پ / پێغه‌مبه‌رێ خۆشتڤى (سلاڤێت خودێ لێ بن) دبێژيت: (إنَّما الأَعمالُ بالنِّيات، وإِنَّمَا لِكُلِّ امرئٍ مَا نَوَى) ب راستى هه‌مى كار و كريار ب ئنيه‌تانه، و ب راستى بۆ هه‌ر مرۆڤه‌كى كا چ ئنيه‌ت ئينايه دێ ئه‌و بيت. ڤێجا هه‌كه ئنيه‌تا وى ب ئه‌رزانكرنێ زيان گه‌هاندن بيت هنگى يێ گونه‌هكاره، چونكى پێغه‌مبه‌رێ خۆشتڤى (سلاڤێت خودێ لێ بن) هه‌روه‌كى بوخارى و موسلم ژ ئه‌نه‌سآ كورێ مالكى (خودێ ژێ رازى بيت) ڤه‌دگێرن، دبێژيت: (لاَ يُؤمِنُ أَحَدُكُمْ حَتَّى يُحِبَّ لأَخِيهِ مَا يُحِبُّ لِنَفْسِهِ) كه‌س ژ هه‌وه ب دورستى باوه‌ريێ نائينيت هه‌تا وى خێر بۆ برايێ خۆ نه‌ڤێت كا چاوا بۆ خۆ دڤێت. باشه ما وى دڤێت خوساره‌ت ببيت و زيان بگه‌هيتآ؟! هۆسا دڤێت دگه‌ل هه‌ڤالێت خۆ ژى د بازاريدا يآ وه‌سا بيت، به‌لێ هه‌كه ئنيه‌تا وى ئه‌و نه‌بيت و خه‌لك خوساره‌ت نابيت، و وى دڤێت ل سه‌ر خه‌لكى سڤك و ساناهي بكه‌ت و چاكسازيێ بكه‌ت، و سه‌ر خه‌لكى ئه‌رزانكه‌ت هنگى خودان خێره، چونكى پێغه‌مبه‌رێ خۆشتڤى (سلاڤێت خودێ لێ بن) هه‌روه‌كى بوخارى ژ جابرێ كورێ عه‌بدوللاى (خودێ ژێ رازى بيت) ڤه‌گێرايى، دبێژيت: (رَحِم اللَّه رجُلا سَمْحاً إذا بَاع، وَإذا اشْتَرى، وَإذا اقْتَضى) خودێ دلۆڤانيێ ب وى زه‌لامى ببه‌ت يێ ب ساناهى بيت: ده‌مێ دكرِيت و ده‌مێ دفرۆشيت و ده‌مێ ده‌ينى دخوازيت، و خودێ چێتر دزانيت.
