌رامى چه‌نده؟! ناهێليت عيباده‌ت و دوعايێت مرۆڤى د چل رۆژاندا بلند ببن و بێنه قه‌بويلكرن، پا تو چ دبێژى بۆ وى يێ د ناف حه‌راميدا خه‌ندقى؟! ڤێجا يا باشه هوين وى شيره‌ت بكه‌ن و نه‌بێژن مه شۆله ژآ نينه، چونكى پێغه‌مبه‌ر (سلاڤێت خودێ لێ بن) هه‌روه‌كى د سه‌حيحا موسلميدا هاتي، دبێژيت: ((هه‌ركه‌سێ ژ هه‌وه گونه‌ه و خرابيه‌ك ديت بلا ب ده‌ستێ خۆ بگوهۆريت، هه‌كه نه‌شيا بلا ب ئه‌زمانێ خۆ بيت، هه‌كه نه‌شيا بلا ب دلێ خۆ بيت و ئه‌ڤه لاوازترين باوه‌ريه)). ديسا هه‌روه‌كى د سه‌حيحا موسلميدا هاتى، دبێژيت: ((دين شيره‌ته)). ڤێجا دڤێت هوين شيره‌تا ل وى بكه‌ن و بێژنێ هه‌كه دێ غشێ كه‌ى ئه‌م گازا خۆ نافرۆشينه ته دا هاريكار نه‌بين د گونه‌هێدا، هه‌كه گوهێ خۆ دا هه‌وه باشه هه‌كه نه يا باش ئه‌وه هوين ب فرۆشنه ئێكێ دى، نه‌ده‌نه وى يێ موسلمانان دخاپينيت و تشتێ زه‌غه‌ل دده‌ته وان، و خودێ چێتر دزانيت.
