ب / زانا دبێژن هه‌كه زانى يێ ده‌سته‌سه‌ركريه و دزيه يان دويف هزرا ب هێزتر ئه‌و تشت يێ دزيه يان يێ ده‌سته‌سه‌ركريه نابيت بێته كرِين، و كرينا ڤى تشتى حه‌رامه، چونكى پێغه‌مبه‌ر (سلاڤێت خودێ لێ بن) هه‌روه‌كى د ڤه‌گێرا حاكم و به‌يهه‌قيدا هاتى، دبێژيت: (من اشترى سرقه وهو يعلم أنها سرقه فقد اشرك في عارها واثمها) هه‌رچه‌نده ئه‌ڤ حه‌ديسه نه‌گه‌له‌كا ب هێزه به‌لێ به‌لگه‌يێت گشتى و شه‌نگستێت فقهى د ئاشكرانه ئه‌ڤ كرينه نه‌يا دورسته و حه‌رامه، چونكى ده‌مێ تو دكرِى ته هاريكارى دگه‌ل كر ل سه‌ر گونه‌هێ و خرابيێ و خودێ مه‌زن دبێژيت: (وَلا تَعَاوَنُوا عَلَى الأثمِ وَالْعُدْوَانِ) و ل سه‌ر گونه‌ه و ده‌ست درێژيێ هاريكارێت ئێك نه‌بن، و فه‌ره ده‌مێ ئه‌و كاره‌كێ هۆسا ببينيت بزانيت ئه‌و يێ ل به‌رامبه‌ر گونه‌هه‌كێ و خرابيه‌كێ، و فه‌ره ئه‌و وێ خرابيێ بگوهۆريت و دزيكه‌رى و ده‌سته‌سه‌ركه‌رى شيره‌تكه‌ت، و بێژيته وان: ئه‌ڤه گونه‌هه و نه‌دورسته، و دڤێت تو ڤى تشتى بۆ خودانى بزڤرينى، چونكى پێغه‌مبه‌ر (سلاڤێت خودێ لێ بن) د ڤه‌گێرا موسلميدا ژ ئه‌بى سه‌عيدآ خوده‌رى (خودێ ژێ رازى بيت) دبێژيت: (مَنْ رَأَى مِنْكُم مُنْكراً فَلْيغيِّرْهُ بِيدهِ، فَإِنْ لَمْ يسْتَطعْ فبِلِسَانِهِ، فَإِنْ لَمْ يسْتَطعْ فَبقَلبهِ وَذلَكَ أَضعَفُ الإِيمانِ) هه‌ركه‌سێ ژ هه‌وه گونه‌هـ و خرابيه‌ك ديت بلا ب ده‌ستێ خۆ بگوهۆريت، هه‌كه نه‌شيا بلا ب ئه‌زمانێ خۆ بيت، هه‌كه نه‌شيا بلا ب دلێ خۆ بيت و ئه‌ڤه لاوازترين باوه‌ريه. و هه‌كه كرى ژى، دڤێت بۆ خودانى بزڤرينيت، و هه‌كه نه‌شيا دڤێت بۆ بكه‌ته خێر، و مخابن شه‌يتان گه‌له‌كان دئێخيته تۆرا خۆ، دبێژيتێ هه‌كه تو نه‌كرى ئێكێ دى دێ كريت، ڤێجا هه‌ما بكره بلا ئه‌و قازانج بۆ ئێكێ باش بيت باشتره، ژ بۆ ئێكێ خراب بيت، و وه‌كى ڤان ئاخفتنان خه‌لكى سه‌ردادبه‌ت و كرينا تشتێ دزى ل به‌ر وان ساناهى دكه‌ت، و خودێ چێتر دزانيت.
