ب : ده‌ستپێكێ دڤێت بزانین ده‌ستبه‌عی چ تشته، ده‌ستبه‌عی ئه‌وه ئێكێ ل به‌ر بیت تشته‌كێ بكریت، یان كرێ بكه‌ت و پشكه‌كێ ژ بهایی یان ژ كرێ بده‌ت، و بێژیته خودانێ تشتی: هه‌كه من پارێ ته یێ مایی ئینا ئه‌ڤه یێ منه و هه‌كه من نه‌ئینا ئه‌و ده‌ستبه‌عی بۆ ته، كا ئه‌ڤه یا دورسته یان نه؟ و كا بۆ یێ ئێكێ خودانێ تشتی دورسته وی پاره‌ی بخوت هه‌كه ئه‌و پێكهاتنه نه‌چو سه‌ری؟ ل ڤێرێ جهێ جودابوونێیه و ئه‌ڤ پرسه یا جوداهیداره، جمهورێ زانایان ل گه‌ل هندێنه ده‌ستبه‌عی نه یا دورسته، و هه‌كه پێكهاتن چ یا كریارێ بیت یان یا كرێگرتنێ بیت و دویماهیك نه‌هات، و به‌لگێ وان وان یێ ژ هه‌میان ب هێزتر ڤه‌گێرا ئیمام مالكییه ژ عه‌مرێ كورێ شوعه‌یبی ژ بابێ خۆ و ژ باپیرێ خۆ، دبێژیت: پێغه‌مبه‌ری سلاڤێت خودێ ل سه‌ربن نه‌هیا ژ ده‌ستبه‌عیێ كری، ئه‌ڤ حه‌دیسه به‌لگه‌یه‌كێ ب هیزو ئێكلاكه‌ره هه‌كه یا دو‌رستبا به‌لێ ئیمام ئه‌حمه‌د و به‌یهه‌قی و ئبن حه‌جه‌ری و نه‌وه‌وی له‌واز دانایه، دیسا زانایێ ناڤدار ئه‌لبانی ژی د (ضعیف الجامع الصغیر) دا له‌واز دانایه، و بوچونا دویێ ده‌ستبه‌عی دورسته و حه‌لاله بێته دان و بێته وه‌رگرتن، و عومه‌رێ كورێ خه‌تابی كار پێ كریه، و وئبن عومه‌ری دورست دانایه، و دیسا ل ده‌ف ئیمام ئه‌حمه‌د و موحه‌ممه‌دێ كورێ سیرینی و عه‌تائێ كورێ ره‌باحی ژی دورسته، و به‌لگه‌یێ وان نافعێ كورێ (عبدالحارث) ی ل سه‌ر ده‌مێ عومه‌رێ كورێ خه‌تابی خودێ ژ هه‌می صه‌حابیان رازی بیت ل مه‌كه‌هێ خانیه‌ك بۆ زیندانێ ل سه‌فوانێ كورێ ئومه‌یه كری، و چار هزار ده‌رهه‌م دانێ، و گۆتێ هه‌كه عومه‌ر رازیبوو ئه‌ڤه خانی یێ مه‌یه، و هه‌كه نه رازیبوو ئه‌و پاره بۆ ته، هوسا دیار‌دبیت صه‌حابان كار ب كرینا ده‌ستبه‌عی كریه، و هه‌ر چه‌نده هنده ئاخفتن ژی ل سه‌ر ڤێ ڤه‌گێرێ هه‌نه به‌لێ تشێ ڤێ گه‌گێرێ ب هێز دئێخیت هاتنا ڤێ سه‌رهاتیێ دگه‌له‌ك كتێبێت دیروكێدا و هه‌تا سه‌ر ده‌مێ فاكهانی ئه‌و خانی زیندانبوو و ئه‌ڤ ده‌ستبه‌عیه دخێرا هه‌ردوو لایاندایه، دا فروشكار پشتراست ببیت و بكر ژی دا پشتراست ببیت فروشكار ده‌ستكاریێ ناكه‌ت و پشت ویرا نا فروشیت، و هه‌كه پێكهاتن دویماهیك نه‌هات ئه‌و پاره به‌ده‌لڤه‌كرنه بۆ فروشكاری چونكی د وی ده‌میدا دبیت زیان ب وی كه‌ڤت بیت و چێدبیت بهایێ تشتێ وی هاتبیته خار پشتی خه‌لكی زانی یێ هاتیه فروتن و زڤراندن.
