ب / مه‌رجكرنا نه‌به‌رپرساتيێ ژ كێماسيا د كريارێدا جهێ نه‌لێكيێيه د ناڤبه‌را زاناياندا، ل ده‌ف حه‌نه‌فيان دورسته، بۆ فرۆشكاري هه‌يه بێژيته بكرِى ئه‌ز ڤى تشتى دده‌مه ته و ب مه‌رجێ نه‌به‌رپرساتيێ ژ كێماسيان، و به‌لگه‌يێ وان حه‌ديسا پێغه‌مبه‌ريه (سلاڤێت خودێ لێ بن) (المسلمون عند شروطهم) موسلمان يێ ل دويف مه‌رجێت خۆ. و به‌لگه‌يێ وان يێ دى يێ عه‌قليه ئه‌و ژى ده‌مێ پێك دهێن و رازى دبن ل سه‌ر ڤى مه‌رجى، و پشتى هنگى كێماسيه‌ك لێ دياربوو، نابيته ئه‌گه‌رێ ڤێكراچۆنێ و ماده‌م ڤێكراچۆن نه‌دورست بيت، كريار ب ڤى مه‌رجى دورسته، و ل ده‌ف مالكيان دوو گۆتن يێت هه‌ين، يا ئێكێ: ئه‌ڤ مه‌رجه نه‌يێ دورسته، و هه‌رگاڤا كێماسيه‌ك ئاشكرا بوو.. بۆ بكرِى هه‌يه بزڤرينيت، و گۆتنا دووێ: مه‌رج يێ دورسته ل دويف وان كێماسيان يێت فرۆشكار پێ نه‌زانيت، وه‌كى بێژيته بكرِى كێماسيێت ئه‌ز دزانم ئه‌ڤه‌نه، و ئه‌ز به‌س ژ ڤان تنێ به‌رپرسيارم، و ژبلى ڤان ئه‌ڤێت ئه‌ز پێ نه‌زانم ئه‌ز نه‌يێ به‌رپرسيارم و ئه‌ڤه بۆچۆنا دورستتره ژ مه‌زهه‌بێ ئيمام مالك (خودێ ژێ رازى بيت) و به‌لگه‌يێ وان ئبن عومه‌رى (خودێ ژێ رازى بيت) به‌نده‌يه‌ك فرۆته زه‌يدێ كورێ سابتى ب مه‌رجێ نه‌به‌رپرساتيێ ژ كێماسيان پشتى هنگى كێماسيه‌ك لێ ده‌ركه‌فت ڤيا بزڤرينيت ئبن عومه‌رى (خودێ ژێ رازى بيت) قه‌بويل نه‌كر، پرسا خۆ برنه ده‌ف عوسمانێ كورێ عه‌فانى (خودێ ژێ رازى بيت)، ئبن عومه‌ر دا سويندێ گۆتێ سويند بخۆ ته ئه‌ڤ كێماسيه نه‌دزانى، سويند نه‌خوار، ئينا ئيمام عوسمانى لێ زڤراند. و هه‌كه ئبن عومه‌رى (خودێ ژێ رازى بيت) دياركربا وى ئه‌و كێماسى نه‌دزانى ئيمام عوسمانى (خودێ ژێ رازى بيت) ل سه‌ر نه‌ددانا ئه‌و به‌نده‌يێ خۆ بزڤرينيته‌ڤه. و ل ده‌ف شافعيان به‌س فرۆتنا جانه‌وران ب ڤى مه‌رجى دورسته، ئه‌و ژى بۆ كێماسيێت نه‌ئاشكرا، و ژبلێ جانه‌وران نابيت ب ڤى مه‌رجى بێنه فرۆتن، و ئه‌ڤ مه‌رجه د كرِياراندا نه‌دورسته، و ل ده‌ف حه‌نبه‌ليان سآ گۆتن يێت هه‌ين ئێك دگه‌ل ئه‌بو حه‌نيفه‌يه ب گشتى ئه‌ڤ مه‌رجه دورسته، يا دووێ ب گشتى نه‌دورسته، يا سيێ وه‌كى گۆتنا دووێيه يا مالكيان هه‌كه ب وان كێماسيان نه‌زانيت دورسته و هه‌كه دزانيت دڤێت ئاشكرا بكه‌ت و نابيت ب ڤى مه‌رجى كريارێ بكه‌ت. و دويماهيێ ئه‌ز دبينم بۆچۆنا ئێكێ يا حه‌نه‌فيان دورستتره و به‌لگه پتر شه‌هده‌ييێ بۆ دده‌ن دگه‌ل كو براينيا ئيسلامێ دخوازيت ئه‌و كيماسيێت د زانينێدا بێنه گۆتن و نه‌هێنه ڤه‌شارتن، چونكى پێغه‌مبه‌ر (سلاڤێت خودێ لێ بن) د ڤه‌گێرا بوخارى و موسلميدا ژ ئه‌نه‌سآ كورآ مالكى (خودێ ژێ رازى بيت) دبێژيت: (لاَ يُؤمِنُ أَحَدُكُمْ حَتَّى يُحِبَّ لأَخِيهِ مَا يُحِبُّ لِنَفْسِهِ) كه‌س ژ هه‌وه ب دورستى باوه‌ريێ نائينيت هه‌تا وى خێر بۆ برايێ خۆ نه‌ڤێت كا چاوا بۆ خۆ دڤێت. باشه ما وى دڤێت خوساره‌ت ببيت و زيان بگه‌هيتێ؟! هۆسا دڤێت دگه‌ل هه‌ڤالێت خۆ ژى د بازاريدا يێ وه‌سا بيت، و خودێ چێتر دزانيت.
