ب / فرۆتنا نه‌چارى ئه‌وه تشتێ خۆ كێمتر ژ بهايێ وێ بفرۆشى ژ نه‌چارى چونكى به‌رهنگارى ده‌ينه‌كێ بووى يان هه‌وجه‌ييه‌كا مه‌زن يا بۆ چێ بووى، و نه‌چاره تشتێ خۆ ژ بهايێ رۆژێ كێمتر بفرۆشيت؛ دا ژ ته‌نگاڤيا خۆ ده‌ركه‌ڤيت، ئه‌بو داوود ژ عه‌ليێ كورێ ئه‌بو تالب (خودێ ژێ رازى بيت) ڤه‌دگێريت، دبێژيت: پێغه‌مبه‌رى (سلاڤێت خودێ لێ بن) نه‌هيا ژ فرۆتنا نه‌چارى كرى، و زانايێت مه دبێژن: د ڤى كراسيدا جوامێرى دخوازيت هه‌وجه‌ييا وى بێته قه‌تاندن و ده‌ين بۆ بێته دان، و نه‌هێلن ئه‌و نه‌چاربيت تشتێ خۆ بفرۆشيت، و خۆ زيانكار بكه‌ت، چونكى پێغه‌مبه‌ر (سلاڤێت خودێ لێ بن) د ڤه‌گێرا بوخارى و موسلميدا ژ ئه‌نه‌سى (خودێ ژێ رازى بيت) دبێژيت: (لاَ يُؤمِنُ أَحَدُكُمْ حَتَّى يُحِبَّ لأَخِيهِ مَا يُحِبُّ لِنَفْسِهِ) كه‌س ژ هه‌وه ب دورستى باوه‌ريێ نائينيت هه‌تا وى خێر بۆ برايێ خۆ نه‌ڤێت كا چاوا بۆ خۆ دڤێت.
و يا خواستى ئه‌وه ئه‌م وى ژ ڤێ ته‌نگاڤيێ ده‌ربێخين دا خودێ مه ژ ته‌نگاڤيێت ئاخره‌تێ رزگاركه‌ت. پێغه‌مبه‌رێ خۆشتڤى (سلاڤێت خودێ لێ بن) د ڤه‌گێرا بوخارى و موسلميدا دبێژيت: (المُسْلِمُ أَخو المُسْلِمِ، لا يظلِمُه، ولا يُسْلِمهُ، منْ كَانَ فِي حَاجَه أَخِيهِ كَانَ اللَّهُ فِي حاجتِهِ، ومَنْ فَرَّج عنْ مُسْلِمٍ كُرْبه فَرَّجَ اللَّهُ عنْهُ بِهَا كُرْبَه مِنْ كُرَبِ يوْمَ الْقِيامَة،) موسلمان برايێ موسلمانيه، نه سته‌مێ لێ دكه‌ت، و نه ده‌ستان ژێ به‌ردده‌ت، هه‌ركه‌سێ د هه‌وجه‌يا برايێ خۆدا بيت، (ئانكو هه‌وجه‌يێت وى بقه‌تينيت) خودێ دێ هاريكاريا وى كه‌ت د هه‌وجه‌يێت ويدا، و هه‌ركه‌سێ به‌رته‌نگيه‌كێ ژ سه‌ر موسلمانه‌كى راكه‌ت، و (د ڤه‌گێرا موسلميدا هه‌ركه‌سێ به‌رته‌نگيه‌كێ ژ به‌رته‌نگيێت دنيايێ ژ سه‌ر موسلمانه‌كى راكه‌ت) خودێ دێ به‌رته‌نگيه‌كێ ژ به‌رته‌نگيێت قيامه‌تێ ژ سه‌ر راكه‌ت.
و زانا دبێژن: هه‌كه هاته كرِين دورسته به‌لێ يا مه‌كروهه، چونكى هاريكاريا نه‌چارى نه‌هاته‌كرن و هه‌كه ژ نه‌چاريآ نه‌با هۆسا خۆ زيانكار نه‌دكر، و خودێ چێتر دزانيت.
