ب / ب گشتى دڤێت هه‌ردوو لايێت كرين و فرۆتنێ د رازى بن ده‌مێ ب كارێ خۆ رادبن و هه‌وجه‌ى مه‌رجا ناكه‌ت، ژبه‌ر هندێ زانايان بۆچۆنێت جودا جودا د مه‌رجاندا يێت هه‌ين هنده‌ك ب گشتى دورست دكه‌ن، و هنده‌ك ب گشتى نه‌دورست دكه‌ن، و هنده‌ك شرۆڤه دكه‌ن، و يا ئه‌ز ژ گيانێ شه‌ريعه‌تى تێدگه‌هم، مه‌رج دوو مه‌رجن، چ د كرين و فرۆتنێدا بيت، چ د هه‌ر كار و گرێبه‌ست و پێكهاتنه‌كا هه‌بيتدا، مه‌رجێ گونجاي دگه‌ل شه‌ريعه‌تى و مه‌رجێ نه‌دگه‌ل شه‌ريعه‌تى و دژى شه‌ريعه‌تى، ره‌نگێ ئێكێ ماده‌م دژاتيا شه‌ريعه‌تى تێدا نينه دورسته ئه‌ڤ مه‌رجه بێته‌كرن د كرين و فرۆتنێدا، و د هه‌رتشته‌كێ ديدا ژى ژبلى كرِين و فرۆتنێ، پێغه‌مبه‌ر (سلاڤێت خودێ لێ بن) د ڤه‌گێرا حاكم و ته‌به‌رانى و به‌زاريدا دبێژيت: (المسلمون عند شروطهم الا شرطا أحل حراما أو حرم حلالا) و د ڤه‌گێرا حاكم و به‌يهه‌قى و داره‌قوتنيدا دبێژيت: (المسلمون عند شرطهم ما وافق الحق) و هه‌كه مه‌رج نه‌يێ دورست بيت و نه‌دگه‌ل شه‌ريعه‌تى بيت سه‌د مه‌رج بن هه‌مى د پويچ و بێ بهانه، چونكى پێغه‌مبه‌ر (سلاڤێت خودێ لێ بن) د ڤێ رامانێدا هه‌روه‌كى ل ده‌ف بوخارى و موسلمى هاتى، دبێژيت: (فما بَالُ أَقْوَامٍ يشْتَرِطونَ شُرُوطا لَيْسَتْ في كِتَابِ اللَّهِ ما كان من شَرْط ليس في كِتَابِ اللَّهِ عز وجل فَهُوَ بَاطلٌ وَإِنْ كان مِائَه شَرْط) خێره هنده‌ك هنده مه‌رجان دگرن نه د كتێبا خودێدا.. هه‌ر مه‌رجه‌كێ هه‌بيت د كتێبا خودێدا نه‌بيت يێ پويچه خۆ هه‌كه سه‌د مه‌رج بن. و ل سه‌ر ڤى بنياتى دڤێت ئه‌م به‌رێ خۆ بده‌ينه مه‌رجان د كرين و فرۆتنێدا، و بزانين ژيانا ئه‌ڤرۆ و ئالۆزيێت تێدا سستيا د وژداناندا؛ ژبه‌ر سستيا پارێزكاريێ، دخوازيت ئه‌م ب به‌رێخۆدانه‌كا نوى يا هه‌ڤچه‌رخ به‌رێ خۆ بده‌ينه مه‌رجان، نه ئێكسه‌ر دورست بدانين، و نه ئێكسه‌ر نه‌دورست بدانين، به‌لكى دڤێت ئه‌م نيشا شه‌نگستێ گشتى بده‌ين يێ ل گه‌ل شه‌رعى گونجايى دورسته، و يێ نه‌گونجايى نه دورسته، و خودێ چێتر دزانيت.
